ВИКТОР ЗИМИН: «АМДЫ ПІС СИДІК ТЕЕ ОПЕРАЦИЯЛАРНЫ ИТ ТУРАРБЫС»
18.01.2017
Хабарлар
ХАКАСИЯА 2016 ЧЫЛ УЛУҒ ПӰДІРІГЛЕРГЕ ПАЙ ЧЫЛ ПОЛҒАН ТІЗЕ, САБА ПОЛБАС, НЕКЕ. ИРТКЕН ЧЫЛДА НАА МУЗЕЙ-КУЛЬТУРА КІНІ ПАЙРАМНИ АЗЫЛҒАН, ШКОЛАЛАР ПАЗА ОЛҒАН САДТАРЫ КӦП ПӰДІРІЛГЕННЕР ПАЗА ДАА ПАСХАЗЫ. ПОЛҒАН НА КІЧІГ АЛАЙ БА УЛУҒ ПӰДІРІГНІ ХАКАСИЯ ПАЗЫ ВИКТОР ЗИМИН ТӦРЕМІЛ ПОЗЫНЫҢ ХАЙИИНДА ТУТХАН. АҒБАНДАҒЫ Г.Я.РЕМИШЕВСКАЯНЫҢ АДЫНАҢ РЕСПУБЛИКАНЫҢ ИМНЕГ ТУРАЗЫНЫҢ ХИРУРГИЯ КОРПУЗЫ ІДӦК ИРТКЕН ЧЫДДА ПАЙРАМНИ АЗЫЛҒАН. 20 МУҢ АЗЫРА КВАДРАТ МЕТРДЕ АМДЫ ИМНЕГ ОБОРУДОВАНИЕЗІН ТУРҒЫЗАР ПАЗА ИРГІ КОРПУСТАҢ НАА КОРПУССАР КӦЗЕР ТОҒЫСТАР ПАРЧА. ПУ НЕДЕЛЯДА ХАКАСИЯНЫҢ ПАЗЫ ВИКТОР ЗИМИН ТОҒЫС ХАЙДИ ПАРЧАТХАНЫН СЫНЫХТААН.
ИМӋІ-НЕЙРОХИРУРГ ЕВГЕНИЙ КИМ ХАКАСИЯДА ИРТКЕН ЧЫЛДАҢ ТОҒЫНЧА. ОЛ, НАА КОРПУСТА ТОҒЫНҒАЛАХ ТАА ПОЛЗА, НАА ОБОРУДОВАНИЕНЕҢ АМОХ ТАНЫСЧА.
Сынап таа, наа хирургия корпузы имнег учреждениезіне пip дее тӧӧй нимес. Совет тузында пӱдірілген учреждениелер удур-тӧдір тӧӧйлер: ніске коридорлар, кічіг палаталар паза даа пасхазы. Наа корпуссар кірзеңӧк, аймах ӧзімнер паза хакас орнаменттерінең чазалған хоостар харахха тасталча. Учреждениенің пастағы хадылында урология пӧлии орныхча. Процедуралар иртірӌең кабинеттерде ӧнетін столлар, раковиналар турғызылых, хайзылары имӌее тоғынарға ниик оңдай пирче. Пӧліктің ортызында имненчеткен кізілерге тынанӌаң, чоох алысчаң орын кӧріл парған. Анда телевизор даа кӧріп аларға чарир полар. Таныхтирға кирек, мындағ орыннар корпустың полған на хадылында пар.
Имнег учреждениезінің ӧӧн имӌізі Владимир Семёнов Хакасия пазы Виктор Зиминні, Хакасияның хазых хайраллаӌаң министрі Наталья Коганны паза даа пасхазын имнег учреждениезінзер иртірче. Реанимация пӧлии 2-ӌі хадылында орныхча. Пір блокта 6-7 орған кӧріл парған, полған на блокта алынӌа пост. Орғаннар прайзы наа паза амғы чуртасха килістіре. Полған на орған хыринда медсестраны хығыртчаң кнопка пар.
3-ӌі хадылында травматология паза ортопедия пӧлии орныхча, 7-ӌізінде операционнай блок паза халғанӌызында - административнай блок паза семинарлар иртірӌең 200 орынға конференц-зал. Полған на хадыл чарых, сіліг паза истіг. Г.Я.Ремишевскаяның адынаң республиканың имнег туразының хирургия пӧлиинің улуғ медсестразы Марина Демьянова наа корпусха ӧрінче.
- Хирургия пӧлиинің иргі корпузында имӌілерге дее, имненерге килген чонға даа тарғынҷах полӌаң. Имнег учреждениезінің тоғынӌыларына кізілерні операцияа апарарға паза операциядаң ағыларға удаа килісче, коридорлар паза палаталар кічіг полғаннаңар, тоғыс аар парӌаң, аннаңар имнег учреждениезінің тоғынӌылары наа корпус азыларын чидікпин сахтааннар. Піс, улуғ городтағы имӌілер чіли, ідӧк сіліг, чарых паза наа оборудованиеліг имнег учреждениезінде тоғынарға хынғабыс. Амды ол пістің пар, - кӧңнінең ӱлесче Марина Дмитриевна.
2016 чыл тоозылчатханда, корпуссар администрация пӧлии кӧскен. Олар корпустың 8-ӌі хадылындалар. Амды корпуста операционнай блоктарда вентиляциялар тартар тоғыс тоозылча. Анаң хирургия корпузы кӧӧлӌе наа корпуссар кӧзіп пастир. Иң пастап реанимация кӧзірілер.
- Пӱӱл федеральнай бюджеттең хирургия корпузына 200 миллион салковай пирілер. Ол ахчаа 2 операционнай блокка оборудование алылар. Аның соонаң наа корпуссар травматология-ортопедия паза нейрохирургия пӧліктері кӧзерлер. 2016 чылда алылған имнег оборудованиезінең пасха, ідӧк иргі корпустағы оборудование кирілер. Олар ідӧк прайзы чахсы тоғынчалар, - чоохтапча Хакасияның хазых хайраллаӌаң министрі Наталья Коган.
Нейрохирург Евгений Ким Хакасиязар ирткен чылда тоғынарға килген. Ол ідӧк наа корпуста тоғынарын чидікпин сахтапча паза наа оборудованиее ӧрінче.
- Наа корпуста имӌілерге имнирге, чонға, тізең, имненерге прай оңдайлар пар. Улам операция итчең блоктар ӧріндірче. Имнег учреждениезінде операция иртірӌең пӧлік иң чахсы поларға кирек, аннаң операция хайди иртері палғалыстығ нооза. Наа, амғы тусха килістіре оборудование парда, кізінің чуртазын хайраллап халар оңдай ӧс парча. Мының алнында кирек оборудование чохтаңар, хай пірее операцияны идерге оңдай чох полӌаң, кізілерні Хызылчарзар алай Новосибирсксер ысчаңмыс, амды, тізең, пістің позыбыстың оборудованиебіс парда, сидік тее операцияларны мында ит турарбыс. Операциялар иртірӌең специалисттер чидісче. Амды Г.Я.Ремишевскаяның адынаң республиканың имнег туразында 4 нейрохирург тоғынча паза городтағы имнег туразында нейрохирургтар пар. 2018 чылда хоза пip специалист сахтапчабыс. Амды ол ординатурада ӱгренче, - чоохтапча Евгений Валерьевич.
Евгений Ким ирткен чылда сӧбірезінең хада Тувадаң Хакасиязар тоғынарға паза чуртирға кӧс килген. Республика ағаа чурт пирген.
Таныхтирға кирек, наа корпусты Хакасияның правительствозы 2011 чылда чир тітіреен соонаң пӱдірерге чарадығ алған. Республикаа федеральнай кін чахсы хабас пирген.
- Сынап таа, пӱдіріг тоғызы пасталғанда, ол мындағ сіліг паза амғы тусха килістіре поларынаңар сағынмаабыс таа. Че, хайди піс кӧрчебіс, тоғыс иділ парған, наа корпус тӱрчедең кізілерні имнеп пастир. Мындағ имнег учреждениезін Хакасияның чуртағӌылары ӱр сахтааннар. Амды піс сидік тее операцияларны ит поларбыс, - таныхтаан Виктор Зимин.
Автор :
Оксана СУНЧУГАШЕВА Сом Максим АХПАШЕВТИ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде