2017 ЧЫЛНЫҢ БЮДЖЕДІ АЛЫЛ ПАРДЫ
21.12.2016
Хабарлар
ХАКАСИЯНЫҢ ӦӦРКІ ЧӦБІНІҢ АЛТЫНӋЫ ХЫҒЫРТИИНЫҢ ДЕПУТАТТАРЫ ИРТКЕН НЕДЕЛЯДА 34-ӌі СЕССИЯА ЧЫЫЛЫСТЫЛАР. СЕССИЯ ТОҒЫЗЫНДА 42 ДЕПУТАТ, РОССИЯНЫҢ ФЕДЕРАЦИЯ ЧӦБІНІҢ КІЗІЗІ - ХАКАСИЯНЫҢ ӦӦРКІ ЧӦБІНЕҢ СЫҒАРЫЛҒАН КІЗІЗІ ЕВГЕНИЙ СЕРЕБРЕННИКОВ, РЕСПУБЛИКА ПРАВИТЕЛЬСТВОЗЫНЫҢ КІЗІЛЕРІ, ОЛ САНДА ХАКАСИЯ ПАЗЫНЫҢ ПАСТАҒЫ ОРЫНӋЫЗЫ ОЛЕГ НАМ ПАЗА ОРЫНӋЫЗЫ, ПРАВИТЕЛЬСТВО АППАРАДЫНЫҢ УСТАҒӋЫЗЫ, ХАКАСИЯНЫҢ ӦӦРКІ ЧӦБІНДЕ ПОЛНОМОЧИЕЛІГ КІЗІЗІ ЛАРИСА КАРАМЧАКОВА, ХАКАСИЯНЫҢ СЫНЫХТАҒ-САНАНЫС ПАЛАТАЗЫНЫҢ, ТАБЫҒ КОМИССИЯЗЫНЫҢ, ЧАРҒЫ ПАЗА ПРОКУРАТУРА КІЗІЛЕРІ АРАЛАСХАННАР. СЕССИЯНЫ АПАРҒАН РЕСПУБЛИКА ПАРЛАМЕНТІНІҢ КНЕЗІ ВЛАДИМИР ШТЫГАШЕВ.
Кибірли Россияның паза Хакасияның гимннері толдырылған соонаң, Владимир Штыгашев мировой чарғыӌы Олеся Кайлачаковаа удостоверение читірген. Анаң чоох тутхан парламент кнезінің пастағы орынӌызы Юрий ІІІпигальских, хайзы "Хрустальный барс-2016" хабарҷылар марииның оңдайларынаңар искірген. Марығ пис аймах номинацияӌа иртірілче. Пӱӱл аның чиңісчілерін 27 декабрьда чеестирлер, че чиңісчінің, Гран-приге турысхан араласчының адын сессияда адапчалар. Юрий Александрович чиңісчіні адаан: "Хакасия" республика газетазы.
Ол "Хрустальный барс" марығның ӧӧн сыйиин - парыстың статуэтказын - холға кирген. Газетаның ӧӧн редакторы Юрий Абумов сыйых алған соонаң теен: "Хакасияның Ӧӧркі Чӧбіне паза Владимир Николаевич Штыгашевке улуғлазыбыстың хыри-пазы чоғыл!" Владимир Николаевич, тізең, "Хакасияның" тоғызы турыстыра полчатханын таныхтаан,
Хакасияның Ӧӧркі Чӧбінің 34-ҷі сессиязының кӱн суриина сығарылған пастағы сурии - Хакасия пазының орынӌызына Иван Вагнернің кандидатуразынаң чаразары полған. Регион устағҷызының орынӌызына кӧрілген кізіні турғызарынаң парламент чаразарға кирек, аннаңар сурығ сессия ӱзӱриине сығарылча. Кандидаттың чуртас чолынаңар паза чидіглерінеңер искірген Лариса Карамчакова. Иван Эрвинович депутаттар алнына сыхханох. Парламент кнезі сурығларнаң айланарға сурынған, че кандидат комитеттернің тоғызында сурығларға нандыртыр. Иван Вагнерні республика пазының орынӌызына турғызарынаң депутаттарның ӧӧн чардығы чарасхан.
Республиканың 2016 чылға, кӧрілген 2017 паза 2018 чылларға бюджедіне алызығларны кирерінеңер закон проектін депутаттар табырах алыбысхан ползалар, 2017 чылның, кӧрілген 2018 паза 2019 чылларға бюджедінеңер закон проекті ікінҷі дее хығырығда илееде ӱзӱрілген. 2017 чылға федеральнай бюджет алыл парғаннаңар, республикаа пирілер ахча сині пілдістіг пол парған. Аннаңар аннаң палғалыстығ алызығлар республика бюджедінің ӧӧн кӧзідіглерінде кӧрілгеннер.
Федеральнай кіннің хабазиинаң, парыстар тиксі 3 миллиард 296 миллион 209 муң салковайға хозылчалар: 840 миллион 700 муң салковай хоза субсидия, 917 миллион азыра салковай бюджет оңдайларын тиңниріне дотация, 1 миллиард 253 миллион салковай субвенсия пирілер. Хорадығлар 2 миллиард 576 миллион 900 муң салковайға хозылчалар, дефицит, тізең, 719 миллион салковайға хызырылча. Андағ оңдайнаң 2017 чылға республика бюджедінің ӧӧн кӧзідіглері мындағ: парыстар - 22 миллиард 372 миллион 453 муң салковай, хорадығлар - 26 миллиард 652 миллион 529 муң салковай, дефицит - 4 миллиард 280 миллион 76 мун, салковай.
Хакасияның финанстар министрi Семён Аёшиннің искіриинең, пӱӱнгі кӱнде федеральнай кінде регионнарға читірҷең ам даа 65 миллиард азыра салковай халған, ол санда наа школалар пӱдіреріне, республика ол ахчадаң 2,5 миллиардча салковай аларға пӧгінче. Амғы туста толдырығлығ ӱлгӱ органнары федеральнай программаларда республика хосчатхан ахча синін хызырарынҷа тоғыс апарча. 2017 паза пазағы чылларға федеральнай программалар республикада мындағ оңдайнаң чуртасха кирілчелер: хорадығларның 87% федеральнай кін пирче, 13% -республика. Пӧгін турча ол чардыхтарны 90 паза 10 проценттерге тиңнирге.
Республика парламентінің кнес орынӌызы, бюджетче паза налог политиказынӌа комитет кнезі Сергей Комаров Хакасияның Ӧӧркі Чӧбінің чарадии хоостыра 2017 кӧрілген 2018 паза 2019 чылларға республика бюджедіне кирілбеен тоғыстарны толдырарынҷа чӧптерні искірген: пенсия фонды алнындағы ӧдісті хызырарға, Саяногорск городтың бюджедін иптир пӧгіннең налог тӧлепчеткен килкім компанияларнаң тоғынарға, хазых хайраллирына паза ӱгредіге хоза хабазығ табарға ("табырах полызығ" машиналарын паза 27 школа автобузын аларына), чоллар пӱдіриине паза пасха кӧстеглерге.
- Піс килчеткен чылға бюджетті алыбыстыбыс, - салтарлар иткен республика парламентінің кнезі Владимир Штыгашев. - Мин Хакасия правительствозының, уламох финанстар министерствозының улуғ тоғызын таныхтирға сағынчам. Олар Россияның Хазна Думазының бюджетче комитедінде паза финанстар министерствозында пістің депутадыбыс Надежда Максимованаң, сенаторларыбыснаң хада-пірге чахсы тоғыныбысханнар паза республика бюджедіне 2016 паза 2017 чылларға федеральнай бюджеттең хоза хабазығ киректелчеткенін киречілееннер.
Бюджеттердеңер закон проекттері алыл парғанда, Семён Аёшин депутаттарны пӱӱл алылған чарадығлар ӱчӱн алғыстаан. Ол чарадығлар Хакасияа федеральнай кіннең хоза хабазығ аларға полысханнар. Чӧптіг тоғыс республикадағы сидік сурығларны пӧгерге чахсы полысча.
Пастағы паза ікінӌі хығырығларда сигіс закон проекті алыл парған, ол санда "Хакасияның чол фондынаңар" законға алызығлар кирердеңер. Закон проекті федеральнай алызығлар хоостыра тимнелген. Аны хоостыра чол тыхтирына пирілген ахча чыл тоозыларына хорадылбаан полза, килчеткен чылда олох кӧстеглерге артызылар. Пу тӱзедігнең прай депутаттар чарасханнар. Олар ізенчелер, алызығлар чол хониин чахсыландырарына полызар тіп.
Пастағы хығырығда ӱс закон проекті алылған. "Организацияларның ис-пайына налогтаңар" республика законының 1 паза 2 статьяларына алызығлар кирердеңер" закон проектін ӱзӱрчеткенде, депутаттар улуғ талазыға кіре халғаннар. Алызығлар кічіг паза ортын бизнестегілернің ис-пайына налог льготаларын алар идінӌектер санын алғыдарына кӧстелген. Пӱӱнгі кӱнде льгота 1000 квадрат метр асчатхан чылдырылбинчатхан ис-пайға кӧрілче, че льготанаң 156 юридическай лицо ла тузаланча. Оларның санын хозар ӱчӱн паза бюджетке хоза налог парыстарын кирер ӱчӱн, ис-пайның улиин 500 квадрат метрге теере тӱзірібізерге чӧптепче Сергей Комаров. Че депутаттарның кӧрістері пасхалалчатханнаңар, закон проектін читіре тимнирге чарадылған.
Январьның сессиязына артыс салғаннар "Хакас Республиканың халыхтар палатазынаңар" законына алызығлар кирерінеңер закон проектінің ікінҷі хығыриин. Республика законына алызығлар федеральнай законға килістіре кирілчелер. Халыхтар палатазының кізілеріне кандидаттар пічиинең ідӧк Хакасияның национальнай паза территориальнай политика министерствозы айғазар. Россияның паза регионнар аразындағы халыхтар пірігістерінің кізілері аразынаң 12 кандидатты Хакасия пазы чарадар, региондағы халыхтар пірігістерінең 12 кізіні - Хакасияның Ӧӧркі Чӧбі. Табылған кізілер халған 12 кізіні орындағы халых пірігістерінең таллирлар. Пуох закон проектінде Хакасияның халыхтар палатазы кізілерінің палата тоғызы хоостыра тоғынчатхан орнынаң пасха орыннарзар чорых хорадығларын айландырары кӧрілче, че ол хорадығларны хайдағ ахчанаң айландырарын пӧгерге халған.
Депутаттар 2017 чылға Хакасияның сыныхтағ-сананыс палатазына чахығлар пир салғаннар: инженер сетьтерін тартарына паза ЖКХ пааларын тӧстирін кӧрерге, хазна садығларын сыныхтирға, кічіг паза ортын бизнеске гранттар пирер оңдайларны алыстырҷаң чӧптер пирерге, имнег киреенде сыныхтағлар иртірерге, ол санда льготалығ имнерні читкіҷе пирерінҷе, ідӧк хай пірее кӧстегліг программаларның чуртасха кирілчеткені сыныхталар. Прай тоғыстар республика бюджедінің ахчазынаң тузалығ паза ӱзӱрлеп тузаланарына кӧстелген.
Сессияның халғанӌы сурии - Хакасияның Ӧӧркі Чӧбінің Хазна Думазының кнезі Вячеслав Володинзер айланызы. Харатас аныӌаң хазна организациялары чох иділгеннеңер, тағӌылар 10 чыл істеніс стажын тоғын полбааннар, аның ӱчӱн хоза пенсия паза тикке хара тас ал полбинчатханнаңар республика парламентінзер Харатастаң, Алтай, Пии паза Ағбан пилтірі аймахтарынаң тағӌы полғаннар удаа айланчалар. "Пу айланыстарға тӧстеніп, оларның праволарын пасхазынаң тиңнир пӧгіннең федеральнай бюджетке алызығларны кирерін маңзырадарға сурынчабыс," - теен республика парламентінің орындағы пос устанысча, халыхтар пірігістерінӌе паза нациялар аразындағы хайызығларҷа комитет кнезі Михаил Саражаков.
34-ӌі сессияны тоозып, Ӧӧркі Чӧп кнезі Владимир Штыгашев депутаттарны 2016 чылда чахсы тоғыныбысхан ӱчӱн алғыстаан паза 2017 чылда ідӧк маңнаныстығ тоғынарға алғаан. Владимир Николаевич депутаттарға Россия президентi Владимир Путин позының айланызында турғысхан пӧгіннерге алынӌа хайығ айландырарға чӧптеен.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде