БИБЛИОТЕКАДА КИНДЕЕ ХЫНЫС ТӦРІПЧЕ
28.12.2016
Хабарлар
Пӱӱнгі кӱнде библиотека парынаң полған на аал махтан полбас, уламох кічіг ааллар. Республика ӱлгӱлері кічіг аалларны хайығ чох артыспинчалар, мобильнай библиотека тӧстеп, хығырарға хынчатхан чуртағӌыпарға аймах кинделер читір пирчелер. Сала улуғ арах аалларда хаӌаннаң ала библиотекалар тоғынча. Андағ аалларның пірсі - Оот пилтірі. Тӧӧ суғ хазындағы аалда библиотека 45 чыл мының алнында тоғынып пастаан.
Ирткен неделяда библиотека пайрамын таныхтаан. Аалдағы улуғ нимес Культура туразынзар аалӌылар илееде чыылыс парған. Улуғ аалӌылар аразында полғаннар Хакасия пазының полномочиеліг кізілері Михаил Побызаков паза Татьяна Раменская, "Хабар" газетаның хабарҷылары: ӧӧн редакторның орынҷызы Альберт Толмашов, спорт паза культура пӧлии редакторы, писатель Анатолий Султреков, экономика пӧлии редакторы Наталья Субракова, сайт редакторы, поэт Сергей Майнагашев. Ідӧк Асхыс аймааның культура устанызының пастығы Келемана Барашкова, М.Е.Кильчичаковтың адынаң ӧӧн библиотека устағҷызы Зинаида Токоякова, "Алтынай" хакас ипчілер лигазының кізізі Наталья Топоева паза "Аскизский труженик" аймах газетазының редакторы Мира Беспоместных.
Чоохтирға кирек, аалӌыларның кӧбізі аалдағы библиотека пайрамын алғым таныхтапчатханын пастағызын на кӧрчеткенін таныхтаан. Кирек пастағҷызы, тізең, библиотекарь Вера Албычакова полча. Ол библиотекада 1983 чылдаң істен парир. Устағӌылар, хада тоғынчатхан арғыстары паза чуртағӌылар Вера Васильевнаның ӧткін хылиин махтааннар. Аалдағы библиотека Культура туразында орныхча, аннаңар аның устағҷызы Валентина Тюмерекованың ӧӧн полысчыларының пірсі Вера Албычакова полча. Аал чӧбіндегілернің дее чооғынаң, Вера Васильевназар пірее сурыныснаң айланза, ол аны нандырығлығ толдырча. Тиктең нимес ӧткін ипчіні орындағы депутатха таап турғаннар.
Михаил Побызаковнаң Татьяна Раменская, Хакасия пазы Виктор Зиминнің чахиин толдырып, Вера Албычаковаа, хығырығӌылар паза ӧткін чуртағҷылар Герберт паза Николай Побызаковтарға, "Солбан" кибірліг культура кінінің директоры Людмила Боргояковаа паза Оот пилтіріндегі Культура туразының устағӌызы Валентина Тюмерековаа республика правительствозының алғыстазын читіргеннер.
- Мин библиотеказар тоғынарға килгенімде, мында пір дее ниме чох полған, - сағысха кирче тоғыс чылларын пастағы библиотекарь Светлана Кичеева. - Ол туста минің ӧӧн тоғызым клубнаң устиры полған. Клуб туразында одырчыхтар даа чох полған, соонаң ниме-ноолар кӧместең алылған.
17 частығ хыс пу тоғыста ӱр тудылбаан, аның орнына Сталина Тюмерекова килген. Ол 1977 - 1983 чылларда істенген. Сталина Николаевнаның чооғынаң, библиотекада тоғынарға сидік полбаан. Книгаларны аймах кінінең постары автобустығ ағыл турӌаңнар. Анаң пу тоғысха килген
Вера Васильевна. Пӱӱнгі кӱнге теере ол олғаннарны паза чуртағӌыларны хығырарға кӧӧктірче. Школа Культура туразы кистінде орныхчатханда, олғаннар уроктар соонаң библиотеказар кірчелер. Улуғлар даа библиотека ізиин соотпинчалар. Аймахтын, ӧӧн библиотеказының устағ-пастаа Вера Албычакованың полызиинаң иң удаа хығырчатхан чуртағӌыларға алғыстас пічіктерін читірген, ол санда олғаннарға.
"Хабар" республика газетазы адынаң библиотеканы 45 чылынаң алғыстааннар Альберт Толмашов, Анатолий Султреков паза Сергей Майнагашев. Устағ-пастағ адынаң чылығ сӧстер алғап, Альберт Иванович библиотека 10 мун, салковай читірген. Редакция тоғынҷылары кӱстенізінең библиотека фондына 80 азыра кинде, журналлар, ол санда хакас тілінең литература сыйлалған. Алынӌа кинделерні читіргеннер пістің саблығ писательібіс, Хакасия культуразының саблығ тоғынӌызы Анатолий Султреков паза поэт Сибдей Том. Полған на сыйыхха аалӌылар паза библиотека устағ-пастаа ізіг айа саап турғаннар. Анаң Сибдей Том Моисей Баиновтьщ тахпаан паза позының сарынын, хомыснаң ойнап, толдыр пирген.
Сыйыхтар мыннаң тоозылбаан, постарының алғастарын библиотекарьнаң хада тоғынчатхан арғыстары, культура тоғынӌылары читіргеннер. Аарлығ сыйыхтар ӱчун библиотекарь аалҷыларны алғыстаан, уғаа чылығ чоохтанған «Хабар» газетадаңар. Тоң хакас аалындағы чонны пос газетазының хабазии чӧпсіндірче.
Киндені холда тутханын, аны хынып хығырғанын чуртағӌыларға пір дее нименең алыстыр полбассың. Библиотекарьның алнында улуғ тоғыс - олғаннарны кічігдең хығырарға кӧніктірерге. Пу кирекке кічігдӧк тартпазаң, соонаң хайдағ даа аарлығ сыйыхнаң, хай син дее ахчанаң хындыр полбассың. Оот пилтіріндегі библиотека, пу тоғызын 45 чыл маңнаныстығ толдырып, сағынчам, мыннаң мындар даа ідӧк ле тоғынар.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде