ЧИР-ЧАЙААНЫ ХАЙРАЛЛИР ПӦГӀННЕР
20.01.2017
Хабарлар
Хакасияның пазы Виктор Зимин республиканың чир-чайаан ис-пайы паза экология министрі Алексей Сиорпаснаң тоғасхан. Чоохтазығның ӧӧн сурии - тиксі хазнада чарлалған Экология чылын таныхтиры, чир-чайаанны хайраллир пӧгіннерні толдырары.
- Пӱӱлгі чыл Россияда Экология чылы тіп чарлалған. Хакасия ол чӧрімнең хыйа турбасха кирек. Сӧп-сапты чарадылбинчатхан чирлерде тӧкчеткенін чох идері, киині паза ісчеткен суғны арығ тудары, арығның паза ибіркінің ис-пайын хайраллиры - мына нимее ӧӧн хайығ айландырча Владимир Путин, - таныхтаан Хакасияның пазы Виктор Зимин. - Хакасияа экология сурии ӧӧн сурығларның пірсі полча. Пу тоғыс хоостыра асхынах сурығ пирілерге, че оларны пӧкчең кӧп оңдайлар поларға кирек. Ол сылтағнаң ӱр чылларға толдырылар программа тимнелзін. Уламох килер чылларда промышленность хайди табырах тилирін пілчебіс. Сӧп-сапты тузында арығлиры, ибіркіні хайраллиры сыбыра пістің хайиибыста поларға кирек. Экология суриина ӧӧн хайығ айландырарын ундутпасха.
Чоохтазығ тузында тастандыларны чох идеріне хайығ айландырылған. Хакасияның чир-чайаан ис-пайы паза экология министрі тастандылар хоостыра федеральнай закон халғанӌы 16 чыл аразында пір дее алыспаанын искірген. Халғанӌы туста ла ол закон саңай алыс парған, Россия Федерациязының алнында уғаа нандырығлығ пӧгіннер турча.
- Анда тастандыларны алынӌа чыырдаңар чоохталча. Аннаңар піс республиканы пис алынӌа пӧлікке чарыбысхабыс. Полған на пӧлікте тастандыларны чығӌаң орыннар пар. Оларны хазна реестріне кир салғабыс. Анзы ахча ӱзӱрлирге полызар. Полған на аймахта орыннар тимде, - чарытхан Алексей Сиорпас.
Аның сӧстерінең, пістің республикадағы сӧп-сап чон хазиина паза чир-чайаанға хорғыс ағылбинчатхан пизінӌі классха кірче. Анзын Россия министерствозының сыныхтаа киречілеен. Ідӧк тоғазығ тузында ибіркіні, чир-чайаанны хайраллир пасха даа сурығларға теелгеннер.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде