РЕСПУБЛИКАДАҒЫ АЙМАХ ЧОННЫҢ ИПТІГ ЧУРТАЗЫ
30.05.2017
Хабарлар
Хакасия пазы орынҷызының тоғызын толдырчатхан Владимир Крафт правительство туразында конфессиялар аразындағы чыылығны иртірген.
Хакасияның ӱгредіг паза наука министрінің орынҷызы Юрий Сагалаковтың искіриинең, республиканың 175 ӱгредіг организациязында 4 класстың ӱгренҷілеріне «Основы религиозных культур и светской этики» курстар иртірілче. Пу курстарға регионда 6088 ӱгренҷі чӧрче.
Чыл сай олғаннарның аразында Свято-Иннокентьевскай хығырығлар, «Саблан, пістің тӧреен чир-суум!» викторина паза пасха даа семинарлар, акциялар, тоғазығлар апарылча. Чоннар аразындағы хайызығлар паза религиялар хоостыра школаларда іҷе-пабаларға чыылығлар, класстағы частар «Ынархас хазназы», «Чоннарнаң ынағлазалар», «Піс кӧп нациялығ республиканың чуртағҷылары» темаларҷа иртірілчелер.
Школалар «Хакасияның палалары - Сирияның палаларына» акцияда ӧткін араласчалар. Ідӧк «Ағырчатхан нанҷыңа полыс пир», «Улуғ частығлар кӱніне алғыстастар» акциялар, Алтай аймаанда Баиновтың хығырығлары иртірілче. Олғаннар Чыл пазында аралазарға хынчалар. Иван Матвеевич Штыгашевке чарыдылған мероприятиелер узарадылча. 6-9 майда «Ынархас чоллары» регионнар аразындағы чииттер фестивальы ирткен. Анда Хакасия, Тува, Якутия, Бурятия, Татарстан республикаларның, Омск, Кемеров, Саратов областьтарының, Хызылчар крайының чииттері араласханнар. Ол фестиваль хоостыра «Казановка» музей-заповедникте «Очы пайрам» спорт ӱлӱкӱні ирткен.
Олаңай чуртаста кӧп аймах нациялығ чон чуртапча, харибде, тізең, ідӧк аймах чон, законны сайбап, пиктегде одырча. Пӱӱнгі кӱнде Хакасияда ӱс муңҷа кізі харибде одырча, оларның аразында 1831 кізі религияа киртінче: 1630 кізі православиее киртінче, 104 кізі - исламға, 62 кізі - буддизмге, 35 кізі - пасха киртініске. Че харибзер наа сайбағҷылар кірчелер, хайзылары харибдең сыхчалар, аннаңар пу саннар сыбыра алысча. Колонияларда 6 православнай храм, Худай сӧзін хығырҷаң ікі пӧлік пар. Сынында пу тигіриблерзер 222 ле кізі сыбыра чӧрче. Олар, харибдең сығып, чуртаста орта чол таллап алчалар. Пу чахсы салтар.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде