РЕСПУБЛИКА БЮДЖЕДІНЗЕР АЛЫЗЫҒЛАР КИРІЛЕР
27.01.2017
Хабарлар
Хакасия парламентінің устағҷызы Владимир Штыгашев 25 январьда Ӧӧркі Чӧп президиумының теестегі чыылиин иртірген. Кӧрілген сурығларның аразында ӧӧннернің пірсі пӱӱлгі республика бюджедінеңер законзар алызығлар кирердеңер полған.
Ӧӧркі Чӧп депутаттары чағынғы сессияда «Хакас Республиканың 2017 чылға, кӧрілген 2018 паза 2019 чылларға республика бюджедінеңер» законзар алызығлар кирерін ӱзӱрерлер. Андағ чарадығ алған Ӧӧркі Чӧп президиумы пу чыылығда. Республика бюджедінзер алызығларны Хакасия Правительствозы кирче.
Хайди чарытхан республиканың финанстар министрі Семён Аёшин, 2017 чылға республика бюджедінің парыстары 1 миллиард салковайға хызырылча. Бюджеттің парыстығ чардығы ӧӧнінде организацияларның парыстарына налогтар саринаң хызырылча. Ол налог ахчазының сині 2017 чылда 1 миллиард 40 миллион 730 муң салковайға хызырыл парар тіп кӧрілче. Олох туста Россия Федерациязында сығарылчатхан товарларӌа (ас-тамахча) акцизтер хоостыра кірчеткен ахча сині 40 миллион 730 муң салковайға ӧс парар тіп сахталча.
Министрнің чооғынаң, пу прай ниме федеральнай бюджеттең ахчалығ полызығ алып алар ӱчӱн иділче. Москва республикаа 708 миллион салковайға дотация пирерге тимде осхас, че Россияның минфині, аны алып алар ӱчӱн, республика бюджедінің парыстарын 1 миллиард салковайға хызырыбызарға хысча. Мында оңарарға чарир - хорадығлар анӌох хызырыл парарға кирек. Че Хакасияның финанстар министрі Семён Аёшин пістің хорадығларның ӧӧн чардығы (80 %) социальнай, аннаңар оларны хызырбаспыс тіп ізендірген.
- Бюджеттің хорадығлығ чардығы ӱреге кірбес ӱчӱн, піс аны, хызырбин, дефицитті чапчаң хоза ахча полызиинаң оңдайлирға чӧп кирчебіс, - таныхтаан министр.
Ӧӧркі Чӧп президиумы, бюджет хорадығлары хызырылбазына чӧпсініп, алызығлар кирчеткен закон проектін килер сессияның ӱзӱриине сығарарға чаратхан. Сессия 8 февральда иртер тіп кӧрілче.
Автор :
Иван ТИННИКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде