ПЕРИНАТАЛЬНАЙ КІННІҢ ПӰДІРИИНДЕГІ ХАЛҒАНҶЫ ХААЛАҒЛАР.
16.12.2016
Хабарлар
ПУ НЕДЕЛЯДА ХАКАСИЯНЫҢ ПАЗЫ ВИКТОР ЗИМИН ПӰДІРІЛ TEE ПАРИҒАН ПЕРИНАТАЛЬНАЙ КІНДЕ ШТАБ ЧЫЫЛИИН ИРТІРГЕН. МЫНДА РЕСПУБЛИКА ПАЗЫНЫҢ ПАСТАҒЫ ОРЫНӋЫЗЫ ОЛЕГ НАМ, ОРЫНӋЫЛАРЫ ИРИНА СМОЛИНА, ВАЛЕРИЙ МАРКОВ, ХАКАСИЯНЫҢ ХАЗЫХ ХАЙРАЛЛАӋАҢ МИНИСТРІ НАТАЛЬЯ КОГАН, ФИНАНСТАР МИНИСТРІ СЕМЁН АЁШИН, ПЕРИНАТАЛЬНАЙ КІННІҢ ПӰДІРИИНЕҢ УСТАПЧАТХАН РОМАН СОЛОМОНЮК ПАЗА ПАСХАЗЫ ДАА ПУ КӰННЕРГЕ ХАЙДАҒ ТОҒЫСТАР ИДІЛ ПАРҒАНЫНАҢАР, AM ДАА НИМЕ ИДЕРГЕ ХАЛҒАНЫНАҢАР ЧООХ ТУТХАННАР.
ШТАБ ТОҒЫЗЫ ПЕРИНАТАЛЬНАЙ КІННІҢ ПӦЛІКТЕРІН СЫНЫХТИРЫНАҢ ПАСТАЛҒАН. ВИКТОР МИХАЙЛОВИЧКЕ 3-ӌі, 4-ӌі, 5-ӌі ХАДЫЛЛАРДАҒЫ ПАЛАТАЛАРНЫ, ОПЕРАЦИОННАЙЛАРНЫ КӦЗІТКЕННЕР. ХАЙ ПІРЕЕЗІНЗЕР ОБОРУДОВАНИЕ КИР САЛТЫРЛАР, КӦП ФУНКЦИЯЛЫҒ ОРҒАННАР (ОЛАР НИНӋЕ-ДЕ ЧАРДЫХТАҢ ПӰТЧЕЛЕР, ПОЛҒАНЫН НА ЧАТЧАТХАН КІЗЕЕ КИЛІСТІРЕ КӦДІРЕРГЕ АЛАЙ ТӰЗІРЕРГЕ ЧАРИР) ТУРҒЫЗЫЛ ПАРТЫР. ЧЫЫЛЫҒ МЫНДОХ, ПАСТАҒЫ ХАДЫЛЫНДА, ИРТКЕН.
Хайди искірген Хакасияның капитальнай пӱдіріг управлениезінің директоры Андрей Степанов, пӱӱнгі кӱнге перинатальнай кінге оборудование толдыразынаң даа алыл парир, ағаа 1 млрд 60 млн салковай хорадылған. Сағам дезинфекция иртірӌең ікі камера алылғалах, че ол сурығ пӧгілче, анзына 362 муң салковай хорадылар.
Ідӧк душ кабиналары, аймах сантехника алылча паза турғызылча. Ӧӧн подрядчиктің таныхтаанынаң, перинатальнай кінде тоғыстар хараа-кӱнӧрте апарылчалар. Мында тиксі 1230 кізі тоғынча.
Оборудование турғызарынӌа тоғыс хыызында парча, олох туста прай кирек пічіктер тимнелчелер. Пу неделя соонзар перинатальнай кінге адрес пирілерге кирек. Мында амох республиканың гигиена паза эпидемиология кіні тоғынча, олар, анализтер алып, сыныхтағлар иртірчелер. Олар чарадығларын пирзелер, лицензирование иртібізерге халар. Анзына даа кӧп хайығ айландырарға кирек тіп таныхталған чыылығда.
Ідӧк имҷілерні пеер кӧӧлҷе кӧзірер сурығларны ӱзӱрчелер. Хакасияның хазых хайраллаҷаң министрі Наталья Коганның искіриинең, Ағбандағы паза Харатастағы пала тапчаң имнег тураларына перинатальнай кінзер кӧсчең график тимнел парған, ол Россияның хазых хайраллаӌаң министерствозында ӱзӱрілген паза ағаа чарадығ пирілген.
Наа оңдайларда паза наа оборудованиенең тоғынар специалисттерні тимнирі ідӧк ӧткін парча. Имҷілер пасха регионнардағы перинатальнай кіннерде стажировка иртчелер. Специалисттер чидіспинчеткеннеңер сурығ мында турбинча.
Чыылығда, чоох тутханнарны истіп, Виктор Зимин таныхтаан: «Хайди мин чоохтаам, перинатальнай кіннің пӱдіриин пу чыл тоозылғанӌа тоос саларға кирекпіс. Объектті кӧрзе, ол 95 азыра процентке тимнел парған. Амды тоғысты ипти апарарға кирек, оборудование турғызарында, аны тузаланысха кирерінде маңзырирға чарабас. Піс перинатальнай кінні позыбысха пӱдірбинчебіс, аннаң тиксі республиканың чуртағӌылары тузаланар. Аны Хакасияның прай ипчілеріне пӱдірчебіс: ууӌаларға, іҷелерге...
Наа имнег туразынзар кӧзер алнында, мин мында тоғынар кізілернең тоғазып аларға сағынчам. Пу тоғазыға перинатальнай кіннің пӱдірии ӱчӱн нандырығлығ кізілер прайзы килер. Прай ниме чахсы полза, алғыстас сӧстерін истерзер. Ідӧк піске федеральнай кіннің паалааны уғаа кирек. Пістің алныбыста ам даа кӧп пӧгін турча. Піс республиканың олған имнег туразын паза радиология корпузын пӱдірерге сағынчабыс. Ол Хакасияның хазых хайраллирына уғаа кирек».
Ідӧк Виктор Зимин перинатальнай кіннің ибіркізін иптиріне хайығ саларға чахығ пирген. Аннаңар сурығны пу чағында пӧгібізерге кирек теен ол. Мыннаң чыылығ араласчылары тоғыстарын тоосханнар.
Автор :
Татьяна КЫШТЫМОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде