АЛЫЛҒАН ПРОЕКТТЕР ЧУРТАСХА КИРІЛЕР
25.01.2017
Хабарлар
Киҷее республиканың правительство туразында Хакасияның Тиліс чӧбі президиумының чыылии ирткен. Аның тоғызын Хакасия пазы Виктор Зимин апарған.
Хайди Виктор Михайлович таныхтаан, Тиліс чӧбі пӱӱл пастағызын чыылысча. Чыылығда муниципальнай пӱдістерге киректелчеткен инвестиция проекті кӧрілер. Ол проекттер хоостыра наа предприятиелер тӧстелер, наа продукция сығарылар, чонға чуртирға истіг, чахсы оңдайлар пирілер. Ӱгредіг сферазына кӧп хайығ салылар, ағаа бюджеттең ахчалығ хабазығ полар. Амды экономикаа ортымах паза пӧзік ӱгредігліг профессияларӌа тоғынӌылар кирек. Ӧӧн хайығны чииттернең тоғынарына айландырарға кирек полар. Оларға тоғынӌаң наа орыннар тӧстирге, парыстарын кӧдірерге киректелче. Муниципальнай пӱдістер постарының пастағларынаң сыхсыннар, прай резервтерні тоғысха тартсыннар. Кічіг производстволар, кооперациялар тӧстирдеңер сағынарға кирек. Прай ол киректернең айғазып, оларны чуртасха кирзебіс, ол Хакасияның экономиказын тилідер.
Хакасияның (2017 - 2020 чылларға) ӱгредіг проекттерінеңер чоох тутхан республиканың ӱгредіг паза наука министрі Галина Салата. Аның чооғынаң, министерство пис ӱгредіг проектін чуртасха кирер: амғы ӱгредігні тилідері; искіріглерні цифровой кӧрімнең пирері; пӧзік ӱгредігліг профессионаллар тимнирі; техниканаң чайаачы айғазары; республикада электроннай ӱгредігні чуртасха кирері. Прай пу проекттерӌе ӱгретчіні аарлирын кӧдірері, аалларда чиит ӱгретчілерге чурт пӱдірері, иргі школаларны нааӌылиры кӧрілче. Пӱӱл хакас тілі паза литература специальностьча тимнелчеткен студенттерге хайығ салылар, оларға кӧдіре стипендия тӧлелер. Анаң техническай специальностьтарӌа ӱгредіге хайығ салылар.
Чиит ӱгретчідең профессионал ӱгретчее программа тоғынар. Школаларда автобус паркы нааӌылалар. Іди пӱӱл школаларға ГЛОНАСС системалығ 38 автобус алылар. Физкультураны паза спортты школаларда тилідерге кирек полар.
Электроннай ӱгредігӌе олғаннар хоза ӱгренерлер. Профессиональнай ӱгредігде пастағы туста поварлар, сварщиктер паза пӱдірігӌілер тимнелер.
Профессияларның аймах кӧрімнерінӌе Хакасияның азых чемпионады иртірілер. Анда пістің республикадаң пасха хонӌых регионнар аралазарлар. Хоза ӱгредігӌе «КванториУм» технопарк кружоктар оңдайынаң тоғынар. «Автогородок» проектче пір муң азыра олған ӱгренер, ағаа кирек оборудованиеліг автобус алылар. «Экодетство» марафонда 300 азыра олған аралазар, анда экологияны хайраллирына ӧӧн хайығ салылар. Кӧріл парған прай мероприятиелерде
республика, муниципалитеттер паза ӱгредіг заведениелері аралазарлар.
Хакасияның ис-пай паза чир хайызығларынӌа министрі Елена Соломонова «Ағбан городтың 8-ҷі микрорайонының чирлерін тилідер концепциядаңар» проектті чыылығның ӱзӱриине сығарған. Пу проектче микрорайондағы чирлерні иптир тӧрт оңдай кӧрілген, че Соломонованың кӧрізінең, ікінӌі оңдайы чуртасха кирерге килістіре полар. Ол оңдайӌа микрорайонда дрена хастада садығ-ӱтертіс кіні, 300 орыннығ национальнай драмтеатр, аквапарк, 3000 орыннығ пус ареназы, спортплощадка, кӧп хадыллығ автомобильлер турғысчаң
тура паза пасха даа объекттер пӱдірілер. Андағы ӱс чир участогының улии 13,2 гектарға тиңнелче. Проект 20 чылға чуртасха киріл парар.
«Чоннар аразындағы «Ағбан» аэропортта хазна границазын кизірер пунктты алғыдары» инвестиция проектін кӧрердеңер» проектче чоох тутхан «Ағбан аэропорт» ОАО-ның ӧӧн директоры Александр Попов. Хайди ол чарытхан, аэропортта хырығ озаринзар парчатхан алай аннаң айланчатхан пассажирлерні иртірӌең пункт ол кізілерні табырах иртір полбинча. Аннаңар аны хайди даа алғыдарға кирек. Ідӧк администрация орныхчатхан тураны пассажирлер залынаң піріктірер пӱдіріг тоғыстарын апарарға кирек полар. Прай ол тоғыстарны толдырарға ӱс чыл киректелер, пӱӱл тимненіс чылы полар.
Асхыс аймаандағы Палыхтығ суғ аалда «Поднебесье» туризм кластерін тӧстирі хоостыра тағдаң саналығ чылӌаң «Балыкса» кін тӧстир проекттеңер «Тура» ООО-ның тоғынӌызы Ирина Комарова искірген. Анда сӧбірелерге чыл тооза тынанар оңдай пирілер, канаттығ чол, гостиницалар пӱдірілер. Республикаа анда чарытхы пирӌең подстанция пӱдір пирерге кирек полар.
«Хакасия старательлерінің артельі» ООО-ның ӧӧн директоры Сергей Ковальков предприятиенің производствозын алғыдар проекттеңер искірген. Мында улуғ нимес таластар полған, че Хакасияның пазы прайзын пір чӧпке килерге хығырған. Андағ оңдайнаң прай сығарылған проекттерні чарадардаңар чыылығ араласчылары ӱннерін пиргеннер.
Автор :
Николай СУЛТPEКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде