«ИРЕНЕК ХАННЫҢ» МАТЛАМА ЧИҢӀЗІ
25.10.2016
Хабарлар
ПӰӰЛ «ОТ ЫРЫ» ФЕСТИВАЛЬ-МАРЫҒ РЕСПУБЛИКА СИНІНДЕ ИРТТІ. 21-22 ОКТЯБРЬДА С.П.КАДЫШЕВТІҢ АДЫНАҢ КУЛЬТУРА КІНІНДЕ КӦРІГҶІЛЕР ЧЫЫЛЫСХАННАР. 21 ОКТЯБРЬДА ТАЛЛАҒ МАРИИ ПОЛҒАН ПОЛЗА, 22 ОКТЯБРЬДА ИҢ АРТЫХТАРЫНЫҢ ГАЛА-КОНЦЕРТІ ИРТКЕН.
«ОТ ЫРЫ» ФЕСТИВАЛЬ-МАРЫҒНЫҢ ГАЛА-КОНЦЕРТІНДЕ, ЧАЙААЧЫ УЗЫН КӦЗІДІП, ТОҒЫС КІЗІ АРАЛАСХАН. ПАСТАҒЫ КӰНДЕ МАРЫҒНЫ ПААЛААН ЖЮРИ АРАЛАСЧЫЛАРЫ, ІКІНҶІ КӰНІНДЕ ОЛАҢАЙ НИМЕС ТОҒЫСТАРЫН УЗАРАТХАННАР. МЫНДА, ТІЗЕҢ, ІКІ КӰННІҢ БАЛЛАРЫ САНАЛҒАН. ЖЮРИДЕ ХАКАСИЯНЫҢ КОМПОЗИТОРЛАР ПІРІГІЗІНІҢ КІЗІЛЕРІ, САБЛЫҒ АРТИСТТЕРІ ПОЛҒАННАР: ИГОРЬ БОРГОЯКОВ, АЛЕКСАНДР САМОЖИКОВ, ОКСАНА АЛАХТАЕВА, МАРИЯ ЯНГУЛОВА, СЕРГЕЙ МАЙНАГАШЕВ, СЕРГЕЙ СИПКИН. ЖЮРИ КНЕЗІ ХАКАСИЯНЫҢ ЧОН АРТИЗІ ГЕРМАН ТАНБАЕВ ПОЛҒАН. «ГРАН-ПРИ» СЫЙЫХ ПАЗА 50 МУҢ САЛКОВАЙ «ИРЕНЕК ХАН» ӦМЕЕ ПИРІЛГЕН.
«От ыры» сарын пу фестиваль-марығның гимніне айлан парған тиирге кирек. Денис Мамышевнең Анастасия Блажнова пу кӧгні чахсы толдыр пиргеннер. «От ыры» ус-пазын, чонның кӧңнін кӧдірзін!» -мындағ сӧстер пар пу сарында.
Пілдістіг, Гала-концертте артыхтарның артығы араласча. Пӱӱлгі «От ыры» республика мариинда «Иренек хан» этно-рок ӧме, Дмитрий Сафьянов, Айана Чебодаева, Алексей Казыгашев, «Экспромт» дуэт, Фаина Чебодаева, Татьяна Балахнина, «Денис паза Анастасия» дуэт, Александр Кобежиков араласханнар.
Жюри араласчыларынаң «РТС» телекомпанияның устағҷызы Сергей Сипкин марығ алнында финалға сыхханнарны алғыстаан: «Киҷеегі чидіглеріңнеңер ундут салыңар, пӱӱнгі марығнаң чуртаңар...»
Полған на марығ - ол улуғ тоғыс. «Хан сын» кӧгнең чон алнынзар «Иренек хан» ӧме паза аның солизі Юлия Тиникова сыхханнар. Этно-рок паза эстрада ӧмезі сах андох кӧрігҷілернің кӧңнін кӧдірген. Гитараларның паза барабанның тыыда ойыны кӧрігҷі ханын ойлатхан тиирге чарир.
Таныхтирға кирек, сценаа сыххан марығҷыларның полғанын на жюри, паалар пиріп, таныхтап турған. 10 балл иң пӧзік паалағ полған. «Иренек хан» ӧмее ікі кӱн марығ салтарларынҷа 140 балл пирілген.
Дмитрий Сафьянов 119 балл чыып алған. Чайаачы оол кӧглернең паза ас-тамах тимнирінең айғасчаттыр. «Чахсы сарнапча, че кӧӧн сала орта толдырбин салған», -таныхтаан Игорь Боргояков.
Айана Чебодаева, «Ӱс той» ырны морсымнығ толдырча. Ағаа пу сарыннаң пасха кӧглерні толдырарға кирек чоғыл тиирҷікпін. Мында ол кӧрігҷілерні скрипканаң, ойнап, чапсытхан. Пастағызын, ырлабин, скрипканаң на ойнирға сыхты ба тіп сағын парғам. Чох, ол аннаң андар кізіні тирең сағысха тӱзірчеткен кӧгні толдырған. Жюри араласчылары Айанаа хакас тілін ӱгренерге чӧп пиргеннер. Пос тілін пілгені хакас ырларын чахсы читірерге полызар тіп чоохтааннар.
Алексей Казыгашев Россияның чон артизі полыбызарға сағынча. Че ағаа чон алнында туртухпин тудынарға ам даа ӱгренерге кирек. Ол пу марығда «Чиит тус» сарынны толдырған. «Мындағ айдас ӱнніг, кӧгні хап-орта сизінчеткен оолны ам на кӧрчем», - таныхтаан Герман Танбаев.
«Чиит тус» ырны Герман Гаврилович Алексейнең дуэтнең сарнап пиргеннер: «Чиит тузым, хыйаллар чох ползын...» мындағ сӧстер пу сарында. Хакасияның саблығ артизі, жюри араласчызы Мария Янгулова Алексейге узын тилідерге чӧп пирген.
Аршаннар аалынаң «Экспромт» дуэт чон алнынзар сыххан. Анастасия Сыргашеванаң Татьяна Боргоякова уғаа чахсы наа сарын толдырғаннар. Мыннан, мындар оларның чайаачы узы ӧзер паза сабланар тіп сағынчам. Кӧрігҷілер кӧңніне кіргеннерні таллапчатхан пічікте оларны таныхтаам. «Тоғазар, тоғазар, чуртазымда хыныс» ырны толдырғаннар кӧгҷі ипчілер. «Давай, поженимся» передачаны кӧрерге хынчаттырлар тіп таныхтаан иирні апарған ырҷы Анна Бурнакова. Аршандағы хыстар кӧрігҷілернің кӧңніне кірген дее ползалар, жюри кнезі Герман Танбаев оларға 7 балл пирген. Кӧгні сала саба толдырғаннар теен ол.
«Чон кӧглерінің» араласчызы Фаина Чебодаева «Хынызың хайда» ырны чахсы толдырған. Пу хомзыныстығ, лирическай ыр тиирге кирек. Оол хысха хынарбын тіп сӧс пирче, че алаахтыр салча.
Таныхтирға кирек, кибеліс сарынға айлан парза, сӧстер уламох чӱрекке теерте истілче. Фаина Чебодаева, хазых чуртас апарып, чӱс часха теере чуртирға сағынчам тіп чоохтаан.
Жюри кізізі, поэт Сергей Майнагашев Фаина толдырған ыр чон сарынына чағын тіп таныхтаан.
Татьяна Балахчинанын, хынған сағызы «От ыры» марығның чиңісчізі полыбызары полтыр. Ол пу марығда «сағай блюзын» толдыр пирген. Татьяна блюз паза джаз кӧглерін айдас толдырадыр. «Хыныс чох полза, чуртирға хайди...» сарнаан ол. «Хакас блюзын толдырарынҷа сірер пӧзік синге чит парғазар, - таныхтаан Сергей Майнагашев. - Хоза хайлап пирчеткеніңер уғаа чахсы!» Татьяна Балахчинаа тиксі 137 балл пирілген.
Александр Кобежиков, «Харағай» сарыннаң чыылған чонны хайхатхан. Ӱс нотаа салылған ырны хойығ ӱнінең чонға чахсы читір пирген. Харах имҷізі Александр Кобежиковха позының концерттерін турғызарға чарир. Опера ырҷыларынаң пip дее халбинча! Хоза оркестр ойнаан полза, уламох чахсы поларҷых. Соонаң ол «Сарығ тууп маймаамны...» сарынны кӧг чох, акапелланаң толдыр пирген.
«От ыры» фестиваль-марығ пӧзік синде ирткен, кӧрігҷілер марығҷыларны хынып истілер. Марығ араласчыларына прайзына дипломнар читірілген. «Артистизм» ӱчӱн диплом «Экспромт» дуэтке пирілген. «Пос оңдайлығ кӧг» сыйыхха Дмитрий Сафьянов турысхан. «Чон кибірлерін хайраллапчатханы ӱчӱн» диплом Фаина Чебодаеваа пирілген. «Кӧгні чахсы толдырған ӱчӱн» дипломны «Денис паза Анастасия» дуэт алған.
Сергей Сипкин Александр Кобежиковха пис муң ахчалығ сыйых читірген. Айана Чебодаеваа он муң ахчалығ сыйых пирілген. «Иң кӱстіг ӱн ӱчӱн» номинацияда Татьяна Балахчина сыйых алған.
Жюри кнезі Герман Танбаев кӧрігҷілер кӧңніне кірген ырҷының адын адаан. Кӧрігчіілернің кӧбізі Алексей Казыгашевтің ӱчӱн ӱннерін пиртір. Дипломға хоза смартфон сыйлалған.
Хакасияның культура министрінің орынҷызы Лариса Киштеева Гран-прині «Иренек хан» ӧменің солизі Юлия Тиниковаа читірген. Чиңісчі ӧменің араласчылары матап ӧрінгеннер. «Оӧн сыйыхты аларбыс тіп сағынмаабыс таа! - чоохтаан Юлия. - Марығда аралазардаңар пічікті пір кӱн халғанда ла пиргебіс...» «Иренек хан» ӧме хаҷаннаңох мындағ пӧзік сыйыхха турыстығ полған тиирҷікпін. Кибір хоостыра чиңісчее хоза сарын толдырар ӱлӱс тӱсче. Юлия Тиникова ӧменең хада Виктор Цойның ырын морсымнығ толдыр пирген. Хулаамда ам даа ол ыр истілче.
Автор :
Елена САГАТАЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде