АБАХАЙ ХАҶАН ДАА АБАХАЙ
24.01.2017
Хабарлар
Анна ЯНГУЛОВА - «Абахай» марығда
Россияның городтарында «Чыл ипчізі» ипчілер аразындағы марығны иртірері кибірге кір парған. Пу марығ чон аразында тарадылчатхан культура мероприятиезі полча. Сӧбірені хайраллиры, пала ӧскірері хазнаның ӧӧн национальнай сағызына айланча.
Мындағ марығлар чииттер ле аразында иртірілбеске кирек. Ипчі кізі хайдағ даа частығда сіліг кӧрімніг поларға, чайаачы сарин кӧзіт пирерге тимде. Регион синінде ирткен марығ чиңісчізі «Хакасияның чыл ипчізі» ат алча, ол, республика ӱчӱн турызып, Россияда паза хырығ озаринда иртчеткен культура, полызығлығ акциялар мероприятиелерінде аралазар оңдайлығ.
Хакасияда пу марығны «FDModels» модельлер агентствозы иртірче. «Хакасияның чыл ипчізі-2017» марығ ӱзінӌізін иртірілче. Мероприятиенің тӧстегӌілері аның пӧгіннерін, номинацияларын, тимнеп, анда аралазарға сағынчатханнарға чарлапча. Устағӌы-координатор Татьяна АЛЕКСАНДРОВА ипчілер хайдағ тимненіс кӧзіт пирерге киректеңер чоохтап пирген:
- Піс «Чыл ипчізі» марығны пӱӱл ӱзінҷізін иртірчебіс. Ол сӧбірені паза іӌе поларын аарлиры пӧгіннең иртірілче. Ідӧк чонны, сілігні паалап пілерге, хазых чуртасха тартыларға кӧніктірерге. Ипчілерге ибде хайынарға, паланы ӧскірерге, тоғысха маңзырирға килісче. Оларны, посты чідірбин, халых чуртаста ӧткін аралазарға ӱгретчебіс. Абахайлар марығлары чииттерге ле иртірілче тіп сағынчалар. Палалығ ипчілер нименең олардаң тӧбіннер ! Тоғыс паза сӧбіредең пасха чайаачы чуртас пар нооза. Марығ іҷелернің чайаачы оңдайларын, ілезіне сығарып, тилідер пӧгіннең иртірілче. Салтарында «Хакасияның чыл ипчізі» пӧзік ат пирілче. Пу атха турысхан абахайға пістің республиканы аймах мероприятиелерде турыстыра кӧзідерге кирек полар.
Пу марығда, Хакасиядаң пасха, Хызылчар крайының алтынзархы чирлерінің паза Тува Республиканың ипчі чонына аралазарға чарир. 20 - 55 частығ ползыннар, сӧбіреліг алай чох па, анзы хайыға алылбинча.
Ипчілер ӱс номинацияча марығлазарлар. «Миссис Хакасия» пастағы номинацияа 20 - 35 частығлар алылчалар. Сценаа тӧрт хати сығарлар: «Мин - іӌе» визитканаң, «Fashion сӧбіре» паланаң кӧзідігнең, Чайаачы кӧзідіг, Пайрамнарға кисчеткен чазағлығ кӧгенектіг.
Ікінӌі номинация «Бизнес Леди» адалча, анда 25 - 55 частығлар араласчалар. Олар тоғыста, бизнесте пӧзік чидіглерге читкен поларға киректер, пала чохтар даа постарын сыназыннар. Пу номинацияда «Мин - профессионал» визитканаң, Спонсор кип-азааның кӧзідиинең, Чайаачы кӧзідігнең, Чазағлығ кӧгенектіг сценаа сығарлар .
Ӱзінҷі марығ «Леди года» адалча, мында 35 - 55 частығлар араласча. Олар «Минің сӧбірем» визитканаң, Спонсор кип-азааның кӧзідиинең, Чайаачы номернең паза Чазағлығ кӧгенектіг чон алнынзар сығарлар.
Марығ араласчыларына, сӧбіренің хынған ас-тамаан тимнеп, «Сабланыс минутазында» чайаачы узын кӧзіт пирерге оңдай полар. Оларға ідӧк постаңар чоохтап пирерге тус пирілер.
Тиксі марығны жюри кізілері паалирлар. Олар хазна паза халых пірігістерінең, наука паза искусство деятельлері поларға киректер.
Татьяна Александрова марығда аралазарға сағынчатханнарға, оргкомитетнең палғалызып, анкета сурығларына нандырарға кирек полар тіпче. Репетициялар февраль-март айларда иртірілер. «Хакасияның чыл ипчізі-2017» марығның финалы март айның соонзар полар.
Аралазар кӧңніңер пар полза, пу телефонӌа сығдырадарға: 8-913-446-75-77, Татьяна.
Автор :
Елена САГАТАЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде