НИНА КАТАЕВА ХАЗНА СЫЙИИНА ТУРЫСХАН
27.12.2016
Хабарлар
Пу наада Москвада 15 чайаачы усха Россия правительствозының «Россияның чӱрее» хазна сыйии читірілген. Лауреаттарның аразында Хакасия культуразының саблығ тоғынӌызы, «Чон кӧглері» ансамбльның устағҷызы Нина Викторовна Катаева полған.
«Россияның чӱрее» сыйыхты чонның кибірліг культуразына улуғ хозым иткен кізілерге читірчелер. Пістің республиканың чайаачылары мындағ сыйыхты амға теере албаан полғаннар.
Нина Катаева - культура тоғызына пирін салған кізі. Ол чоохтапча: «Пастағы хорны мин, национальнай школада ӱгренчеткенде, тӧстеп алғам. Піс ӱгренҷілернең хада совет сарыннарын толдырӌаңмыс, кӧзідімге, «Комсомольцы-добровольцы» ырны».
Ол туста чииттер дее, улуғлар даа ӧменең тоғынарға хынӌаңнар, аннаңар Нинаӌах тӧстеен хорда 30-ча кізі полған. Таланттығ кізі чииттең сығара турыстыра ӱгредіг алып аларға кӱстенген. Нина Викторовна Хызылчардағы паза Ағбандағы музыка училищелерін тоосхан, анаң пілізін М.И.Глинканың адынаң Новосибирсктегі консерваторияда тиліткен. Композитор кӧп чыллар, ӱгретчі полып, музыка училищезінде паза национальнай школада істенген. Ідӧк ол 25 чыл «Кӱн чахайағы» ансамбльдағы хорнаң устаан. Чайаачы ӧмее Н.В.Катаева кӧп чайаачы тоғыстар пас салған.
1989 чылда Нина Викторовна «Чон кӧглері» ансамбльны тӧстеен, хайзынаң ам даа устапча. «Пу ӧменең мин кӱскӱзін тоғынып пастаам, - сағысха кирче хормейстер. - Ол туста репетициялар Ағбанда ӱгретчілер институдында иртчеңнер. Пастап сарнирға 8-10 на кізі килӌең, че ікі ай пазынаң ӧмеде 25 араласчы полған». Амды «Чон кӧглері» ансамбльда 22 чайаачы, олар хакас чонның кибірліг сарын-тахпахтарын толдырчалар, кӧрігӌілерні чозахтарнаң таныстырчалар. Ӧменің ӧзені Елизавета Чаптыкова, Татьяна Шулбаева, Анатолий Чаптыков полчалар. «Чон кӧглерінің» чайаачыларына ырларны толдырарға полысча музыкант Юрий Беляйкин. Ол баяннаң ойнапча. Ансамбльзар ідӧк чон тиріглерінің ӧмезі кірче. 27 чыл аразына саблығ ансамбль, аймах фестиваль-марығларда аралазып, кӧп хати лауреат атха турысхан.
«Хазна мин иткен тоғысты пӧзік паалапчатханы ӧріністіг, - узаратча чооғын ансамбльның устағҷызы, - Россияда чуртапчатхан полған на чонның культуразы пай, аны хайди даа хайраллирға паза тилідерге кирек». Н.В.Катаеванаң хада «Россияның чӱрее» сыйыхты Марий Эл Республиканың, Забайкальскай крайның, Саратов облазының паза даа пасха регионнарның чайаачылары алғаннар. Чиңісчілернің аразында хормейстерлер, теелбекчілер, ойнаҷахтар итчеткен паза палых теерізінең тоғынчатхан устар полғаннар. Улуғ чидігнең лауреаттарны Россияның культура министрінің орынҷызы Александр Владимирович Журавский алғыстаан. Ол культура тоғынӌыларына диплом, аарластығ знак, ӧнетін паза ахчалығ сыйых читірген. Мероприятиенің ікінӌі чардығында гала-концерт ирткен, хайзында чайаачыларынаң М.Е. Пятницкийнің адынаң орыс чон хоры паза Игорь Моисеевтің адынаң чон теелбектерінің ансамбльы ӧріндіргеннер. Ідӧк пайрамда Дагестан, Тува, Саха (Якутия) республикаларның ӧмелері араласханнар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде