НАА ОБЪЕКТТЕРНІ ТУЗАЛАНЫСХА КИРЕРГЕ, НАА ПРОЕКТТЕРНІ АРАЧЫЛИРҒА
18.01.2017
Хабарлар
Киҷее Хакасияның пазы Виктор Зимин правительствоның пу чылдағы пастағы чыылиин иртірген. Регион устағҷызы министрлерге ирткен чылда тӱзімніг тоғыныбысханнары ӱчӱн алғызын читірген паза пасталыбысхан чылға наа пӧгіннерні турғысхан.
Чыылығ алғыстастарнаң пасталған. Хакасияның пазы Виктор Зимин ікі чиит ученайға ахчалығ сыйыхтар читірген. Наукадағы чидіглері ӱчӱн, правительствоның «Чиит істезігӌі» ахчалығ сыйиина ХГУ-ның доценті, философия наукаларының кандидады Юрий Аксютин (150 муң салковай) паза ХГУ-ның аспиранты Алексей Евдокимов (50 муң салковай) турысханнар.
Виктор Зимин чииттерге хабазарынҷа республикада улуғ тоғыс иділчеткенін таныхтаан. Чоох ӧӧнінде чир участогын тикке пирчеткен программадаңар парған. Чиит сӧбірелер паза специалисттер ол программаа кірчелерӧк нооза. Регион устағӌызы, 2017 чыл Хакасияда чииттерге чарыдылчатханын таныхтап, министрлер кабинедіне февраль пасталарына пу кӧстегӌе пірге тоғыс апарӌаң планны тимнеп саларға чахып салған.
Хакасияның пазы прай министрлерге ирткен чылда тӱзімніг тоғыныбысханнары ӱчӱн алғызын читірген. 2016 чыл республикаа улуғ объекттернің пӱдірии тоозылғанынаң танығлығ полған. Ол музей-культура кіні, республиканың имнег туразының наа корпузы паза перинатальнай кін. Пу чылда, тізең, ол наа объекттерні тузаланысха кирібізерге кирек тіп таныхтаан Виктор Зимин.
Ідӧк ирткен чылда наа школалар пӱдірілген паза кӧп школаларда тыхтағ тоғыстары толдырылған.
- Санапчам, турыстығ тоғыныбысхабыс. Кӧбізі объекттерде позым пол килгем - ол Катановтағы паза Ис пилтіріндегі наа школалар, ідӧк Гайдаровсктағы нааӌылалған школа. Чағынғы туста Хызыл хара суғдағы школазар пар килерге пӧгінчем, анда тыхтағ тоғыстары тоозыл парған, - теен Виктор Зимин.
Пасталыбысхан чылға наа кӧстеглер турғызылғанох. Оларның пірсі - Ағбанда пір муң орыннығ наа школа пӱдірері. Хакасияның пазы, федеральнай программада аралазып, аның пӱдіриине ахча табарға пӧгін турғысхан.
Ідӧк регион устағӌызы республика тилізінең палғалыстығ проекттерні федеральнай синде арачылирға киректелчеткенін таныхтаан. Оларның аразында иң улуғ проект транспорт логистиказынаң палғалыстығ. Аны хоостыра республиканың улуғ промышленность предприятиелерін, ол санда хара тас аныпчатхан разрезтерні, тимір чолнаң палғалыстыр салары кӧрілче.
- Чоох парча онарлап миллиард салковайдаңар, - искірген Виктор Зимин.
Пу сурығӌа Хакасияның пазы Москвада федеральнай министрлернең нинӌе-де тоғазығ иртіртір. Пілізіс пар, че ол сурығӌа ам даа тоғынарға, проектті арачылирға кирек тіп таныхтаан ол.
Ідӧк Виктор Зимин федеральнай синде республикаа 800 миллион салковайға ахчалығ полызығ пирердеңер азынада чӧптезіг иділгенінеңер искірген. Ол ахча наа имнег корпузына кирек оборудование аларына парар.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде