«ЧЫЛЫҒ ТОҒАЗЫҒЛАР» ФЕСТИВАЛЬ КӦП ЧОННЫ ЧЫҒДЫ
25.01.2017
Хабарлар
АҒБАНДА 19 - 21 ЯНВАРЬДА РЕСПУБЛИКАНЫҢ МУЗЕЙ-КУЛЬТУРА КІНІНДЕ ПАСТАҒЫЗЫН НА «ЧЫЛЫҒ ТОҒАЗЫҒЛАР» КІЧІГ ФЕСТИВАЛЬ ИРТІРІЛГЕН. АНЫ Л.Р.КЫЗЛАСОВТЫҢ АДЫНАҢ ЧИР-СУҒ ӰГРЕНӋЕҢ МУЗЕЙНІҢ ТОҒЫНӋЫЛАРЫ ТИМНЕЕННЕР.
ФЕСТИВАЛЬНЫҢ УЛУҒ ПАЗА ХЫНЫҒ ПРОГРАММАЗЫ ЧАПСЫТХАН. ЧУРТАҒӋЫЛАРҒА АЙМАХ МАСТЕР-КЛАССТАРДА АРАЛАЗАРҒА, СІЛІГ СУВЕНИРЛЕР ПАЗА ОЙНАӋАХТАР САДЫЗЫП АЛАРҒА, КӦЗЕЕЛЕР ЗАЛЫНДА ПОЛЫП АЛАРҒА ОҢДАЙ ПОЛҒАН. «ЧЫЛЫҒ ТОҒАЗЫҒЛАР» ФЕСТИВАЛЬ РЕСПУБЛИКАНЫҢ МУЗЕЙ-КУЛЬТУРА КІНІНІҢ ПАСТАҒЫ ХАДЫЛЫНДА ИРТКЕН.
Фестивальға килген чонның хараана иң пурун мастер-класстарның аймаа тасталған. Оларны устар паза музейнің тоғынӌылары улуғларға даа, кічіглерге дее иртіргеннер. Олғаннар гипстең иділген магниттерні паза фарфор чірчелерін аймах оңдайнаң чазирға ӱгренгеннер. Піреезі хайа хоостарын микалент чаӌынға хобырған алай тойдаң чірчені идібізерге кӱстенген. Ідӧк палалар открыткалар паза свечілер хынып итчеткеннер. Олох туста улуғлар корзиналар ӱрерге ӱгренгеннер. Мастер-класстарда тикке паза ахча тӧлеп аралазарға чарир полған. Кӧзідімге, 3D модельлерні идерге «Хакасия.ру» компанияның кізілері тикке ӱгреткеннер, пірее мастер-класстар 10 салковайға турғаннар, свечі идерге сағынчатханнар 350 салковай тӧлееннер.
Таныхтирға кирек, фестиваль тузында олғаннарға улуғ хайығ салылған. Улуғ холлның сол саринда кічіг палаӌахтарға ӧнетін ойнаӌаң орын полған. Кічіг частығлар нымзах маттарда чӱгӱр чӧргеннер паза «хайхастығ город» студия аниматорлары иртірчеткен марығларда араласханнар.
(«Казановка» музейнің тоғынӌылары Татьяна Дмитриевна МАЙНАГАШЕВА (сол саринаң), Ирина Никитична МАЙНАГАШЕВА, Елена Сергеевна КЫРЖИНАКОВА)
Идінӌектер «Чылығ тоғазығларда» ӧткін араласханнар. «Сладкарница» садығ туразының тоғынӌылары фирма иткен шоколадты паза пряниктерні сатханнар. Оларны сыйыхха аларға чарир. «Lucomoria» хостелнің ээзі Дарья Тюркинанаң дизайнер Анжела Лучковская Хакасияның тархынына паза чир-чайаанына чарыдылған открыткалар итчелер. Аарлығ нимес открыткаларны туристтер аларға хынчаттырлар. Ус холлығ Юлия Шандакова нымзах кӧклӧӌектер чайапча. Чиит хыстың пір ойнаӌағы 3200 салковайға турча. Аның чооғынаң, прай кӧклӧӌектер кӧӧлӌе садыл парчалар.
Фестивальның араласчылары ӧӧнінде Ағбаннаң полғаннар, че аймахтардаң килген чон учурабохчатхан. Кӧзідімге, «Казановка» музейнің тоғынӌылары «Чылығ тоғазығлар» фестивальға талғаннаң тимнелген ныхчахтар ағылғаннар. Елена Кыржинакованың чооғынаң, пу пайрамға олар пір сутка артиинаң тимненгеннер. Ол чоохтапча: «Талғанны піс позыбыс итчебіс. Пастап кӧчені алай тамахты хоорчабыс, анаң оларны теербеннең тартчабыс. Ныхчахтарзар унадылған нымыртты, хузухты, миндальны, арахисті салчабыс. Ағаа хоза, чуртағӌыларға татхыннығ пряниктер паза харағат сабынаң ізіг чей тимнеп салғабыс».
«Чылығ тоғазығларны» ідӧк хакас филармония артисттерінің номерлері чазааннар. 19 паза 20 январьда чайаачыларынаң камернай ансамбльларның музыканттары ӧріндірген ползалар, субботада улуғ нимес концерт Хакасияның чон артизі Нина Идимешеванаң Россияның саблығ артизі Евгений Улугбашев кӧзіткеннер. Оларға музыканттар Татьяна Майнагашева паза Ирина Боргоякова хабасханнар. «хызамастың ыры», «Кӱскӱдегі чирім», «Аалыӌаам» сарыннар кізілернің кӧңнін кӧдіргеннер. программа хоостыра ырӌылар тӧрт сарын толдырарға кирек полғаннар. Че кӧрігӌілернің сурынызынаң олар хоза «Айдым», «Алтын чечпе» сарыннарны паза «топчыл хомыс» тахпахты толдыр пиргеннер. Кізілер сцена устарына матап айа сапханнар паза «Браво!» хысхырысханнар.
Хайӌы Евгений Улугбашев ідӧк алынӌа номерлер кӧзіткен. Ол кӧзеелер паза обаалар залында, чатхан саап, С.П.Кадышевтің тахпағын паза позының «тағларның кӧглері» сарынын толдырған. Е.А.Улугбашевтің чайаачызына чон аптаттырған.
Ӱс кӱн аразына «Чылығ тоғазығлар» кічіг фестивальда кӧп кізі пол килерге маңнанған. Сизінгенде, фестиваль чонның кӧңніне кірген, аннаңар Л.Р.Кызласовтың адынаң чир-суғ ӱгренӌең музей пу тоғысты узарадарға пӧгінче.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде