ЧОЛ ХОНИИ ТОҒЫНҶЫЛАРЫН ЧЕЕСТЕЕННЕР
28.10.2016
Хабарлар
Ағбанда С.П.Кадышевтің адынаң культура кінінде 26 октябрьда транспорт паза чол хонии тоғынӌыларына ӱлӱкӱн ирткен. Ол транспорт паза чол хонии тоғынӌыларының кӱніне чарыдылған.
Ӱлӱкӱнге килген чонға «Дороги добра» фильм кӧзіткеннер. Анаң Хакасияның пазы Виктор Зимин транспорт паза чол хонии тоғынҷыларын алғыстаан.
Сірерні профессиональней ӱлӱкӱніңернең прай чӱреемнең алғыстапчам! Пӱӱл Россияның чол отрасльына - 270 чыл, автомобиль отрасльына 170 чыл толча. Чуртастарын чолнаң палғалыстыр салған кізілерні алғыстирға пу уғаа танығлығ сылтағ полча тіп сағынчам. Сірерге оой нимес паза уғаа кирек тоғыстарың ӱчӱн улуғ алғызым читірчем. Амғы туста Хакасияда тиксі узуны 7 муң километр федеральнай, региональнай, муниципальнай чоллар пар. Республиканың чолларында 200 тахта саналча. Чоллар тыхтирында наа технология тузаланылча. Анзы чолларның качествозын чахсыландырарға паза тузаланар тузын ӧскірерге полысча. Сірер экономика ӧзізіне улуғ хозым итчезер. Мин прайзына часка, хазых чуртас алғапчам! - теен Хакасияның пазы.
Ол ідӧк кічіг паза ыраххы аалларда чоллар тыхталчатхан сылтаанда оларға чіт парбасха, уламох тилирге оңдай пирче тіп таныхтаан.
Анаң Хакасияның пазы чол хонии тоғынӌыларына сыйыхтар читірген «11 № чол пӱдірии предприятиезі» ООО-ның пастығы Нияз Гадировха «За заслуги перед Хакасией» орден, Хакасавтодорның пӱдіріг паза тыхтағ пӧлиинің пастығы Евгений Луценкаа «Хакас Республиканың аарластығ пӱдірігҷізі» ат пирілген. Идінҷек Светлана Дамерге «Хакас Республика транспортының аарластығ тоғынҷызы» ат пирілген. Хакасияның транспорт паза чол хонии министрі Александр Егоровха, кӧп чыллар чахсы тоғынған, Хакасияның транспорт паза чол отрасльы тилізіне кӧп туза ағылған ӱчӱн, Хакасия пазы аарлығ сыйых - алтын час - читірген.
Виктор Зимин республиканың транспорт отрасльына кӧп туза ағылған предприятиелер устағҷыларына, идінӌектерге паза тоғынӌыларға аарластығ пічіктер читірген.
Транспорт паза чол хонии министрі Александр Егоров пайрамға килген чол хонии паза транспорт тоғынҷыларын профессиональнай ӱлӱкӱннерінең алғыстаан.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде