Анатолий Серафимович УГДЫЖЕКОВ.
24.01.2017
Хабарлар
Хакас чиріне, Угдыжековтар родына улуғ хомзыныс - ах чарыхтаң кинетін не парыбысты саблығ журналист, «Хакас чирі» газетаның ӧӧн редакторы полған Анатолий Серафимович УГДЫЖЕКОВ.
Ол 1946 чылда 12 февральда Асхыс аймаандағы Чоғархы Асхыс аалда тӧреен. Ағбандағы национальнай школаны тоозып, істеніс чолын пастаан. Анаң армия, Амыр тиңістің Чаа-Талай флодының суғ алтында чӱс чӧрчеткен атом кимеде 3 чыл служба ирткен. Тӧреен чирінзер айланып, Ағбандағы ӱгретчілер институдынзар кірібіскен. Аны 1975 чылда тоозып, «Ленин чолы» газетада хабарҷы полып тоғын сыххан. Чииттер пӧлиинең, анаң партийнай пӧлікнең устаан. 1987 чылда Новосибирсктегі пӧзік партийнай школаны тоосхан. 1996 чылда редакцияның тоғынӌылары аны «Хакас чирі» газетаның ӧӧн редакторына тапханнар. Тынаға сыхханӌа ол пастых тоғызын толдырған. СССР-ның Журналисттер пірігізінің члені, Хакас Республика культуразының саблығ тоғынӌызы полған.
Анатолий Серафимович уғаа чағбан, аллығ чӱректіг кізі паза устағӌы полған. Хада тоғынчатхан арғыстарының, туған-чағыннарының ӧріністері - аның ӧрінізі. Ідӧк сидік тустарда прайзынаң хада хомзынӌаң паза чобалӌаң. Хаӌан даа сын кирек ӱчӱн турызарға, редакция тоғынӌыларын хыйыхтатпасха харасчаң. «Пастап мин тоғыстаңар, чонымнаңар сағынчам, анаң на - позымнаңар», - пірееде чӱреен асчаң хада тоғынчатхан нанӌыбыс, пастығыбыс.
«Хакас чирінің» ӧӧн редакторы полчатханда, Анатолий Серафимович Угдыжеков республиканың халых-чарыдығлығ чуртазында ӧткін араласчаң. Пістің чонның теестегі съездтерін тимнирі хайди парчатханын, кемнер хайдағ полызығ пирчеткенін газетада прай сығарып, хығырығӌыларны хайди даа таныстырарға кирек тіӌең. Анаң, съезд ирт парза, анда хайдағ чарадығлар алылғанын чарытчаң, ол-пу таластығ сурығлар хоостыра позының сағыстарынаң ӱлесчең. Кӧні чоохтығ кізі хайдағ даа сурығларны пӧгерге кӱстенӌең.
Ідӧк ол іӌе сӱдінең пирілген тілібісті хайраллап халарына, аны тилідеріне улуғ хайығ айландырӌаң. Пу сурығ хоостыра пістің газетада пірее хати хазыр талазығлар пасталыбысчаңнар, «тегілек столлар» иртірілӌеңнер. Халыхтар пірігістері тӧстеен, анаң пик азахха турып алған «Ине тілі» чӧрімнең нинӌе-де чыл изере редакция устаан. Анатолий Серафимович пу сурыға улуғ хайығ айландырӌаң, пу чӧрімнің тӱзімін сыбыра сыныхтағда тутчаң. Республика синінде иртчеткен ӱгренӌілер аразындағы марығны пӧзік синде иртіреріне, аның тузазын кӧдіреріне улуғ хозым иткен кізі тіп санирға чарир.
Тӧреен-ӧскен чиріне, алынӌа кізілерге туза ағылғаны илбек. Ӧкістің ӱчӱн ӧзі ачыӌаң, полыс пирерге харасчаң. Газетаның хығырығӌыларына сын, орта хабарлар читірерге кӱстенӌең, аймах-пасха тузалығ чӧптернең полызығ пирілӌең. Ол устағӌы полчатханда, иреннерге «Мирген», ипчілерге «Абахай» ӧнетін сығарыстар тимнелӌеңнер. Хай пірее таластығ сурығлар хоостыра хынығ, олох арада тузалығ ӱзӱріг-талазығлар илееде парыбысчаң.
Піс Анатолий Серафимовичтің сӧбірезінең, аның туған-чағыннарынаң улуғ хомзыныснаң ӱлесчебіс. Хада тоғынған арғызыбыстың чарых омазы пістің чӱреебісте саңайға халар.
Анатолий Серафимович Угдыжековнаң 24 январьда Ағбанда Кожевеннай, 28-а орамада 9.00 -10.00 часта анымӌохтазып аларға чарир. Анаң аны тӧреен аалында, Чоғархы Асхыста, тӱгенӌі чолға ӱдезерлер.
«Хабар» газетаның тоғынӌылары
******
Ах чарыхтаң парыбысты Хакасия культуразының саблығ тоғынӌызы, журналистиканың ветераны Анатолий Серафимович УГДЫЖЕКОВ.
Анзына киртінерге дее сидік, піс ирткен чылда ла аның 70 чазын алғым таныхтап, наа пӧгіннердеңер чоохтасхабыс. Чуртазына ол ӧрінчеткен. Чахсы журналист, ачых-чарых кӧңніліг паба паза аға. Хайди тың ӧрінді, оолағас пархаӌағы тӧреенде.
Анатолий Серафимовичтеңер ирткен туста пазарға хол кӧдірілбинче. Ол хаӌан даа піснең хада полар, туған-чағыннарының, нанӌы-арғыстарының чӱреенде чуртир. Сидік 1990 чылларның ортызында «Хакас чирінің» ӧӧн редакторына табылған, чайаачы ӧменең піліп устаан, чиит хабарӌыларны саблығ устарға читіре ӧскір салған. Андада «Хакас чирі» тиксі республикада махтаға сыхчаң.
Аның чахсы киректерін чон ундутпас, адын адап чӧрер. Аның кӧңні тоғысха прай пирілген, хараа-кӱнӧрте тынағ чох тоғынған... тоғынған. Іди халғанӌы тынысха читіре.
Аарлығ Анатолий Серафимович, хаӌанға даа пістің чӱреебісте ах сағыстығ халарзың.
Ольга ШИРКОВЕЦ, Россияның Журналисттер пірігізінің Хакасиядағы пӧлиинің кнезі
Автор :
"Хабар"
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде