ХЫЗЫЛ ХАРА СУҒДАҒЫ ШКОЛА НААҶЫЛАЛҒАН СООНАҢ ІЗИИН АСТЫ
31.01.2017
Хабарлар
ТАСХАР КӰН ЧАРЫХ ЧАРЫТЧА. ПІСТІҢ РЕДАКЦИЯНЫҢ ТОҒЫНҶЫЛАРЫ ПИИ АЙМААНЗАР ЧОЛ ТУТЧАЛАР. ИРТКЕН НЕДЕЛЯДА ХЫЗЫЛ ХАРА СУҒ ААЛДАҒЫ ШКОЛА ТЫХТАҒ ТОҒЫСТАРЫ СООНАҢ ӰГРЕНҶІЛЕРГЕ ПАЗА ӰГРЕТЧІЛЕРГЕ ІЗИИН ЧАЛБАХ АСХАН. ПАЙРАМНЫҒ МЕРОПРИЯТИЕДЕ ХАКАСИЯНЫҢ ПАЗЫ ВИКТОР ЗИМИН, ӰГРЕДІГ ПАЗА НАУКА МИНИСТРІ ГАЛИНА САЛАТА ПАЗА ПИИ АЙМААНЫҢ УСТАҒ-ПАСТАА АРАЛАСХАННАР.
МЫНДА ПӰӰН УЛУҒ ӰЛӰКӰН! НАА ШКОЛА ААЛҶЫЛАРНЫ ЧАЗАҒЛЫҒ УДУРЛААН: АЙМАХ ӦҢНІГ ШАРЛАР КИИДЕ САБЫЛҒАННАР, ЛЕНТАЛАР ТАРТЫЛҒАННАР ПАЗА ЧАПСЫХ ХАКАС САРЫННАРЫ ЫРАХХА ЧАЙЫЛҒАН. ШКОЛАНЫҢ ПЛАСТИК КӦЗЕНЕКТЕРІНЕҢ ӰГРЕНҶІЛЕР МАТАП ПАХЛАПЧАТХАННАР.
ТАСХАР ОТ ИНЕЗІН АЗЫРААН СООНАҢ ААЛҶЫЛАРНЫ ШКОЛАЗАР ИРТІРГЕННЕР. ӰГРЕДІГ УЧРЕЖДЕНИЕЗІНДЕ ТЫХТАҒ ТОҒЫЗЫ НАА ЧЫЛ АЛНЫНДОХ ТООЗЫЛҒАН ПОЛЗА ДАА, КРАСКА ЧЫЗЫ AM ДАА ТУДЫЛЧА..
Линолеумнаң чазылған пол, кӧні стенелер, наа мебель харахха тасталча. Аның істінзер кіргендӧк, кізі пазында сағыс тӧріпче: «Пу школа городтағызынаң даа артых». Кірзеңӧк, улуғ холл. Анда ӱгренҷілернің пос холынаң иділген тоғыстары кӧзідіге сығарылғаннар. Класстар оң паза сол саринда орныхчалар. Школада актовай зал пар. Ол, улуғ полбаза даа, школа ӧмезіне читкіҷе. Ол залзар аалҷыларны иртіріп, ӱгренҷілер улуғ нимес концерт кӧзіткеннер.
Олғаннарның сарыннарында кӧп алғыстас сӧстері истілген. Олар республиканың устағ-пастаан, школаҷахтарын хайраллап, нааҷылабысхан ӱчӱн алғыстааннар. Кӧп чылығ сӧстер читірген школа директоры, Хакасияның саблығ ӱгретчізі Маргарита Байкалова. Пу школаны ағаа ікінҷі хати, тыхтағ тоғыстарын иртіріп, азарға килісче.
- Пастап пу школада совхоз тоғынҷыларының общежитиезі полған. Анаң 1990 чылларда аны школаа пирібіскеннер. Ӱгренҷілер анда 1990 чылның 12 ноябрьынаң ӱгреніп пастааннар. Пастап сидіксіністер чох ӱгренгебіс, че ӱс чыл пазынаң школабыс изеліп пасталған. Хайди ілезіне сығысхан, пӱдірігҷілер хомай пӱдіртірлер. Аннаңар поллар, стенелер, потолоктар іріктеп пастааннар. Піди піс 20 азыра чыл чуртаабыс, улуғ нимес тыхтағ тӧреміл итчеңміс. 2015 чылда школада улуғ тыхтағ тоғызын идеріне чарадығ орта алылған тіп сағынчам. Тыхтағ тоғыстары пасталғанда, пӱдірігҷілер школаны чахсы нааҷылап полбастар тіп ікінҷілеем, че олар аны фундаментінең хырына теере прай нааҷылабысханнар.
28 декабрьда школабыста ӱгренҷілерге Наа чыл ӱлӱкӱнін иртіргебіс. Олғаннар тыхтағ тоғыстары соонаң пастағызын на кіргеннер. Олар, школа иркінін алтабызып, алаң ас парып турғаннар: школаларын таныбааннар! Мин сағынчам, ол пӱдірігҷілерге иң пӧзік паалағ. Олғаннар школа піди алыс парарына киртінмееннер, - кӧңнінең ӱлесче Маргарита Гавриловна.
2015 чылда, школаны ӱгредіг чылына тимдезін сыныхтирға ӧнетін комиссия киліп, аны
кӧрглеен соонаң чабызарға чарадығ сығарыбысхан. Школа уғаа иргі, аннаңар саай пол парарға ӱр нимес. Наа школаны пӱдіреріне кӧп тус парыбызар, аннаңар Хакасия пазы Виктор Зимин аны табырах тыхтабызарға чарадығ алған. Пӱдіріг тоғыстарына республика бюджедінең 12 млн. салковай позыдылған паза андар наа оборудование аларына 2 млн. хорадылған. Пӱдіріг тоғыстарын Хызылчардағы организация толдырған. Олар школаның фундаментін, стенелерін тыыдыбысханнар, кӧзенектерін алыстырыбысханнар, туалет паза хол чунҷаң комнаталар идібіскеннер. Кӧп наа мебель алылған. Амды полған на класста компьютер, интерактивнай доска пар. Химия, физика паза информатика кабинеттеріне ӧнетін оборудование алылған. Хайди ӱгретчілерзер паза ӱгренҷілерзер айланызында таныхтаан Хакасия пазы Виктор Зимин, Хызыл хара суғдағы школаның ӱгретчілері паза ӱгренҷілері Хакасия паза Россия синінде тӧреміл махтатчалар, аймах марығларында, ӧткін аралазып, пастағы орыннар удаа алчалар, кӧбізін хакас тілі паза литература предметтерінҷе.
- Сірер школада культураны, кибірлерні хайраллирынҷа тоғыс алғым апарчазар. Аннаңар школаны чабарға алай ба нааҷылирға сурығ турыбысханда, піс ікінҷізін таллап алғабыс. Хайдағ даа аалда школа поларға кирек, андада аал чуртир. Піс ізенчебіс, тілні хайраллир тоғысты сірер, ӱгретчілер, школада паза аалда аннаң андар апарарзар, іҷе-пабалар, тізең, сірерге хабассыннар, - таныхтаан республика пазы.
Виктор Михайлович класстарны, тренажер залын, библиотеканы, школа алнындағы классты кӧрген. Халғанҷызында Зоя Тюкпиекова тоғынча.
- Школа алнындағы класстың ӱгретчізі полып, 35 чыл істен салып, мин аның чуртазын, тархынын чахсы пілчем. Хайдағ ол полғанын чоохтирға тілім айланминча, амды хайдағ пол парғанын чоохтирға кирек. Амды пістің кічіг школабыс городтағы даа школадаң артых полар! Піске ӱгредіге киректелчеткен прай нимелер пирілген. Кічіг палаҷахтар школазар чӱгӱрікнең килчелер! - ӧрінче школа алнындағы класстың ӱгретчізі Зоя Оклатиевна.
Школаның ӧмезі паза ӱгренҷілері нааҷылал парған школаларына матап ӧрінчелер. Амды оларға хонҷых аалларзар ӱгренерге, тоғынарға чӧрерге кирек чоғыл. 3-ҷі класстың ӱгренҷізі Нурби Сагалакова Хызыл хара суғдағы школада 1-ғы ла класста ӱгренерге маңнанған, анаң ол чабыл парған, 2-ҷі класста Кічіг Ноныптағы школада ӱгренген.
- Кічіг Ноныптағы школада ӱгренерге хомай полбаан, че позыбыстың школабыс азыларын чидікпин сахтаабыс! Иргі школабыс соох паза харасхы полған, амды ол уғаа чарых, чылығ паза истіг пол парған. Аны пастағызын на кӧргенде, хайхап парғабыс! Школабыс алыс парған! Мында улуғ коридор, класстар, наа мебель. Полған на класста компьютерлер, ноутбуктар пар. Амды піс уроктар соонаң ибзер дее парарға маңзырабинчабыс, - чоохтапча хызыҷах.
Хызыл хара суғдағы школаның ӱгренҷілері, аймах олимпиадаларда аралазып, тӧреміл чахсы салтарлар кӧзітчелер. Ӱр ниместе Нурби математика, орыс тілі паза литература предметтерінҷе аймах синінде ирткен олимпиадада араласхан. Анда ол 3-ҷі орынға турысхан. Марыға хызыҷахты ӱгретчізі Хыспира Борисовна Сагатаева тимнеен. Хайди ол чоохтапча, амды класста полған на ӱгренҷінің позының кабинказы пар, хайда ол ниме-нооларын салғлапча. Класста наа парталар, аймах ӧңніг таблицалар паза даа пасха нимелер пар. Ӱгренҷілер школазар хынып килчелер. Уроктар соонаң ибзер парарға даа хынминыбысчалар, анаң іҷелері оларны сӱріс килчелер.
Школа директоры Маргарита Байкалова паза ӱгретчілер ӧмезі Хакасия пазы Виктор Зиминге, Россияның Хазна Думазының депутады Надежда Максимоваа, Пии аймааның администрациязына, пӱдірігҷілерге ӱгредіг учреждениезінде тыхтағ тоғыстарын ит пиргеннері ӱчӱн улуғ алғыстарын читірчелер. Хайди олар чоохтапчалар, нааҷылалған школада олғаннар кӱстеніп ӱгрен сыхтылар. Хонҷых аалларзар ӱгренерге чӧрчеткеннерінде, олғаннар, майығып, ибдегі тоғыстарын пірееде итпин кил турғаннар. Ам оларның ӱгренер кӧңнілері пар.
Хызыл хара суғдағы школада 40 азыра олған ӱгренче. Ідӧк андар Кічіг Нонып аалдаң ӱгренҷілер ӱгренерге килчелер. Школада 10 ӱгретчі істенче. Прайзы улуғ опыттығ. Школа Хакасияның иң артых аалдағы школалар санына кірче, 2009 чылда, тізең, ол Россияның иң артых школалары санында полыбысхан. Ӱгредіг учреждениезінде таланттығ ӱгренҷілерге улуғ хайығ салылча. Ӱгренҷілер, олимпиадаларда, наука-практикалығ конференцияларда, марығларда аралазып, призерлар паза чиңісчілер полыбысчалар. Ідӧк анда пос тілін хайраллирынҷа улуғ тоғыс апарылча. Школаны тоосхан ӱгренҷілер Хакасияның паза тиксі Россияның пӧзік ӱгредіг учреждениелерінзер ӱгренерге кіріп алчалар.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде