ХГУ-да - ХЫДАТ АС-ТАМАА КӰННЕРІ
30.09.2016
Хабарлар
Пу неделяда Ағбанда Н.Ф.Катановтың адынаң Хакас хазна университедінің студенттеріне, преподавательлеріне паза аның аалҷыларына хыдат ас -тамаан чіп кӧрерге оңдай полған. 28-29 сентябрьда ХГУ-ның прай столовай парында хыдат ас-тамаа кӱннері ирткеннер.
Университеттегі ас-тамах тимнеҷең устар студенттерге «Харбинский» салат тимнеп салтырлар, ізіг чииске, тізең, ристең паза таңах идінең тимнелген стирфрай полған. Іди ӱгре адалча. Ағаа хоза шоучжуабин пиргеннер. Шоучжуабинні хыдаттар халас орнына чіпчелер. Ол ухсумнығ лепешка. Ідӧк ХГУ-ның ас-тамах устары «Лотос» печенье тимнеп салтырлар.
Хайди чоохтапча университеттегі ас-тамах тимнеҷең кабинеттің директоры Марина Уткина, ХГУ-да ӱс ай аразында пip хати аймах чонның ас-тамаа кӱннері иртче.
- Пастап піс белорусстарның ас-тамаа кӱннерін иртіргебіс, анаң университетте хакастарның ас-тамаа кӱннері полған. Столовайзар студенттердең, тоғынҷылардаң пасха, ідӧк олаңай чуртағҷылар кил парғаннар. Мындағ кӱннерде столовайларзар чон хынып килче, аннаңар мындағ кӱннер иртірер тоғысты піс аннаң андар узарадарбыс, - чооғында таныхтаан Марина Григорьевна.
Тиктең нимес пу кӱннерде ХГУ-да хыдат ас-тамаа куннері иртче. Пӱӱл университетте пасха хазналарның чииттері ӱгреніп пастадылар. Чиит оол-хыстар - Бельгиядаң, Хыдаттаң паза Монголиядаң. Килгеннернің ӧӧн чардығы - ол хыдат оол-хыстары, аннаңар ас-тамах кухнязы хыдат чонына чарыдылған.
Хайди чоохтапча Мария Юйхан Лю (хыдат хыс), ХГУ-да тимнелген ас-тамах Хыдатта тимнееніне тӧӧй, че пасхалалчатхан сари парох.
- Пiс Хыдатта ӱгрее, риске кӧп перец хосчабыс. Ідӧк аймах соустарнаң паза приправаларнаң тузаланчабыс. Мында андағ нимес, че, андағ даа полза, чиис татхыннығ, - ӧрінче чиит хыс.
Бельгиядаң килген студент Владислав Цойның кӧңніне, тізең, ристең иділген чиис кірбиндір.
- Піс рис чиирге кӧнікпеен чон полчабыс. Пiс ӧӧнінде яблахтаң тимнелген ас-тамах чіпчебіс. Че университетте аймах чонның ас-тамаан тимнепчеткені кӧңніме кірче, арса,мында ӱгренчеткен туста пістің дее чонның ас-тамаа кӱннері полар, - кӧрізінең ӱлесче Владислав Цой.
Хайди чоохтапча Марина Уткина, университетте аймах чонның ас-тамаа кӱннерін иртірер тоғыс аннаң андар узарадылар. Ӧӧні - ол ас-тамах паазы ниик паза татхыннығ полары. Хыдат ас-тамаа кӱннерінде столовайларда студенттерге 120 салковайға азыранып аларға оңдай полған. Ол аарлығ нимес.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде