ПОЛҒАН НА ӰГРЕНҶЕЕ АЛЫНЧА ХАЙЫҒ
13.12.2016
Хабарлар
Таштып аймаандағы Кічіг Арбыт аалның ӱгретчілері Зинаида Семёновна Тиспирекованаң Татьяна Антиповна Тюкпиекова Ағбанда 8-9 декабрьда ирткен "Развитие профессиональной культуры педагога как фактор повышения учительского потенциала " ӱгретчілернің республика марафонында араласханнар. Пӱӱл марафон VII хати иртірілді. Ол Хакасияның ӱгредіг паза наука министерствозының 25 чылына чарыдылған.
Чыылығның ӧӧн темазы чайаачы паза хазии уйан ӱгренӌілерні наа оңдайнаң ӱгредері полған.
- Чуртас алызып одырча, аннаң хада ӱгредіге ідӧк наа алызығлар кирілче. ФГОС хоостыра амды ӱгретчі палаларны пасха оңдайнаң ӱгредерге кирек. Пӱӱлгі марафонда ирткен мастер-класстарда, "тегілек столларда", тренингтерде чоох ӧӧнінде амғы ӱгредіг системазынаңар парған. Ӧӧн хайығ салылған чайаачы паза хазии уйан ӱгренӌілернең тоғынарына. Ӱгретчінің клазында мындағ олғаннар пар полза, ол, полғанына ла алынӌа хайығ салып, оларнаң тирең тоғынарға кирек - чайаачы ӱгренӌінің талантын тилідерге полызарға, кинекнең, тізең, улам тирең тоғынарға. Кинек олған пасха ӱгренӌілердең пір дее халбасха кирек, - чоохтапча Хакасияның ӱгредіг паза наука министрінің орынҷызы Ирина Ауль.
Ӱгретчілер марафоны Ағбанда 24 № школада ирткен. Пу кӱннерде ӱгретчілер аймах методика мероприятиелерінде араласханнар - ол ӱгретчілернің мастерскойлары, чоох алысчаң площадка, "тегілек стол", мастер-класстар, чайаачы марығлар. Ідӧк анда хоостар, видео-фильмнер марығлары ирткеннер.
Кічіг Арбыт аалның ӱгретчілері Зинаида Тиспирекованаң Татьяна Тюкпиекова школада хазии уйан ӱгренҷілернең хайди тоғыс апарчатханнарынаңар чоох тутханнар.
- Пістің школада хазии уйан 10 азыра ӱгренҷі ӱгренче. Урок пасталар алнында ӱгренҷінің кӧңнін кӧрчебіс - тоғынңаң кӧңні пар полза, улуғ хоостар хоостапчабыс, кӧңні чох полза, ниик арах тоғыстар толдырчабыс. Урокта піс удаа ойын пастыра хоостар чайапчабыс, шаблоннарнаң удаа тузаланчабыс, - чоохтапча Татьяна Антиповна Тюкпиекова.
Зинаида Тиспирекова география паза биология ӱгретчізі полча.
- География урогында кинек ӱгренҷілер схемалар хоостирға, материктердегі аң-хустарнаң танызарға хынчалар. Пу марафонда піс пасха ӱгретчілер хазии уйан палаларнаң хайди тоғынчатханын кӧpiп алғабыс, посха кӧп наа паза тузалығ нимелер алып алғабыс, - сағызынаң ӱлесче ӱгретчі.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде