ИҢ АРТЫХТАРЫНА - ХАКАСИЯ ПАЗЫНЫҢ СЫЙИИ
30.05.2017
Хабарлар
Правительство туразында Хакасияның пазы Виктор Зимин региондағы школаларның иң чахсы ӱгренчеткен ӱгренҷілерінең тоғасхан. Тоғазығ «Комсомольская правда» газета издательствозының Хызылчардағы пӧлии тӧстеен «Республика пазының дневнигі» акция хоостыра ирткен.
Чыылығлар иртірҷең залдағы стол кистінде иң артых 18 ӱгренҷі одырған, ідӧк анда оларның паба-іҷелері полғаннар. «Республика пазының дневнигі» акцияда Хакасияның 29 школазы араласхан: Ағбанның, Харатастың, Саяногорсктың, Сорығның, Ағбан пилтірі, Шира, Боград паза Асхыс аймахтарының. 162 араласчыдаң 12 чиңісчі таллалған. Полған на класстаң пірер чиңісчі табылған, че тӧрт класста ікі чиңісчі полған, анда ікі ӱгренҷінің паалағлар саны пірге ле пасхалалған. Ідӧк Хакасия пазы халых тоғызынаң ӧткін айғасчатхан паза чахсы ӱгренчеткен алты паланы таныхтирға чарадығ алтыр.
Олғаннарға регион устағҷызы Виктор Зиминнең тоғазары ӧӧн сыйых полған. Хакасияның пазы ӱгренҷілернің дневниктерінде хол салған, алғастар пас пирген, сыйыхтар, дипломнар читірген.
Олғаннарны танығлығ кӱннең алғыстап, ол чоохтаан:
- Нинҷе-де чыл мының алнында піс пу акцияа хозылғабыс. Амды «5» паалағларҷа чемпионнарнаң пір стол кистінде одырчатханыма поғдархапчам. Сірернің салтарларың айдас, чидіглеріңнің пірсінде 337«5» паалағ. Чахсы пілчем, ол олаңай ла паалағлар нимес, ол уғаа нандырығлығ тоғыс , сірер аннаң кӱннің сай школаларда айғасчазар. Ӏдӧк сірер , чахсы ӱгреніп, спортнаң , халых тоғыснаң айғазарға маңнанчазар.
Алынҷа алғыс сӧстерін читірчем мында одырчатхан Коммунардағы школаны тоосчатхан Татьяна Дороховаа. Сағаа ЕГЭ-ны чахсы тудыбызарға, анаң вузсар кіріп аларға алғапчам . Піс чыл сай «Саяны» стадионда Хакасияның выпускниктерне иртірчеткен ӱлӱкӱнде паза концертте полып аларға сині хығырчам.
Сірер - иң артыхсар, чемпионнарзар, андағ аттаң пір дее чалтанмаңар. Мыннаң мындар істеністе сірернің кӱстенізіңер сірерге чахсы хабазар. Паба-іҷелерні палаларын чахсы ӧскірген, ӱгреткен ӱчӱн алғыстапчам. Мағаа даа пір хати город мэр хызыҷаамны чахсы ӱгреткен ӱчӱн алғыстас пічиин читірген. Анзын сағысха кирерге дее чахсы.
Хакасия пазының холынаң сыйыхтар алғаннар санында Ағбандағы 1 № школаның 5-ҷі клазын тоосчатхан Зухра Шалгинова полған . Ол ідӧк чахсы ӱгренчеткең халых тоғыстарнаң ӧткін айғасчатхан ӱчӱн таныхтатхан.
Олғаннар Хакасияның пазына чапсых чайаачы сыйых тимнеп пиртірлер. Олар регион устағҷызының тоғызынаңар кибеліс хығыр пиргеннер . Харатастағы гимназияның пис клазындағы ӱгренҷі Илья Ананьев Виктор Зиминге ангелның статуэтказын сыйлап пирген «Пу ангелыҷах Сірернің тоғынҷаң столыңарда турзын. Сірер андар кӧрзеңерӧк, Сірерге сыбыра оң полчадар», - теен оолағас.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде