ПОС ТІЛІН ПІЛЧЕТКЕН КІЗІ - УЛУҒЛАСТА
21.12.2016
Хабарлар
Хакасияның столицазында, Ағбанда, хакас тілін паза литературазын предмет чіли ікі школада тирең ӱгренчелер. Ол 22 паза 24 № № школаларда. Городтағы 22 № школада хакас тілі 25 чыл апарылча. Пу танығлығ пайрамны ӱгренӌілер паза ӱгретчілер ирткен неделяда, 16 декабрьда, таныхтааннар. Пасталығ класстар ӱгретчізі Галина Яковлевна Тюрункина пу школада 23 чыл тіспен істен парир. Ол хакас тілін тилідеріне, ӱгренҷілерге тирең піліс пиреріне паза пос тіліне хыныс тӧрідеріне улуғ хозым итче.
Институт тоосхан соонаң чиит ӱгретчі Асхыс аймаандағы Пирікчул аалда тоғынып пастаан. Ағбандағы 22 № школада хакас класстары азылғанда, городсар істенерге килібіскен. Хайди чоохтапча ӱгретчі, 90 чылларда школада пip ле хакас клазы полған полза паза анда 15-ер ле пала ӱгренген полза, амды хакас класстарының саны хозылча паза полғанында ла 30-ар пала ӱгренче.
- Пастап іӌе-пабалар палаларын хакас клазынзар пирерге хынмаӌаңнар, олар пос тілін ӱгренерге кирексібееннер. Аннаңар школада пip ле хакас клазы полҷаң паза анда асхынах пала утренҷең. Амды сизінерге чарир, іҷе-пабалар, палалары пос тілін ӱгрензіннер тіп, ӧнетін хакас клазынзар кирерге кӱстенчелер. Школада хакас класстары кӧп. Минің кӧрізімнең, амды чуртағҷылар пос тілін пілерге харасчалар. Тӧреен чирінең ырах парыбысса, кізі пос тілін пілзе, ол улуғласта полча нооза. Аннаңар іҷе-пабалар палаларын пос тіліне ӱгредерге кӱстенчелер, - чоохтапча ӱгретчі.
Галина Яковлевна ӱгренҷілерін хакас тіліне, аймах оңдайнаң ӱгредіп, кӧніктірче. Олғаннар ойын пастыра тілні чапчаң ӱгреніп алчатханнарында, урокта пу методнаң удаа тузаланча. Ӱгретчі урокта хакас тілінең не чоохтазарға кӱстенче. Хайди чоохтапча Галина Тюрункина, халғанҷы чылларда, олған садтарында хакас тілі группалары азылып пастаанда, 1-ғы классха
килген палаларның кӧбізі пос тілін пілче.
Пӱӱнгі кӱнде 22 № школада 60 азыра ӱгретчі істенче, оларның 8-зі - хакас тілі ӱгретчізі. Олар - пӧзік категориялығ ӱгретчі Елена Яковлевна Тюкпиекова, хакас кибірлерні паза фольклорны ӧтіре пілчеткен Галина Яковлевна Тюрункина, улуғ опыттығ Людмила Михайловна Мистрикова, чайаачы оңдайлығ Инна Николаевна Карачакова, кӱстіг ӱгретчі Марина Алексеевна Бахтараева, тоғызын ӧтіре пілчеткен Светлана Алексеевна Домогашева. Ідӧк школада чиит ӱгретчілер пар, Любовь Алексеевна Сазанакованаң Инна Васильевна Чепчигашева.
- Пiстің школада кічіг паза ортын класстарда хакас тілін ӱгренчеткен ӱгренҷілернің саны хозылча, - чоохтапча школа директоры Любовь Ивановна Шишлянникова. - 2007 чылда 138 олған полған полза, 2016 чылда 300 азыра ӱгренҷі хакас тілін ӱгренче.
Пайрамнығ кӱнде 22 № школаның хакас тілі ӱгретчілеріне Аарластығ пічіктер паза сыйыхтар читірілген.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде