ПРАЙ СОЦИАЛЬНАЙ ТӦЛЕГЛЕРНІ ТУЗЫНДА ПИРІБІЗЕРГЕ
21.12.2016
Хабарлар
Киҷее Хакасияның пазы Виктор Зимин пастағы орынӌызы Олег Намнаң паза республиканың финанстар министрі Семён Аёшиннең тоғасхан. Тоғыс хоостыра тоғазығ ахча суриина чарыдылған.
- Чыл тоозылча, ахча саринаң чылны ідӧк чахсы тоос саларға кирек, - таныхтаан Виктор Зимин. - Ӧӧн пӧгін - чыл тоозылғанӌа прай алымнарны чабызары.
Чоохтазығ ӧӧнінде бюджет тоғынҷыларының чал ахчазынаңар, социальнай тӧлеглердеңер паза федеральнай объекттернің пӱдіриин тоозарға кӧрілген ахчадаңар парған. Регион устағҷызы пу кӧстеглерҷе ниме иділгенін искір пирерге сурынған.
Хакасия пазының пастағы орынӌызы Олег Намның искіриинең, бюджет тоғынӌыларына ноябрь ӱчӱн чал ахчазы прай тӧлел парған. Амды декабрь ӱчӱн чал ахчазының 60 процентiн аванс оңдайынаң тӧлирі пасталыбыстыр.
Республика устағӌызы муниципальнай пӱдістерде чал ахчазын тӧлирінҷе тудығ полчатханына хайығ салған. Финанстар министрі Семён Аёшин мында республика саринаң полномочиелер прай толдырылған тіп нандырған.
- Пу кӧстегҷе муниципальнай пӱдістерге субвенсия чіли 120 миллион салковай пирері кӧрілген. Пӱӱнгі кӱнге 103 миллион салковай ызыл парған, 17 миллион салковай ызыбызарға халған, - искірген финанстар министрі.
Виктор Зимин социальнай тӧлеглерҷе обязательстволарны хайди даа толдырарға пӧгін турғыс салған. Тиксі социальнай тӧлеглерге чыл тоозылғанӌа 267 миллион салковай киректелер осхас. Республиканың финанстар министрі ол пӧгін толдырылар тіп ізендірген. Федеральнай объекттернің пӱдіриин тоозарына киректелчеткен 60 миллион салковай табыларох осхас.
Хакасияның пазы муниципальнай пӱдістерге позыдылчатхан ахча кӧстеглерҷе хорадыларын сыныхтирға чахып салған. Республика правительствозының пу чылдағы халғанӌы чыылиина Виктор Зимин пуох кӧстеглерӌе хати сан пиріс иділерін сағыпча.
Автор :
Альберт ТОЛМАШОВ Сом Максим АХПАШЕВТИ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде