КӦП КІЗІНІҢ ЧУРТАЗЫН АЛ ХАЛҒАННАР
28.04.2017
Хабарлар
Чернобыльдағы АЭС-та улуғ саай полғаннаң 31 чыл ирт парған. Ағбанда табырах имнег полызиин пирер станция алнындағы ачыхта ол чобағлығ кӱнге чарыдылған митинг ирткен. Мероприятиее Чернобыльдағы саайның салтарларын чох иткен чуртағҷылар, оларның сӧбірелері килгеннер. Ідӧк анда Хакасия правительствозының паза Ӧӧркі Чӧбінің кізілері араласханнар.
1986 чылда 26 апрельде Чернобыльдағы АЭС реакторында полған чара чачырас Хиросима городсар тасталған атомнай бомба чачыраанынаң 50 хати улуғ полған. Аның соондағы радиация кӧп чирлерҷе тарап парған. Саай кӧп кізее чобағ ағылған. Аның салтарларын чох идерге парғаннарның санында Игорь Орлов полған. Ол туста 20 частығ оол химия войсколарының взводында служба апарған. Саай полғандох, оларны андар ызыбысханнар. Игорь Орлов радиация-химия разведказының командирі, сержант званиеліг полған.
- Орынзар читкенде, піс, зона ибіре флагтар хазап, городтыі хурчаға алғабыс. Служба соонаң даа мині саай салтарларын чох идерге ысханнар. Піс Припять городты арығлаабыс. Туралардағы мебельні, оох-теек нимелерн сығарып, піс оларны чирзер кӧм салҷаңмыс. Ідӧк 4-ҷі энергоблогында саркофаг турғысхабыс. Радиация хайдағ хорғыс ағылчатханын піс пілгебіс. Анда тоғынған сылтаанда, хазиим уйан пол парған.
Чааҷы службазы соонда Игорь Тимофеевич Хакасиязар кӧскен. Пастап Саяногорскта чуртаан, анаң 1989 чылда ол Ағбанзар кӧскен. Тимір чолда электромонтер полып тоғынча. Чааҷы биледінде 23,400 рентген радиация хаптырып алғаны пазылған. Че сынында Игорь Орлов аннаң даа кӧп радиация хаптырып алған.
Митинг пасталғанда, Хакасия пазының орынҷызы Николай Поповха сӧс пирілген. Аның чооғынаң, Чернобыльдағы саай пістің хазнаа ла нимес, ідӧк Европаның хазналарына теелген. Анзы «амыр» атомнаң сизіктіг тоғынарға киректелчеткенін кӧзіткен. Ол чобағ салтарларын прай совет чоны чох иткен. Хакасиядаң Чернобыльзар 500 артиинаң кізі парған. Амғы туста республикада андағ 250 кізі саналча. Хакасия пазы адынаң Николай Попов оларға хазых чуртас алғаан. Оларның махачызы хаҷан даа ундудылбас теен.
Хакасияның Ӧӧркі Чӧбінің хазых хайраллирынҷа паза социальнай политикаҷа комитедінің кнезі Николай Михеев Чернобыльдағы саайның салтарларын чох иткен кізілерге алғызын читірген. Аның чооғынаң, пістің чон ол чобағның салтарларын тынағ чох тӧрт чыл чох иткен. Саай тохтадылған, че ол кӧп кізінің хазиина улуғ ӱрег ағылған. Амғы туста, оларның хазиин пиктир ӱчӱн, наа оңдайлар кирерге кирек. Че андағ оңдайлар ам даа табылбаан.
Ідӧк чоох тутханнар республиканың чааҷылар комиссарының орынҷызы Виктор Гресь паза «Союз Чернобыль» халых пірігізінің кнезі Людмила Васильева. Олар Чернобыльдағы саайның салтарларын чох иткен чуртағҷыларға хазых, часка алғааннар.
Митинг тоозылғанда, пу ачыхсар килген чон Чернобыльдағы атомнай электростанцияда полған техногеннай саайның салтарларын чох иткеннерге турғызылған хумартхы тассар чахайахтар паза веноктар салған.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде