ГРИГОРИЙ КРАСНОВТЫҢ ХАЙХАСТЫҒ ХООСТАРЫ
20.01.2017
Хабарлар
Пу неделяда «Чылтыс» кӧзідіг залында Россияның саблығ хоосчызы Григорий Красновнаң тоғазығ ирткен. Чайаачы усты истіп аларға илееде кізі чыылысхан. Мында ХГУ-ның искусство институдының студенттері, хабарҷылар, Ағбанның чуртағҷылары полған.
Тоғазығ Григорий Степановичтің «Пурунғыларыбыс чирі» тоғыстарының кӧзідиине чарыдылған. Килген чонны саблығ ус позының чайаачы тоғызынаң таныстырған.
Кӧзідіге 50 артиинаң хоос сығарылтыр. Оларны Г.С.Краснов аймах техникада чайаан. Сизінгенде, 1970 - 1980 чылларда хоосчы графиканаң айғасхан, халғанҷы туста ол ӧӧнінде хайах сырларынаң тузаланчаттыр. Хайди таныхтаан Григорий Степанович, анзы сынап андағ. Ол чоохтаан: «Графика - минің пастағы хынызым. Тушьнаң хоостарны чайирға минің кӧңніме тың кірҷең. Сағынғам, графиканаң прай чуртазым айғазарбын. Че улуғланыбысханда, харахтарым уйан кӧр сыххан». Ирік чох Григорий Красновха пасха техникада тоғынарға киліскен. Пастап ол акварельнең хоостирға ӱгренген, амды, тізең, хайах сырларынаң чайапча.
Чиит туста саблығ кізі реализм кӧстегҷе тоғынған. Аның 1970 - 1980 чыллардағы хоостарын кӧріп, мин олған тузымны сағысха кир килгем. Пістің дее аалда ипчілер «Аалда иртен» хоостағы чіли турып алып чоохтасчаңнар. Кип-азахтары даа тӧӧй. «Соперницы» тоғыста оол-хыстар кӧзіділ парғаннар. Олар малда істенчеткен іҷе-пабаларына полысчалар, неке.
Амды Григорий Степановичке «неомифологизм» алай археоарт жанр чағын. Археоартта тоғынчатхан устар, пурунғы культураа тӧстеніп, хоостарын чайапчалар. Аннаңар Г.С.Красновтың тоғыстарында хайа хоостарын, кӧзеелерні, окунев эпохазының омаларын кӧрерге чарир. Андағ оңдайнаң «Пурунғы Худай», «Прай ниме кӧрчеткен», «Чааҷының алғааны» паза даа пасха хоостар чайалғаннар. Олар Хакасия пурунғы хумартхы тастарға пай чир тіп таныхтапчалар. Ідӧк мында пасха чоннарның пай тархынына чарыдылған тоғыстар пар. «Хуттарның чирінзер» хооста, минің кӧрізімнең, пурунғы гректернің «Алтын руно» кип-чооғы кӧзіділ парған. «Чаалазыға» адалчатхан хооста, тізең, мин орыс чонның нымахтарындағы Змей Горынычты танып салғам. Итсе, Григорий Степанович минің сағыстарымнаң чараспаан.
Кӧбізінің хайиин «тоозылбас чуртастың учуғызы» хоос тартхан. Ол ӱс чардыхтаң пӱткен. Алтында чиис тимнепчеткен ипчі одырча, аның хыринда чуртас ағазы ӧсче. Ікінҷі чардығында хуттар кӧзіділ парғаннар. Ӱзiнҷізінде - ӱс морсымнығ атха мӱніп алып худай учух парир. Ырахта тибелернің караваны паза хакас ибіҷектер хоостал партыр. Г.С .Красновтың чооғынаң, пу тоғыста ол чуртастың ағынын кӧзіт пирерге пӧгінген.
Кӧзідігде ідӧк чир-чайаанға чарыдылған хоостар пар. «Хысхы чағдапча», «Талай, талай», «Астраларнаң хада натюрморт», «Хысхы» хоостары кӧрігҷілернің кӧңніне кіргеннер.
Григорий Степановичтің тоғыстары хайхатчалар, сағысха тӱзірчелер. Оларны пір хати кӧріп алзаң, хаҷан даа ундубассың. Россияның саблығ хоосчызының «пурунғыларыбыс чирі» кӧзідиинең танызарға маңзыраңар, ол 22 январьға теере тоғынар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде