ӦРТ ӰЗІРЧЕҢНЕРГЕ ЧАРЫДЫЛЧА
30.09.2016
Хабарлар
Ағбанның ӧрт ӱзірҷең-арачылаҷаң 3-ҷі частьында чонны паза Хакасияның чирін ӧрттердең паза сағыбаан саайлардаң арачыпапчатханын таныхтапчатхан барельефті пайрамни асханнар.
Барельеф гранит тастаң иділтір, кӧрімі Хакасия картазы осхас, аны ӱстӱнең ӧрт ӱзірҷеңнернің чардызы, арачылап, чаапча. Таста «Профессионализм, отвага, честь» сӧстер пазылых.
Пайрамға МЧС-тың Хакасияҷа Ӧӧн управлениезінің тоғынҷылары, Ағбанның паза Саяногорсктың ӧрт ӱзірҷеңнері, ӧрт ӱзірҷең хадағның ветераннары паза барельефті тимнеен авторлар чыылысханнар.
- Барельеф республиканың чуртағҷыларын хараа-кӱнӧрте, тынағ пілбин, арачылапчатхан кізілерге чарыдылча. Ол ӧрт ӱзірҷеңнернің кибірлерінҷе тудынчатханнарға, пастағы теесте ӧрт ӱзірҷең хадағның ветераннарына аарласты таныхтапча, - чооғын пастаан МЧС-тың Хакасияҷа Ӧӧн управлениезінің пастығы Александр Мулл.
Пайрамда ідӧк Ағбанның мэрі Николай Булакин чоох тутхан: «Город чуртағҷылары сірернің тоғызыңарны чахсы паалапчалар, сірерде постарының арачылағҷыларын кӧрчелер. Сірернің матыр тоғызыңар хайди даа таныхталарға кирек. Пу барельеф сірернің ведомствоңарны даа, Ағбанны даа чазир».
Барельефті азарға ӱлӱс пирілген Оӧн управление пастығының ӧрттердең тоғыр хазна службазынҷа орынҷызы, істіндегі службаның полковнигі Денис Коноваловха паза МЧС-тың Ағбандағы ӧрт ӱзірҷең-арачылаҷаң гарнизонының пастығы, істіндегі службаның полковнигі Николай Чекуринге.
Барельеф пӱдірер материалларны Хакасияның чуртағҷылары пиргеннер. Фундаментті тимнир, тасты паза барельефті турғызар прай тоғыстарны ӧрт ӱзірҷеңнер постары толдырғаннар. Алты тонна пасчатхан гранит тасты Ағбанзар Саяногорсктаң ағылғаннар. Іди ӧрт ӱзірҷеңнер паза республиканың ӧткін чуртағҷылары постарының холларынаң ӧрт узірҷеңнернің уғаа кирек тоғызын кӧзітчеткен хумартхы тас чайап салғаннар.
Барельеф азылған соонда МЧС-тың Хакасияҷа Ӧӧн управлениезінің устаа алынҷа тоғынҷыларға паза ветераннарға МЧС-тың ведомство сыйыхтарын читірген. Барельефті пӱдірерінде ӧткін араласхан республиканың чуртағҷыларына паза аның авторларына
алғыстас пічіктері читірілген.
Автор :
МЧС-тың Хакасияҷа ГУ-зының пресс-службазы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде