ӦӦРКІ ЧӦП 25 ЧЫЛЫН ТАНЫХТААН
30.05.2017
Хабарлар
ИРТКЕН ПЯТНИЦАДА ХАКАСИЯНЫҢ ӦӦРКІ ЧӦБІНІҢ АЙМАХ ХЫҒЫРТЫҒЛАРЫНДА ТОҒЫНҒАН ДЕПУТАТТАРНЫ ЧЕЕСТЕЕННЕР. ӦӦРКІ ЧӦПТІҢ 25 ЧЫЛЫНА ЧАРЫДЫЛҒАН ПАЙРАМНЫҒ ЧЫЫЛЫҒ АҒБАНДА ДРАМА ТЕАТРЫНДА ИРТКЕН. ВЛАДИМИР ШТЫГАШЕВ, ЧЫЫЛЫҒНЫ АЗЫП, 25 ЧЫЛ АРАЗЫНА ӦӦРКІ ЧӦП РЕСПУБЛИКАНЫ ТИЛІДЕРІНЕ, АНЫ ӦҢНЕНДІРЕРІНЕ УЛУҒ ХОЗЫМ ИТКЕНІН ТАНЫХТААН. АНЫҢ ӰЧӰН ӦӦРКІ ЧӦПТЕ ІСТЕНГЕН ПРАЙ ДЕПУТАТТАРҒА УЛУҒ АЛҒЫЗЫН ЧИТІРГЕН.
ӦӦРКІ ЧӦПТІ ІДӦК ПАЙРАМЫНАҢ АЛҒЫСТААННАР ХАКАСИЯНЫҢ ПАЗЫ ВИКТОР ЗИМИН, ХАКАСИЯНЫҢ ФЕДЕРАЦИЯ ЧӦБІНДЕГІ КІЗІЗІ ЕВГЕНИЙ СЕРЕБРЕННИКОВ, ХАКАС РЕСПУБЛИКАҶА ӦӦН ФЕДЕРАЛЬНАЙ ИНСПЕКТОР ВИКТОР ЧЕРНЫШЕВ ПАЗА ТЫВА, КРЫМ РЕСПУБЛИКАЛАРНЫҢ, ИРКУТСК ОБЛАЗЫНЫҢ, ХЫЗЫЛЧАР КРАЙЫНЫҢ ДЕЛЕГАЦИЯ КІЗІЛЕРІ. ПАЙРАМНЫҒ ЧЫЫЛЫҒ ТУЗЫНДА ӦӦРКІ ЧӦПТІҢ ИҢ ТУРЫСТЫҒ ДЕПУТАТТАРЫН ХАЗНА СЫЙЫХТАРЫНАҢ, ААРЛАСТЫҒ ПАЗА АЛҒЫСТАСТЫҒ ПІЧІКТЕРНЕҢ ТАНЫХТААННАР.
- 25 чыл аразына Хакасияның Ӧӧркі Чӧп депутады 309 кізі полған. Олар прайзы чахсы істенгеннер, постың депутат тоғызына сыданғаннар, - пайрамнығ чыылығны азып, таныхтаан республиканың Ӧӧркі Чӧбінің устағҷызы Владимир Штыгашев. - Полған на хығыртығ республикада парламентаризмні тилідеріне позының хозымын иткен. Хығыртығлар пӱдізі хоостыра паза оларның алнында турчатхан пӧгіннерҷе аймах-пасха полғаннар, че оларны прайзын пір ниме піріктірген.
- Хакасияны ӧңнендірер, республиканың прай чуртағҷыларына турыстығ чуртас пирер сағыс. Хакасияның Ӧӧркі Чӧбі тӧстелгеннең сығара анынаң устапчатхан Владимир Штыгашев хада істенген паза істенчеткен арғыстарына улуғ алғызын читірген, тіспен істеніп, Хакасияның пӱӱнгізіне паза таңдағызына хозым иткеннері ӱчӱн. Оларның чидіглері, олар алған законнар Хакасияның чуртағҷыларына ам даа кӧп чыллар туза ағыларлар тіп таныхтаан. Владимир Штыгашев алғыстастығ чооғында республиканың Ӧӧркі Чӧбі ідӧк кадрлар тимнепчеткеніне хайығ айландырған. Хакасияның парламентінде тоғынған депутаттарның кӧбізі аймах-пасха ӱлгӱ синінде устағҷы полчатханын таныхтаан. Хакасияның пазы Виктор Зимин хаҷан-да Ӧӧркі Чӧп депутады полғанын кӧзідімге ағылған.
Республика пазы Виктор Зимин, Ӧӧркі Чӧптің депутаттарын алғыстап, пу олаңай ла пайрам нимес тіп чоохтаан.
- Ӧӧркі Чӧп тӧстелгені - пістің тӧреен республикабыстың тархынындағы уғаа танығлығ кирек. Республиканың хазна ӱлгӱзінің закон сығарҷаң органы тӧстелгені паза аның тоғызы Хакасия Россия Федерациязының пос алынҷа субъекті чіли полыбысханынаң пик палғалыстығ, - теен Виктор Зимин. - 25 чыл ирт парды. Піди кӧрзе, кӧп тее нимес тус. Че ол улуғ тоғысты кӧр кӧрзе, хайзын Ӧӧркі Чӧптің амғы паза алындағы хығыртығларда істенген депутаттары толдыр салғаннар, уғаа хайхатча.
Республика устағҷызы Хакасияның Ӧӧркі Чӧбінің аймах хығыртығларында тоғынған паза пӱӱнгі кӱнде ол тоғысты узаратчатхан прай депутаттарға улуғ алғызын читірген. Олар постың закон сығарҷаң істенізінең Хакасияны тилідеріне пик тӧстег ит салғаннары ӱчӱн.
- Алынҷа алғыс сӧстері сын командирге, ӱгретчее паза Хакасияның сын патриодына - Владимир Николаевич Штыгашевке, - таныхтаан Хакасияның пазы Виктор Зимин.
Ӧӧркі Чӧптің депутаттарын пайрамнаң ідӧк хонҷых Тыва Республикадаң, Хызылчар крайынаң, Иркутск облазынаң паза ыраххы Крымнаң килген делегацияларның кізілері алғыстааннар. Ағаа хоза видео пастыра алғыстастар кӧзіділген, ол санда Россияның Федеральнай Чыылииның Федерация Чӧбінің кнезі Валентина Матвиенконың алғыстазы.
Пайрамнығ чыылығда Ӧӧркі Чӧптің аймах хығыртығларында істенген депутаттарны хазна сыйыхтарынаң, Аарластығ паза алғыстастығ пічіктернең таныхтааннар.
Автор :
Альберт ТОЛМАШОВ Сомнар Максим АХПАШЕВТИ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде