ПОС КИРЕЕ ПОСХА ДАА, ПАСХАЗЫНА ДАА ПАРЫС АҒЫЛЧА
14.12.2016
Хабарлар
Пии аймаандағы Бондарев аалзар кірчетсе, сыр заводы харахха тасталча. Сигіс чыл мының алнында аал чуртағҷызы Николай Проценко пос киреен тӧстеп аларға чаратхан. Аалда чуртапчатхан кізі нименең айғазар? Пілдістіг - мал-хуснаң. Николай Дмитриевичтің аал хонии киреенде пілізі пар. Ол Бондаревтегі совхозта инженер полған, анаң Табаттағы совхозта істенген. Аалдағы изел париған совхозтың хазааларын садызып, анда тыхтағ тоғыстарын идібіскен.
Иң пастап Николай Проценко сӱт цеғын тӧстеп алған. Сӱтті Бондарев чуртағҷыларынаң садызып алӌаң. Аалдағы мал тутчатхан кізілер сӱт ӱчӱн ахча ал сыхханнар, оох-теек нимелер аларына ол ахча чидісчең. Сӱт цеғынзар сыр итчең оборудование идінӌек пос ахчазына алған, ідӧк ағаа Хакасияның аал хонии министерствозы субсидиянаң чахсы хабас пирген.
- Цехты пӱдірерге ахча кӧп хорабаан, че сыр итчең оборудование уғаа аарлыға тур парған. Хакасияның аал хонии министерствозы 500 муң салковай субсидия пиргеннеңер, кӧп ниме аларға оңдай полған, - чоохтапча Николай Проценко.
Іди Николай Дмитриевич сыр идіп пастаан. Амды идінҷек 7 аймах сыр сығарча. Хайди поғдархап чоохтапча хоныхтың ээзі, цехта итчеткен "Сулугуни" сыр "Россияньщ 100 иң артых товарлары" атха турысхан. Аны киречілепче иң кӧріндіре орында орныхчатхан диплом.
Чылдаң чылға идінӌек хониин тилідіп одырған. Мал-хус алып, оларның санын алғытхан. Хайди чоохтапча Николай Проценко, хус тудары ахча саринаң нандырығлығ полбиндыр. Аннаңар хус ӧскірерін ол тохтатхан. Амды аның хониинда інектер паза хойлар ла. Оларны идінҷек аал тастында тутча. Малны ибде соғарға чаратпиныбысханнаңар, ол ікі чыл мының алнында мал сохчаң орын пӱдіріп пастаан. Пу кирекке кӧп ахча хорадылған, оборудование ідӧк аарлыға тур парған. Пастап идінӌек анда позының на малларын соғарға пӧгін тутхан, че орындағы чуртағҷылар малларын сох пирерге сурынғаннарында, Николай Проценко Бондаревтегі паза хости аалларның малларын соғымға ал сыххан.
- Чуртағҷыларның малларын соғып, оларға даа, піске дее чахсы. Чуртағҷының малын соғыбызып, мал имҷізі ағаа кирек пічіктер тимнеп пирче. Соххан ӱчӱн ахча албинчабыс, істі-харнын на алып алчабыс. Кӱнде 20 мал соғарға чарир. Улуғ холодильник пар, - чоохтапча Николай Проценко.
Позының соххан малларын ол чӧптезіг хоостыра Хызылчарзар, Ағбанзар (республиканың имнег туразынзар) тӧреміл ағылча. Ідӧк Ағбандағы аал хонии рыногында аның садығ орны пар. Хайда ол хонығында пар ниме-нооларны садыға сығарча. Ідӧк идінҷек аал хонии ярмаркаларында тӧреміл араласча.
Пӱӱнгі кӱнге Николай Проценкоға Пии аймаандағы пис аалның чуртағҷылары сӱт сатчалар. Олар - Табат, Бондарев, Хызыл хара суғ паза даа пасха ааллар чуртағӌылары. Сыр итчең цехта, мал хониинда тиксі 11 кізі істенче. Прайзы аалдаң.
Автор :
Оксана ИВАНДАЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде