ААТ ОСХАС ЫНАҒ ИРЕПЧІ
16.12.2016
Хабарлар
Пӱӱл улуғ хырлас айының 10-ӌы кӱнінде Азах Сӧӧт аалның чуртағӌызы Ада чаа ветераны Гаврил Иванович Аёшинге 92 час толған. Аны аарлап, туған-чағыннары, пала-пархалары чыылызып алғыстааннар. Узах час чазап салған кӱстенҷік аға уғаа ачых-чарых паза чітіг тудынча. Гаврил Иванович, сӧбіре пазы полып, пик хоных тӧстеп, хада хонғаны Тамара Николаевнанаң 60 азыра чыл ынағ чуртапчатхан ӱчӱн, туған-чағыннары поғдархапчалар. Аат осхас ынағ ирепчі піске, чиит тӧлге, чахсы кӧзідім полча.
Хада ӧскеннері, улғаадыс парған нанҷылары чыылысса, ыраххыны чағын идіп, кӧп нимені сағысха киріп, суулазып одырчалар. Піс оларның чооғын хынып исчебіс. Гаврил Иванович паза Тамара Николаевна Аёшиннер 67 чыл хада чуртап салғаннар. Олар 1949 чылда хоных хонғаннар. Сидік чылларны хада ирткеннер. Удур-тӧдір пілізізіп, хада-пірге тудынып, читі пала ӧскіргеннер. Палалары шофер, тракторист, агроном, ӱгретчі профессияларын алғаннар. Сағам парчазы тынағда, пархаларын ӧскірчелер.
Тамара Николаевна паза Гаврил Иванович, тыс пілбин, колхозта, анаң совхозта істенгеннер. Гаврил Иванович минің чистем полча. Ол ағас тартчаң машина водительі полып тоғынған. Пиӌем, тізең, часхызын ас арығлап, торым тимнеӌең, чайғызын хой хырығып, кӱскӱзін складта ас хурутчаң. Совхозта сосха, інек кӧрӌең. Тынаға сыхханда, фермада хадағҷы полған.
Ирепчінің мының алнындағы чуртастаңар чоохтарын истіп, полған ниме харахха кӧрінчеткен чіли пілдірче. Оларның чуртазы кӧп кізінине тӧӧй.
Пиӌем кічігдең сығара іӌебіске полысхан, ол палаларның улии полған. Іӌебіс Фёкла Егоровна, тыс пілбин, колхозта хараа-кӱнӧрте тоғынған. Иртен иртӧк тоғысха парчатса, палалары узупчатхан полӌаңнар, ибзер орай айланӌаң, анӌаға узирға чадыбысчаңнар. Аннаңар пиӌеме, кічіг хызыӌахха, туңмаларын кӧрерге килісчең. Пабазының чааға хабылғаны аның сағызында халбаан. Николай Никитич Мастерских 1941 чылда кӧрік айының 2-ӌі кӱнінде Ширадағы военкоматсар хығыртылған. Ол Клим Ворошиловтың адынаң колхозтаң чазағ парған. Ол кӱн чонны поезд чааға апарыбысхан. Николай Никитич чаадаң айланмаан.
Пиҷем Клим Ворошиловтың адынаң колхозтың пасталығ школазын тоосхан. Пасха ааллар ол колхозтаң ырах полғаннаңар, паза ӱгренерге киліспеен.
Олғаннарға кічігдең сығара колхозта тоғынарға килісчең. Оолағастар кӧпен тартчаңнар, хызыӌахтар от тырбаҷаңнар. Кӱскӱзін, ас кисчеткен туста, поомнар палғаӌаңнар, ас арығлаӌаңнар. Хысхызын, тізең, торым паза ас арығлаҷаңнар.
Пиҷем олған тузынаңар чоохтапчатса, хараама чапчаң, ачых-чарых кӧңніліг хызыҷах кӧрінче. Палаларны ниме иттіріп, позы табырах хайынып, сарын сарнап, тоғысты ниик идіп одырчатханы кӧрінче. Ӏҷезі тоғыста полчатханнаңар, туңмаларын ол кӧрӌең.
Мин кічігдең сығара пиҷемнің сӧбірезінде полҷаңмын, палаларынаң хада ойнаӌаңмын. Ӏҷем чох ирте халып, аны iҷее санап, аның хыринда ӧскем. Ол мағаа позының хызына чіли чӧп пирҷең, ӱгреде чоохтаӌаң, кирек полза, кӱрлен тее салӌаң.
Тамара Николаевна - ус холлығ. Ниме идерге сағынып алза, аны толдырбаанда, тыстанминча. Кӧп сидікті кӧрген пиҷем палаларына ам даа полызарға харасча.
Тамара Николаевна паза Гаврил Иванович парчан нимее сыданчалар, мал тутчалар. Хазна полызиинӌа чистеме ниикке чӧрӌең машина, тура аларға ахча пиргеннер. Іди ӧрініс читірчелер. Палалары оларны тастабинчалар.
Тамара Николаевнаны паза Гаврил Ивановичті 67 чыл хада чуртап салғаннарынаң алғыстапчабыс. Гаврил Ивановичті, тізең, 92 чазынаң!
Айға тутхан ибіңер-тураңар
Алтыннаң хурчал турзын,
Кӱнге тутхан ибіңер-тураңар
Кӱмӱснең хурчал турзын,
Тоозылбас чуртыңар ползын,
Ӱзілбес ӱреніңер ползын.
Автор :
Людмила АБДИНА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде