ИҢ ЧАХСЫ ӰГРЕНҶӀЛЕРГЕ ПАСПОРТТАР ЧИТІРІЛГЕН
14.12.2016
Хабарлар
ХАКАСИЯДА РОССИЯ ФЕДЕРАЦИЯЗЫНЫҢ КОНСТИТУЦИЯЗЫ КӰНІНЕ 14 ЧАС ТОЛДЫР САЛҒАН ЧАЙААЧЫ ӰГРЕНӋІЛЕРГЕ ПРАВИТЕЛЬСТВО ТУРАЗЫНДА ПАСПОРТТАР ЧИТІРЕРІ КИБІРГЕ КІР ПАРҒАН.
ИРТКЕН НЕДЕЛЯДА ХАКАСИЯ ПАЗЫ ВИКТОР ЗИМИННІҢ ХОЛЫНАҢ ПАСПОРТТАРНЫ 24 ӰГРЕНӋІ
АЛҒАН. ОЛАРНЫҢ АРАЗЫНДА АҒБАҢДАҒЫ ГИМНАЗИЯНЫҢ ӰГРЕНӋІЗІ НИКОЛАЙ САГАТАЕВ, Н.Ф.КАТАНОВТЫҢ АДЫНАҢ НАЦИОНАЛЬНАЙ ГИМНАЗИЯ-ИНТЕРНАДЫНЫҢ ОЛҒАННАРЫ АЗАР УЛУГБАШЕВ ПАЗА ГЕОРГИЙ ПОЛИКАРПОВ ПОЛҒАННАР.
Ағбан, Харатас городтарның, Ағбан пилтірі, Алтай аймахтарының паза Н.Ф. Катановтың адынаң национальнай гимназия-интернадының ӱгренҷілері город, республика паза тиксі Россия марығларының, олимпиадаларының чиңісчілері полчалар. Кем-де спортта пӧзік чидіглерге читкен, хайзы чайаачы марығларда, хай піреезі, тізең, школаның халых чуртазында ӧткін араласча. Че оларның полғаны ла Хакасияның иң чайаачы ӱгренҷізі полча. Андағларны, тиксі 100 азыра ӱгренӌіні, республикада тӧртінҷі чылы таныхтап, сыйыхтар читірчелер.
- Аймах марығлардағы чиңістер - ол ӱгренҷінің, ӱгретчінің паза іҷе-пабаларның улуғ чидіглері. Чиңістеріңнең сірер школаңарны, городыңарны паза республиканы саблапчазар, - айланған чииттерзер Виктор Михайлович. - Нинңе-де чыл пазынаң сірер табығларда аралазар праволығ поларзар, республика паза хазна устағҷыларын табарзар. Табығлар - ол уғаа нандырығлығ тус. Аннаң палғалыстығ пістің таңдағы чуртазыбыс. Таңдағы чуртасты сірер, чииттер, ідӧк тӧстирзер. Ізенербіс, ӧс парзаңар, сірер турыстығ, нандырығлығ кізі поларзар. Чуртаста хайдағ даа чолҷа парзаңар, ӧӧні - пос сӧбірезі, чир-суубыс паза хазна тилізі ӱчӱн істенерге.
Николай Сагатаев Ағбандағы гимназияда 8-ӌі класста ӱгренче. Ол "Юность науки-2016" наука-практикалығ конференцияның, "Точка зрения" клубтың ӧткін араласчызы паза "Исследование PH среды продуктов питания" проекттің тӧстегӌізі полча. Николай предметтер олимпиадаларында удаа араласча, книгалар хығырарға хынча паза арғыстарына полыс пирерге хаҷан даа тимде. Школа соонаң финансистке алай ба экономистке ӱгренерге пӧгінче.
Азар Улугбашевнен, Георгий Поликарпов Н.Ф.Катановтын, адынан, национальнай гимназия-интернатта ӱгренчелер. Азар чахсы ӱгреністең пасха, ідӧк спортта пӧзік чидіглер
кӧзітче. Ол теннисче олимпиаданың чиңісчізі полыбысхан. Ачых-чарых кӧңніліг оол паспортты Хакасияның правительство туразында алғанына поғдархапча.
Георгий хакас тілінең матлама чоохтасча. Ол Ағбандағы А.А.Кенельнің адынаң музыка школазын тоосхан. Аның музыка устағӌызы Мария Сергеевна Сартыкова полған. Анда ол хомыснаң, домранаң, хобырахнаң, ыыхнаң, тӱӱрнең ойнирға ӱгреніп алған. Ідӧк Георгий грек-рим кӱрезі паза волейбол секцияларына чӧрче. Ӱгренӌінің іҷезі Галина Степановна оолғыӌааның ӱчӱн поғдархапча, че махтирға кӱстенминче.
- Минің кӧрізімнең, пала хайди даа чахсы ӱгрензе, іӌе-пабаа аны махтирға чарабас. Аны класс устағӌызы, ӱгретчілер, хонҷыхтар паза даа пасхазы махтазыннар. Георгийнің чайаачызын піс олған тузындох сизінгебіс. Школа алнындағы группаа чӧрчеткенде, воспитательге планеталардаңар чоохтаптыр. Воспитатель хайхаан. Іди, аның чайаачы оңдайын сизініп, тилідерге кӱстенгебіс. Пасталығ класстарға Ағбанның 20 № школазынзар парған, анаң 5-ӌі классха позы национальнай гимназияда ӱгренерге сурынған. Ана аннаңар піс аны андар ӱгренерге пирібіскебіс. Анда ол хынып ӱгренче.
- 2016 ӱгредіг чылның пастағы четвертьінде пір ле "4", пасхазы "5" паалағлар. Паспортты правительство туразында алғаныма ӧрінчем. Піске амды улам нандырығлығ паза чуртасха пасха кӧрістіг поларға кирек тіп сағынчам, - тіпче ӱгренӌі.
Георгий историяҷа паза обществознаниеҷе тиксі Россия олимпиадазының региондағы чардығының чиңісчізі полча. Ідӧк ол - "Многоликая Россия" марығның "Фольклор" номинациязының лауреады.
Хакасия правительствозы туразында паспорттар алған ӱгренӌілер - прайзы чайаачы оол-хыстар. Оларға сыйыхтар читірілген соонаң, ӱгренҷілер республика пазынаң хада сомға суурынғаннар.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде