ЧАРҒЫ СИСТЕМАЗЫНДАҒЫ АЛЫЗЫҒЛАР
16.12.2016
Хабарлар
Хакасияның Ӧӧркі чарғызының кнезі Виктор Носов 14 декабрьда журналисттерге пресс-конференция иртірген. Анда ол чарғы системазындағы алызығлардаңар паза чарғылар тоғызына теелчеткен пасха даа сурығлардаңар чоох апарған.
Чооғын пастап, Виктор Николаевич Москвада Россия чарғыӌыларының IX съездінде пол килгенінеңер искірген. Анда ӱзӱрілген сурығларның пірсі присяжнай чарғылардаңар сурығ полтыр. Андағ чарғылар амға теере Россия субъекттерінің чарғыларында ла полған полза, пазағы чылдаң присяжнай чарғылар городаймахтарда даа тоғынарлар. Ол чарғылар аар сайбағларҷа ла чарадығлар алчалар. Хайдар чарғыда уголовнай кирек кӧрілерін чарғылатчатхан кізінің позының таллап алар правозы пар.
Россияның Ӧӧркі чарғызының кнезі Вячеслав Лебедевтің пастаанаң, хазнада амды апелляция округтары тӧстелер. Андағ округтар амға теере Арбитраж чарғызында ла полғаннар, амды андағ оңдай прай субъекттерде полар. Апелляция хоптарын Оӧркі чарғы кӧрҷең, ам ол хоптар округтарда кӧрілерлер.
Россия чарғыҷыларының VIII съездінде Чарғылар этиказының кодексі алылған, анда чарғыҷыны хыйа идер оңдайлар пазылған. Ам ирткен съездте ол кодекстің хай пірее пункттары чох иділген. Кӧзідімге, чарғыҷыны хыйа идер оңдайлар Россияның уголовно-процессуальнай кодексінде кӧзіділчелер, аннаңар оларны этика кодексінең хыйа алыбызарға киліскен.
Виктор Носов чарғылар чарадығ аларында пір дее органнарнаң алай кізілернең палғалыстығ полбинчатханынаңар кӧп чоохтаан. Аның искіриинең, ол андағ чарғылар парын пілбинче, чарғылар сыбыра законға ла тӧстенчелер.
Орындағы ӱлгӱлернең палғалыстығ полдыртпас пӧгіннең, федеральнай чарғылар федеральнай бюджет ахчазына ла тудылчалар, орыннардағы бюджеттердең ахча албинчалар. Мировой чарғыҷылар чал ахчазын ідӧк федеральнай бюджеттең алчалар, че оларның аппарат тоғынҷыларына чал ахчазын регионнар тӧлепчелер, материально-техническай базалары ідӧк регион бюджедінің ахчазына тудылча. Аннаңар оларның тоғызы регион ӱлгӱлерінең палғалысча. Мировой чарғыларда компьютерлер хаӌанох иргілен парғаннар, оларнаң тоғынарға сидік. Пірееде почта хорадығларына даа ахча чох пол парча. Почтаҷа искіріглер ызылбаза, мировой чарғының тоғызы саңай тохтап парча. Искіріглер албаан кізілер чарғызар килбинчелер нооза. Чарғыҷыларның VII съездінде ол туста Россияның президенті полған Дмитрий Медведев прай мировой чарғыларны федеральнай бюджет ахчазына тудар сурығ кӧдірген, че ол амға теере пӧгілбеен.
Чарғылар тоғызына электроннай оңдайлар кирілчеткенінеңер чоох парған. Хайди таныхтаан Виктор Носов, андағ оңдайлар чағынғы туста тоғынар, аннаң чииттер тузалан поларлар. Че компьютернең тоғын полбинчатхан улуғлар пічіктерні холнаң пасчалар, оларны ӱгредерге орай, аннаңар прай чарғылар холнаң пазылған пічіктернең тоғынарын узарадарлар.
Виктор Николаевич гуманизациядаңар сурыға нандырған. Аның чооғынаң, ам тың аар нимес сайбағлар ӱчӱн уголовнай хатығлас орнына административнай нандырығ тудары кӧрілче. Ідӧк аар нимес сайбағ иткен ӱчӱн наа хатығлас - чарғы штрафы - кӧріл парған. Андағ штраф салдырған кізі чарғылатханға саналбинча. Гуманизация, алай аны либерализация тіпчелер, сылтаанда хазнада 200 муң азыра уголовнай кирек тохтадылған, 29 колония чабыл парған.
Хакасияның Ӧӧркі чарғызының кнезі журналисттернің аннаң даа пасха кӧп сурығларына нандырған.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде