СЫЙЫХТАР МАТЫРЛАРЫН ТАПТЫ
26.10.2016
Хабарлар
Ирткен неделяда Хакасияның чааҷылар комиссариадында уғаа чӱрексіністіг чыылығ ирткен. Конференц-залда Илбек Ада чаа араласчыларының тӧлі паза Россияның тирігліг кӱстерінің ветераннары полғаннар. Мындағ танығлығ тоғазыға улуғ частығлар даа, чииттер паза олғаннардаа килтірлер. Илбек Ада чаа араласчыларына тузында читірілбеен сыйыхтар оларның тӧллеріне читірілді. Россияның тирігліг кӱстерінің ветераннары «За верность Отечеству» орден танығларын алғаннар.
Чыылығда килген чонға фильм кӧзіткеннер. Фильм чааӌылар комиссариады апарчатхан хумархылас тоғызына чарыдылған. Ол тоғыс 70 чыл азыра апарылча. Илбек Ада чаа тоозылғанда, туған-чағыннар чаада чіт парған харындастарын, пабаларын тілеп пастааннар. Ол сидік тоғыс чааҷылар комиссариадының тоғынӌыларына артылған. Амғы туста чааӌылар комиссариады Илбек Ада чаа ветераннарына, кизек чаалазығлар араласчыларына полысча. Ӧӧн сурығларның санында чааӌыларның сӧбірелеріне аймах-пасха тӧлеглер аларға полысчалар.
Амға теере Илбек Ада чаа араласчыларының тӧллері чааӌылар комиссариадынзар айланчалар. Олар туғаннарын таап пирерге сурынчалар.
Кизек чаалазығларда Хакасиядағы 66 оолның чуртазы ӱзілген. Улуғ лейтенант Игорь Ахпашев Грозныйда, кӧйчеткен танкты тастабин, ыырӌыдаң тоғыр чааласхан. Позының махачызы ӱчӱн Игорь Ахпашев «Россияның Матыры» атха турысхан. Кизек чаалазығларда чат халған чааҷыларның аттары Хакасияның хумартхылас книгазында пазыл парғаннар.
Халғанҷы чылларда Хакасияның чааӌылар комиссариады, Илбек Ада чаада чат халғаннарның сӧӧктерін тілеп, улуғ тоғыс ит салған. Іди Хакасиязар чаа тузында сағба чох чіт парған тіп саналған 6 чааҷының сӧӧгі айланған.
Илбек Чиңістің 70 чылына тӧрт сыйых Хакасия ветераннарының туғаннарына читірілген. Пу мероприятиеде ідӧк Илбек Ада чааның ікі ветеранына тузында пирілбеен сыйыхтар туғаннарына читірілген. Константин Галактионович Кузнецов Совет Армиязынзар Ағбандағы чааӌылар комиссариадынаң хығыртылған. Ол 12-ӌі артиллерия дивизиязының 786 ниик артиллерия полкында чааласхан.
12-ӌі дивизия Курск тӱгеезінде чааласхан. Ідӧк дивизия Брянск, Чернигов паза Ковель областьтарында чаалазығлар апарған, Днепр суғны кискен. Белоруссияны паза Польшаны ыырӌы холынаң позытханында паза Берлинні аларында араласхан. 1943 чылның 2 сентябрьында СССР-ның Ӧӧркі Чӧп президиумының адынаң К.Г.Кузнецов «За отвагу» медальнаң сыйыхтатхан. Че медаль ағаа читірілбеен. Амды Россия президентінің указы хоостыра ветеран К.Г.Кузнецовтын, медаль удостоверениезін хызы Галина Константиновна Барсуковаа республиканың чааҷылар комиссары Виктор Максимчук читірген.
- Илбек Ада чаа тоозылғаннаң 70 азыра чыл ирт парды, - чоохтаан Виктор Михайлович. - Че амға теере тілегҷілер Хызыл Армияда чааласхан кізілерні тілепчелер. Пу тоғыс узарадылар. Хазыр чаалазығлар тузында сыйыхтар читірерге тус чох полҷаң. Медаль-орденнер удостоверениелері ветераннарның тӧллеріне читірілзін тіп, піс пу тоғысты апарарға кирекпіс.
Галина Константиновна, пабазына читірілбеен медальның удостоверениезін холға алып, сағысха тӱзібіскен.
- Іӌем 1939 чылда 27 июльда пабамны фронтсар ӱдескен. Ол туста іҷем тойлығ полған. Мин олох кӱн тӧреем. Финнердең тоғыр чаа тоозылғанда, пабам ибзер айланған. Че 1941 чылның июльында пабам пазох фронтсар хығыртылған. Мин андада ікі частығ полғам, че пабам фронтха парғанын оңнапчам. Пабам кӧп чаалазығларда араласхан.
Хонӌых палаларнаң кӱннің сай вокзалзар чӧрҷеңміс, че мин не пабамны сахтап алғам, - сағысха кирген Галина Константиновна.
Улуғ сержант Митрофан Макарович Коротченко Белорусскай ССР-дағы Витебск облазының Земцы аалында тӧреен. Совет Армиязынзар Ағбандағы чааӌылар комиссариадынаң 25.06.1941 чылда хығыртылған. Июльдаң сығара НКВД-ның правительство палғалызын пӱдірген. Взвод командирі полып, чаалазығларда араласхан.
СССР-ның Ӧӧркі Чӧп президиумының чахиинаң улуғ сержант М.М.Коротченко Хызыл Чылтыс орденнең сыйыхтатхан. Соонаң Митрофан Макарович пасха даа сыйыхтарнаң таныхтатхан. Че Хызыл Чылтыс орден ағаа читірілбеен. Ол сылтағнаң Хызыл Чылтыс орден удостоверениезі ветеранның оолғы Леонид Митрофанович Коротченкаа читірілген.
Ідӧк танығлығ мероприятиеде Россияның тирігліг кӱстерінің ветераннары полковник Анатолий Иванович Ширяев паза Сергей Николаевич Мурмачев «За верность Отечеству» орден танығларынаң сыйыхтатханнар.
Илбек Ада чааның кӧп ветеранына сыйыхтар тузында читірілбеен. Пу тоғыс мыннаң мындар узарадылар. Полған на медаль алай орден позының матырын табарына ізенчебіс.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде