ТАЛАНТТЫҒ ЧИИТ ХЫСТЫҢ - РЕСПУБЛИКАА АЛҒЫЗЫ
24.01.2017
Хабарлар
ИРТКЕН ПОЗЫРАХТА, 22 ЯНВАРЬДА, В.Г.ЧАПТЫКОВТЫҢ АДЫНАҢ ХАКАС ФИЛАРМОНИЯЗЫНЫҢ УЛУҒ ЗАЛЫНДА ПОС ОРЫН ЧОХ ПОЛҒАН. КӦРІГӋІЛЕР «АЛЬТЕРЭГО» ДУЭТТІҢ ОЙЫНЫН КӦРІП АЛАРҒА КИЛГЕННЕР. ЧАЙААЧЫ ӦМЕЗЕР КІРЧЕЛЕР ПІСТІҢ ЧИР-СУҒӋЫБЫС АНАСТАСИЯ СУБРАКОВА (СКРИПКА) ПАЗА МУЗЫКАНТ ИЛЬЯ ЛЕХАНОВ (ФОРТЕПИАНО).
АНАСТАСИЯ АМДЫ ШВЕЙЦАРИЯДА ЛОЗАННАДАҒЫ ПӦЗІК МУЗЫКА ШКОЛАЗЫНДА УЗЫН ТИЛІТЧЕ. ХЫРЫҒ ОЗАРИНДА ӰГРЕНЕРГЕ ЧИИТ ХЫСХА ХАКАСИЯНЫҢ ӰЛГӰЛЕРІ ПОЛЫСЧАЛАР. ІКІ ЧЫЛ МЫНЫҢ АЛНЫНДА ОЛАР АНАСТАСИЯА ЧАХСЫ СКРИПКА АЛ ПИРГЕННЕР. ТАЛАНТТЫҒ МУЗЫКАНТ ТӦРЕЕН ЧИРІНЕҢ ПИК ПАЛҒАЛЫС ТУТЧА, ЧЫЛ САЙ, РЕСПУБЛИКАЗАР КИЛІП, ОЛ КОНЦЕРТТЕР КӦЗІТЧЕ.
ПРЕСС-КОНФЕРЕНЦИЯ
Концерт алнында «АльтерЭго» дуэттің араласчылары хабарҷыларнаң тоғасханнар. Пресс-конференция Хакасияның культура министерствозында 20 январьда ирткен. Пастап сӧс алған Настя Субракова. Ол Хакасияның пазы Виктор Зиминге, Ӧӧркі Чӧптің кнезі Владимир Штыгашевке, республиканың культура, транспорт паза чол хонии министерстволарына полызығ ӱчӱн улуғ алғызын читірген. Анаң чиит чайаачы пӱӱнгі чидіглерінеңер хысхаӌахти чоохтап пирген:
- Швейцарияда мин тӧртінӌі чылы ӱгренчем, концерттер хазнаның аймах городтарында иртчелер. 2016 чылда мағаа Бернде паза Цюрихте ойнирға киліскен. Ирткен чылдох піс пианист Илья Лехановнаң «АльтерЭго» дуэт тӧстеп алғабыс. Сценаа пістің дуэт пастағызын на Швейцариядағы Сион городта иртчеткен чоннар аразындағы фестивальда сыххан. Анаң узыбысты Италиядағы Кремонада камернай ансамбльларның чоннар аразындағы мариинда кӧзіткебіс. Анда піске ӧнетін сыйых читірілген. Амды Хакасиязар ойыннаң килгебіс.
Ідӧк Настя хабарҷыларнаң таңдағызына пӧгіннерінең ӱлескен. Пӱӱл ол магистратуразар кірерге пӧгінче, часхызын сыныхтағлар иртер. Анаң чир-суғӌыбыс музыкант Илья Лехановнаң таныстырған.
Илья Челябинск городтаң полтыр. Музыканаң 4 частаң сығара айғасча. Тӧреен городында музыка школазын тоосхан соонда, таланттығ оол Ф.Шопеннің адынаң музыка училищезінзер ӱгренерге кірібіскен. Анаң пианист пілістерін П.И. Чайковскийнің адынаң консерваторияда саблығ профессор Элисо Вирсаладзенің клазында тиліткен, хайзын 2010 чылда тоосхан. Ӱгредіг тузында Илья Леханов, аймах фестиваль-марығларда аралазып, кӧп хати лауреат атха турысхан. 2012 чылдаң сығара ол Цюрихтегі пӧзік музыка школазында ӱгренче.
Илья Хакасиязар пастағызын на килген, аның Ағбаннаң танызып алар кӧңні пар полтыр, че музыканттарны улуғ тоғыс сахтаан. Хысхаӌах тус аразына чиит устар хакас филармониязының струннай оркестрінең хада репетицияларда аралазарға паза А.А.Кенельнің адынаң олған музыка школазында ӱгренӌілерге мастер-класстар иртірерге маңнанғаннар.
«АЛЬТЕРЭГО» ДУЭТТІҢ КОНЦЕРТӀ
Республика чуртағӌыларына чиит устар хынығ концерт программазын тимнеп салғаннар. Анзы тиктең нимес, Настя чир-суғӌыларын чыл сай хайхадарға кӱстенче. Ол концертке тилекейдегі иң артых чайаачы тоғыстарны таллапча.
Дуэттің программазына А.Шнитке, В.А. Моцарт, Р.Штраус пасхан сонаталар паза Ф.Мендельсонның ікі хадыл концерті кіргеннер. Пу чайаачы тоғыстар Хакасияда пастағызын на толдырылғаннар, аннаңар музыкаа хынчатхан улус «АльтерЭго» дуэтті тынмин даа исчеткен.
Пастап Настянаң Илья совет композиторы Альфред Шниткенің 1 № сонатазын ойнааннар. Таныхтирға кирек, Альфред Гарриевичтің тоғыстарын пӧзік устығ музыканттар ла толдырчалар. 1963 чылда пазылған соната кӧрігӌілерні тирең сағысха тӱзірче. Ол кізілерге амғы чуртастың хорылыстарынаңар искір пирерге кӱстенче.
Саблығ Вольфганг Амадей Моцарт Австрияда XVIII векте чуртаан. Аның музыказы Шниткенің тоғызы хыринда хай-хай ӧрчіліг истілче. Композиторның чарых сонатазы концертке килген чонның кӧңнін кӧдірген.
Анаң музыканттар немец композитор Рихард Штраус пасхан тоғысты толдырғаннар. Пу сонатаны критиктер «Хыныстаңар кӧг» тіпчеттірлер. Ол чайаачы устың ипчізі Паулина Мария де Анаа чарыдылған. Штраустың музыказында паарсас паза хыныс пілдірче.
Концерттің ікінӌі чардығында «АльтерЭго» дуэт Хакас филармониязының оркестрінең хада сыххан. Оркестрнің дирижеры - Хакасия искусствозының саблығ деятельі Вячеслав Инкижеков. Аның холында 5 частығ Настяӌах скрипканаң ойнирға пастаан. Струннай оркестрнең хада Анастасиянаң Илья саблығ композитор Феликс Мендельсон пасхан ікі хадыл концертті толдырғаннар. Пу тоғысты Мендельсон 14 частығда чайаптыр. Че концертті иссең, аны улуғ частығ кізі пасхан тіп сағынарзың. Мендельсонның кӧӧ прайзының кӧңніне кірген.
Музыканттар ойыны тоозылғанда, кӧрігӌілер, матап айа саап, «Браво!» паза «Бис!» хысхырғаннар. Концертке килген чон Настяа паза Ильяға порчолар сыйлаан. Концерттің халғанӌызында «АльтерЭго» дуэт Сергей Рахманиновтың улуғ нимес пьесазын толдыр пирген. Хакасияның чуртағӌыларына чайаачы ӧме ундулбас иир сыйлаан. Ізенчебіс, пазағы чылда пістің таланттығ чир-суғӌыбыс наа концерт программазынаң ӧріндірер.
СӦС СОО: Таныхтирға кирек, «АльтерЭго» дуэттің пу хайхастығ концертін ідӧк Минсуғның паза Саяногорсктың чуртағҷылары кӧргеннер. Минсуғда концерт 20 январьда ирткен, металлургтар городында - 23 январьда. Пу неделяда, тізең, музыканттарның чайаачызынаң Хызылчардағылар танызарлар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде