ТӦЛІБІСТӀҢ КИРЕКСІНІСТЕРІ СЫБЫРА ХАЙЫҒДА
27.01.2017
Хабарлар
АҒБАНДА 24 ЯНВАРЬДА РЕСПУБЛИКАНЫҢ МУЗЕЙ-КУЛЬТУРА КІНІНДЕ ХАКАСИЯНЫҢ ПАЗЫ ВИКТОР ЗИМИН СТУДЕНТТЕРНЕҢ ПАЗА УЛУҒ КЛАССТАР ӰГРЕНӋІЛЕРІНЕҢ ТОҒАСХАН. ПУ МЕРОПРИЯТИЕ РЕСПУБЛИКАДА ЧИИТТЕР ЧЫЛЫН АСХАН.
ТОҒАЗЫҒДА ІДӦК ХАКАСИЯ ПАЗЫНЫҢ ОРЫНӋЫЗЫ ВЛАДИМИР КРАФТ, ӰГРЕДІГ ПАЗА НАУКА МИНИСТРІ ГАЛИНА САЛАТА, ЭКОНОМИКА МИНИСТРІ ТАТЬЯНА ПАУЛЬ, ХГУ-ның РЕКТОРЫ ТАТЬЯНА КРАСНОВА ПАЗА ХТИ-ның ДИРЕКТОРЫ ЕЛЕНА БАБУШКИНА АРАЛАСХАННАР.
ПАСТАП СӦС АЛҒАН РЕСПУБЛИКА ПАЗЫ ВИКТОР ЗИМИН. ОЛ СТУДЕНТТЕРГЕ ПАЗА ӰГРЕНӋІЛЕРГЕ ПРАВИТЕЛЬСТВОНЫҢ ИДІЛ ПАРҒАН ТОҒЫЗЫНЫҢ САЛТАРЛАРЫН ПАЗА АЛНЫНДАҒЫ ПӦГІННЕРІНЕҢЕР ИСКІРГЕН. ӦСЧЕТКЕН УЛУСХА ХАКАСИЯНЫҢ ӰЛГӰЛЕРІ ТӦРЕМІЛ ХАЙЫҒ САЛЧАЛАР. ТӦРТІНӋІ ЧЫЛЫ РЕСПУБЛИКАДА ЧИИТ СӦБІРЕЛЕРГЕ ПАЗА СПЕЦИАЛИСТТЕРГЕ ЧИР УЧАСТОГЫ ТИККЕ ПИРІЛЧЕ. ХАЛҒАНӋЫ ТУСТА ОЛҒАН САДТАРЫНЫҢ САНЫ КӦРІНДІРЕ ӦС ПАРЫБЫСХАН.
31 МАРТТА ПЕРИНАТАЛЬНАЙ КІН ТУЗАЛАНЫСХА КИРІЛЕР. ЧЕ ПӦКЧЕҢ СУРЫҒЛАР AM ДАА КӦП. ХАКАСИЯНЫҢ ООЛ-ХЫСТАРЫНА ХОЗА ХАБАЗАРҒА ПӦГІНІП, РЕСПУБЛИКАДА ПӰӰЛ ЧИИТТЕР ЧЫЛЫ ЧАРЛАЛҒАН.
Пу тоғазығны Хакасияның ӱлгӱлері ӧсчеткен тӧлнің кирексіністерін піліп алар ӱчӱн иртіргеннер. Мероприятиее килген улуғ аалӌылар чииттернің прай сурығларына нандырарға тимде полғаннар.
Пастағыох сурығ кӧзіткен: Хакасияда ӧткін оол-хыстар чуртапчалар, оларны чуртастың аймах сари сағыссыратча. ХГУ-ның студенті Владимир Савченко 4-ӌі курста ӱгренче. Диплом алған соонда ол, тӧреен Таштып аймаанзар айланып, аалдағы школада ӱгретчі полып істенерге пӧгінче, че аалда чурт саринаң сидік. Нинӌе-де чыл мының алнында аалда тоғынчатхан чиит ӱгретчілерге туралар пӱдірілӌең, амды пу программа тохтадылған. Владимир піліп аларға сағынған: правительство хайдағ оңдайнаң чиит ӱгретчілерге пу сурығны пӧгерге полызар.
Студенттің суриина ӱгредіг паза наука министрі Галина Салата нандырған. Аның таниинаң, пӱӱнгі кӱнде школаларда чиит специалисттер чидіспинче. Оларның санын ӧскірерге пӧгініп, республикада аймах программалар чуртасха кирілче. Кӧзідімге, кӧстегліг оңдайнаң ӱгренчеткен студенттер Хакасияа киректелчеткен специальностьтар алзалар, республика бюджедінең оларға ахчалығ полызығ пирілер. Амғы туста андағ полызығ хакас тілі паза литература ӱгретчізі специальностьха ӱгренчеткен студенттерге пирілче. Оларға ай сай стипендияа хоза 2000 салковай тӧлелче.
Чурттаңар чоохтаза, республиканың ӧнетін программазы хоостыра чиит ӱгретчілерге аалларда сынап таа наа туралар пӱдірілген. Хысхаҷах тус аразына тузаланысха 30 тура кирілген. Пу программа 2019 чылда хатап тоғынып пастир.
Н.Ф.Катановтың адынаң Хакас гимназияның ӱгренӌізі, таланттығ музыкант Юрий Шалгынов республика пазы Виктор Зиминнең сурған: «Чарир ба республикада хакас чонның кӧг тиріглерінің оркестрін тӧстеп алып, анда наа тоғыс орыннарын азарға?» Хакасияның пазы таныхтаан: «Син, Юрий, ырах сағыстығ кізі полтырзың, хаҷан полза, сині культура министріне турғызарлар, неке. Ӱлгӱлер культураа улуғ хайығ салчалар. 2016 чылда піс «Ӱлгер» ансамбльға 40 наа тоғыс орнын пиргебіс. Юра, син пастап школа паза институт тоозыбыс, ол тусха, ізенчем, республикада хакас чонның кӧг тиріглерінің оркестрін тӧстеп аларбыс».
Халых тоғыста ӧткін араласчатхан Кристина Дельвер Россиядағы чииттер чӧбінің пӧлиин Хакасияда азарға сурыныснаң айланған. Чииттер Виктор Зиминге паза министрлерге аймах сурығлар пиргеннер. Ол санда студенттер Хакасия пазынаң хынчатхан сарыннарынаңар чоохтап пирерге сурынғаннар. Виктор Михайловичтің кӧңніне романстар кірчеттір, аннаңар ол Александр Малининнің чайаачызына хынча.
Ідӧк тоғазығда таланттығ чииттерні чеестееннер. Алты оол-хыс, ӱгредігде, спортта паза искусствода пӧзік чидіглерге чидіп, Россияның ӱгредіг паза наука министерствозының сыйиина турысхан. Лауреаттарның санында полған ХГУ-ның студенті Алёна Тинникова. Кӱстенӌік хыс ӱс чыл Ағбан городтың киизін істескен. Ирткен чылда ол тиксі Россиядағы В.И.Вернадскийнің адынаң марығның чиңісчізі полыбысхан. Музыкант Александр Трояков республиканың олған искусство школазында ӱгренче. 2016 чылда чайаачы кӧңніліг оол республика мариинда чиңіс тутхан. Ідӧк пӧзік сыйыхнаң Юрий Шалгынов таныхталған. Юра Тюменьде ирткен Дельфийскай ойыннарда алтын медаль холға кирген.
Мероприятиенің халғанӌызында Виктор Михайлович студенттерге ӱлгӱлерзер пастағларнаң айланарға, сағыстарынаң ӱлезерге кирек тіп таныхтаан. Февральда Хакасияның пазы чииттернең пазох тоғазарға пӧгінче.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде