ПОЛҒАН НА САЛКОВАЙ - ААРЛЫҒ
16.12.2016
Хабарлар
Хакасияның Ӧӧркі Чӧбі пӱӱнгі сессия алнында президиум чыылиин иртірген. Кӱн суриина сессияда ӱзӱрілер сурығлар сығарылған.
Хакасияның финанстар министрі Семён Аёшиннің искіриинең, пу чылның республика бюджедіне алызығлар федеральнай кіннең хоза ахча кіргеннеңер, ідӧк ӧӧн кӧстеглерӌе хорадығларны хатап таныхтааннаңар кирілчелер. Парыстар паза хорадығлар тиң хозылчалар - 2 миллиард 444 миллион 733 муң салковайға. Парыстар санына ідӧк 1 миллиард 771 миллион 846 муң салковай налогтар паза пасха парыстар кирілген.
Республика бюджедін иптиріне федеральнай кіннең 708 миллион 923 муң салковай кірер. Пӱӱнгі кӱнде ахчаны республика бюджедінзер кирерінҷе тоғыстар апарылча. Ол ахча бюджет сферазындағыларға декабрь чал ахчазының ӧӧн чардығын тӧлиріне парар. Ідӧк федеральнай бюджеттең кӧстегліг хабазығ кірері кӧрілче: льготалығ чуртағҷыларға имнер пиреріне, кинек олғаннарны азырирына, тиксі тыхтағ тӧлеглеріне хорадығларны айландырарына, "Аарластығ донор" аттығларның тӧлеглеріне. Че олох туста хай пірее кӧстеглерӌе федеральнай кіннең хабазығ хызырылар: наа ла тоғынып пастапчатхан фермерлерге, аал хонии ниме-нооларын сығарчатханнарға чирлернің мелиорациязына хабазығ.
Алызығлар кирілзе, 2016 чылның республика бюджедінің кӧзідіглері тиңнелер: парыстар - 28 миллиард 936 миллион 988 муң салковайға, хорадығлар - 32 миллиард 90 муң салковайға, дефицит - 3 миллиард 63 миллион 102 муң салковайға. 2017 паза 2018 чылларның кӧзідіглері алыспас. Закон проекті пӱӱнгі сессияда ӱзӱрілер.
Президиум чыылиинда ідӧк Россия регионнарының закон сығарӌаң ӱлгӱ органнарының федеральнай законнарзар паза чарадығларзар алызығлар кирер сағыстарына ӱндезіглер пирілген. Томсктағы депутаттар "Россиядағы ӱгредігдеңер" федеральнай законға алызығ кирер сағыснаң Хазна Думазынзар айланчалар: олғаннарға учебниктердең пасха полғаны ла тузаланчатхан хоза ӱгредіг сығарыстарын (тоғысчы тетрадьтарны) тикке сығарардаңар.
Карелиядағылар "Арығ суғ" федеральнай программаны узарадарынаңар паза аны хоостыра тоғыстарны толдырарына федеральнай кіннең хабазығны хозарынаңар Россияның пӱдіріг паза ЖКХ министрі Михаил Меньзер айланчалар. Имнерге хабазығны алғыдардаңар сағыссырапча Сахалин облазындағы парламент.
Владимир Штыгашев паза комитеттер кнестері закон сығарҷаң сағыстарға чӧпсінгеннер, регионнар кӧдірчеткен сурығлар пістің республикада даа сидік сурығлар санына кірчелер нооза.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде