ЧИИТ КӦРІГҶІЛЕРГЕ НАА ОЙЫН
13.12.2016
Хабарлар
Ирткен неделяда A.M. Топановтың адынаң Хакас драма театрының чайаачылары хабарҷыларнаң тоғасханнар. Пресс-конференция ам турғызылчатхан «Мин - Маугли» ойынға чарыдылған.
Пастап сӧс театрның директоры Владимир Чустеев алған. Аның чооғынаң, театрда кічіг олғаннарға кӧп ойын турғызылча. Палалар «Анзы ӧӧні нимес», «Машаҷахтың тӧреен кӱні» паза аннаң даа пасха спектакльларны хынып кӧрчелер. Че саарбахтарға ӧнетін турғызылған ойыннар театрның репертуарында чох полтыр. Пу читпес сарин тӱзедерге пӧгініп, В.В.Чустеев Редьярд Киплингтің «Джунглинің киндезі: Мауглинің харындастары» нымағы пастыра наа спектакльны чайирға чаратхан, Таныхтирға кирек, «Мин - Маугли» ойын Россияның театр деятельлерінің пірігізі пирген ахчаа турғызылча.
«Мин - Маугли» спектакльның режиссеры Калмыкия искусствозының саблығ деятельі Баатр Колаев полча. Наа тоғызын ол этно-мюзикл жанрда турғысча. Хайди таныхтаан режиссер, теелбектердең паза кӧглердең пӱтчеткен спектакльны чайирға хаҷанох сағыс полған. Амды ол чуртасха кирілче. «Композитор Татьяна Шалгинова ойынға уғаа чарас музыка пас салған, - чоохтаан Б.Д.Колаев. - 13-15 частығда кізі пасхазынаң алынӌа тудынарға кӱстенче, аннаңар піс ойынны «Мин - Маугли» адап салғабыс. Спектакльның ӧӧн матыры позын кем полчатханын оңарып аларға кӱстенче. Артисттер мында аңнарның орнына кізілерні ойнапчалар, че Редьярд Киплингтің нымағының полтазын піс толдыразынаң артыс салғабыс».
Теелбектерні Бурятияның паза Туваның саблығ артизі, «Саяны» ансамбльның балетмейстері Менгилен Сат турғысча. Аның чооғынаң, Хакас драма театрының артисттері теелбектерні хомай нимес толдырчалар. «Мин - Маугли» спектакльда чиит чайаачылар ойнапчалар, - таныхтаан хореограф, - оларның кӧбізі Санкт-Петербургтағы театр академиязын тоосхан. Артист профессиязын алчатханнар хайди даа теелбек саларға ӱгренчелер, аннаңар мюзиклде ойнирға олар тимделер. Чиит кӧрігӌілерні ӧріндірерге пӧгініп, піс теелбектерні хати-хати толдырчабыс».
Пресс-конференцияда ідӧк Хакасияның чон артизі, саблығ композитор Татьяна Шалгинова араласхан. Ойынға кӧгні ол часхызын пазып пастаптыр. Татьяна Фёдоровна музыканы чайапчатханда, ол позының саарбах тузын сағысха кирген тіп чоохтап пирген.
Композиторның таниинаң, 13-15 частығларның пастағы орында хыныс полча, чайаачы ӧме пу теманы спектакльда чарыт пирерге кӱстенген.
Ойын тузында артисттерге кӧп теелбектенерге килісче, аннаңар ырларны олар постары толдырбастар. Прай кӧглерні паза сарыннарны театрдағылар азынада пас салғаннар. Ырларны Олег Гриценко, Юлия Тиникова паза Александра Сукало толдырғаннар. Спектакльны ідӧк видео чазапча, кӧзідімге, пip сцена тузында экранда хуруп париған чир кӧзіділер, ікінҷізінде, тізең, наңмырның тамңыхтары.
Пресс-конференция тоозылғанда, хабарҷыларға артисттернің репетициязын кӧріп аларға чаратханнар. А.М.Топановтың адынаң Хакас драма театрында сынап таа чапсых ойын тимнепчеттірлер. Хабарҷыларны теелбектер дее, артисттернің ойнапчатханы даа аптаан.
Санапчам, пу ойын чиит кӧрігҷілернің кӧңніне хайди даа кірер. «Мин - Маугли» спектакльның премьеразы 23 декабрьда 13.00 паза 15,00 часта иртер. Театрның ӧмезі чиит кӧрігҷілерні ойынға хығырча.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде