АВТОМОБИЛЬЛЕР ЧӦРІЗІ ЧОРЫХТА
28.04.2017
Хабарлар
ЧЫЛ САЙ ИЛБЕК АДА ЧААДАҒЫ ЧИҢІСКЕ ЧАРЫДЫЛҒАН АВТОМОБИЛЬЛЕР ЧӦРІЗІ ХАКАСИЯНЫҢ МУНИЦИПАЛЬНАЙ ПӰДІСТЕРІНҶЕ ЧОРЫХХА СЫХЧА. ПӰӰЛ ІДӦК 26 АПРЕЛЬДЕ АҒБАНДАҒЫ ЧИҢІС ПАРКЫНДА ЧААҶЫЛАР САБЛАНЫЗЫ МЕМОРИАЛ АЛНЫҢДА, АВТОМОБИЛЬЛЕР ЧӦРІЗІН АЗЫП, УЛУҒ МИТИНГ ИРТКЕН. АНДА ГОРОД ЧУРТАҒҶЫЛАРЫ, ВУЗТАР СТУДЕНТТЕРІ, ӰГРЕНҶІЛЕР АРАЛАСХАННАР.
Успас оттың ікі саринда стройда Саяногорсктағы 3 № школаның кадеттері паза чииттернің «Юнармия» чаа-патриот халых чӧрімінің араласчылары турғаннар. Юнармеецтернің аразында Хакас национальнай гимназия-интернаттың 11 класстағы ӱгренҷізі Артём Кундузаков паза аннаң хада ӱгренчеткен арғыстары полғаннар.
Ағбанда пайрамнығ мероприятие иртірерге уғаа килістіре айас, чылығ кӱн турған. Успас от хыринда кічіг олғаннар теелбектер, чаа-патриот сарыннарын толдырғаннар. Площадьсар ӱс офицер Чиңіс знамязын кирген, ол туста «Священная война» кӧг толдырылған. Митинг азылғанда, Хакасия правительствозындағы мобилизация тоғызынҷа комитет кнезі Василий Будылинге сӧс пирілген.
Аның чооғынаң, Автомобильлер чӧрізі Илбек Ада чаадағы Чиңіске, чаада, посха айабин, ыырҷыдаң тоғыр чааласханнарға, хан тӧгістіг чаадаң айланмааннарға чарыдылча. Олар пізӧк осхас олаңай кізілер полғаннар, че чуртас іди айлан парыбысхан - оларға, холға тиріг тудынып, Чир-суубысты арачылирға киліс парған. Хакасиядаң фронтсар парған чааҷылар Москваны, пасха даа городтарны азымахчы фашисттердең арачылааннар. Кӧп кізі аннаң айланмаан. Олар, пістің амғы чуртазыбысты арачылап, постарының чуртастарын пир салғаннар.
Автомобильлер чӧрізінің ӧӧн пӧгіні - республиканың город-аалларынҷа парып, муниципальнай пӱдістерде иртірілчеткен митингтерде аралазары, андағы хумартхы тастарзар чахайахтар, веноктар салары. Ідӧк муниципалитеттерде «Юнармия» чӧрімзер наа чииттер алылар. Юнармеецтер город-аалларда иртірілчеткен аймах мероприятиелерде аралазарлар. 9 Майда Ағбанда Пастағы май площадьында иртер парадта юнармеецтер чааҷыларнаң хада стройнаң иртерлер.
Чооғын тоозып, Василий Будылин прайзынзар чаа ветераннарын, чаа олғаннарын, тыл істенҷілерін аарлирға, оларға полызарға айланған.
Митингте ідӧк чоох тутханнар Хакасияның Халыхтар палатазының ветераннарнаң, пенсионерлернең тоғыс апарчатхан комиссиязының кнезі Юрий Седых, абыс иерей Александр ада паза ДОСААФ-тың региондағы пӧлиинің устағҷызы, полковник Александр Профатилов. Хайди Профатилов таныхтаан, пӱӱл Автомобильлер чӧрізі 10-ҷы хати чорыхха сыхча, ідӧк пӱӱл Россияның ДОСААф-ына 90 чыл толча.
Мероприятие тоозылчатханда, юнармеецтер улуғ тӧлге турыстыра поларға сӧс пиргеннер, оларға «Юнармияның» араласчызы полчатханын киречілепчеткен значоктар читірілген. Хысха театрализованнай кӧзідіг ирткен. Прайзы, чаадаң айланмааннарны хумартхылап, пір минута сым турған соонда, чааҷылар, салют идіп, автоматтардаң тигірзер атханнар. Мемориал тӧзінзер веноктар, чахайахтар салылған.
Ярыгиннің орамазында Чиңіс паркы хыринда кузовтығ ікі КамАЗ, УАЗ-469 паза ГАИ автомобильлері чорыхха сығарға тимде турғаннар. Олар Саяногорсксар чол тутханнар, анаң Пииде, Полтахта, Асхыста полғаннар. 27 апрельде чорых араласчылары Хубачарда, Ағбан пилтірінде, Харатас паза Сорығ городтарда полып, пӱӱн автоколонна Боград, Шира, Копьёв ааллардаң Ағбанзар айланча.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде