ХАЙДАҒ СУҒА ӰРЕГ ИДІЛЧЕ, ПАЛЫХ АНДАРОХ ПОЗЫДЫЛЗЫН
24.11.2017
Хабарлар
Хакасияның Ӧӧркі Чӧп кнезі Владимир Штыгашев 22 ноябрьда президиум чыылиин иртірген. Пу чыылығда ӧӧркі чӧптегілер ӱс закон проектін паза Хакасия пазының Россияның Хазна Думазынзар «Аң-хустардаңар» федеральнай законзар алызығлар кирер пастағнаң сығардаңар чӧбін ӱзӱргеннер.
Закон проекттерін алза, олар республиканың хайзы законнарынзар алызығлар кирер сурығнаң палғалыстығ полғаннар. Чоох ӧӧнінде пістің законнарны федеральнайларға килістіре тӱптестірердеңер парған.
Хайығ тартхан Хакасия пазы Виктор Зиминнің федеральнай законзар алызығлар кирердеңер чӧбі. Пу сурығны чарыдып, чоох тутхан республиканың аң-хустарны паза ибіркі чир-чайаанны хайраллирынҷа хазна комитедінің кнезі Владимир Лебедев. Хайди ол таныхтаан, «Аң-хустардаңар» федеральнай законзар алызығлар кирері суғлардағы тіріг ниме-нооларны (чоох парча палыхтардаңар. - Авт.) хайраллирынаң паза оларның санын ӧскірерінең палғалыстығ. Алызығлар кирчеткен закон проектінде иң ӧӧні -хазна субъекттеріне регионның істіндегі суғларында палыхтар санын хайраллирын паза ӧскірерін сыныхтирынҷа полномочиелер пирері. Ӧӧнінде чоох парча чир алтындағы ис-пайны аныпчатхан, чоллар, тахталар пӱдірчеткен паза аннаң даа пасха предприятиелердеңер, хайзылары пос тоғызынаң суғ-кӧллерге ӱрег итчелер. Закон хоостыра олар ӱрегні айландырар пӧгіннең суғларзар ӧленектер позыдарға киректер.
- Хайди кӧзітче чуртас, кӧзіділген субъекттер ол тоғыснаң удаа айғаспинчалар, - искірген Лебедев.
Оларның палыхтарны, ӧскіріп, суғларзар позытчаң специалисттері дее, практика даа чоғыл. Піреезі, ахча тӧлеп, андағ тоғыснаң айғасчатхан специалисттерні, идінҷектерні чаллап алчаох. Закон хоостыра ол киректі сыныхтағда Россияның палыхтирынҷа федеральнай агентствозы тутча. Олар, тізең, хайығ салчалар улуғ суғларға ла, пісте - ол Ким суғ. Аннаңар пу кӧстегҷе палых ӧленектері ӧӧнінде Ким суғ индіре, Хызылчардаң даа оортах позыдылчалар тіп чарытхан хазна комитедінің устағҷызы. Аннаңар регионда тоғынчатхан паза істіндегі суғларға ӱрег ағылчатхан предприятиелерні иң пастап орындағы суғ-кӧллерге хайығ саларына кӱстир пӧгіннең хазна субъекттеріне сыныхтағ полномочиелерін пирерге кирек тіп санапча Хакасияның пазы.
- Орта пастағ, - чарасхан Ӧӧркі Чӧп кнезі Владимир Штыгашев. - Пістің сылтаанда Ким суғ индіре палых санын ӧскірчелер пол парча. Пістің суғларға ӱрег итчелер, палыхтарны мындох позытсыннар.
Ӧӧркі Чӧп президиумы ідӧк Адыгея паза Карачаево-Черкесия республикаларнаң парламенттер аразында пірге тоғынардаңар чӧптезіглер итчең сурығларны кӧрібіскен. Ол чӧптезіглер регионнар аразындағы палғалыстарны тыыдар тіп кӧрілче. Таныхтирға кирек, мының алнында Хакасияның Ӧӧркі Чӧбі андағ чӧптезіглерні Тыва, Алтай, Кабардино-Балкария республикаларнаң, Калининград облазынаң, Крымнаң паза Севастопольнаң ит салған.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде