КӰРЕС МАРИИ
30.09.2016
Хабарлар
Таңда «Ағбан» спорткомплексте олаңай кӱресче саблығ спорт узы, Сеулда ирткен Олимп ойыннарында хола медаль утхан Сергей Карамчаковтың хумартхызына чарыдылған тиксі Россия синіндегі турнир пасталар.
Анда аралазарға сағынчатханнаңар сағба иткеннер Кемеров, Омск, Новосибирск, Иркутск областьтарының, Хызылчар крайының, Туваның паза Казахстанның командалары. Марығның ӧӧн чарғыҷызына турғызылған Виктор Райков. Ол Хызылчардаң, пістің чир-суғҷыбыс. Виктор Кириллович - чоннар аразындағы экстра-класс категориялығ марығ чарғыҷызы.
Экстра-класс теені марығ чарғыҷылары аразында иң пӧзік категорияа саналча. Ол категориялығ кізее чоннар аразындағы хайдағ даа килкім марығларда чарғыҷы поларға чарадылча. Андағлар санында чир-суғҷыбыс адалчатханы ӧріністіг.
Марығ тузында аарластығ аалҷылар поларлар Сергей Карамчаковнаң пір туста харбас чӧрген тилекейнің ікі хати чемпионы Виктор Алексеев, Лондонда ирткен Олимп ойыннарында хола медаль утхан чир-суғҷыбыс Любовь Волосова паза даа пасхазы.
Кибірге кір парған турнирде 19 частаң улуғ кӱресчілер аралазарлар. Таңда ол пайрам кибірли 17.00 часта азылар. Че субботада даа, позырахта даа кӱрес марии 10.00 час иртен пастал турар. Аймах чирлердең чыылысхан алып-кӱлӱктер хайди махалығ харбасчатханын кӧріп алза, хандыра полар.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде