ПОТРЕБКООПЕРАЦИЯҶА ӰС САРИЛЫҒ ЧӦПТЕЗІГ ИДІЛГЕН
28.11.2017
Хабарлар
Москвада Хакасияның пазы Виктор Зимин, Россия Центросоюзы чӧбінің кнезі Дмитрий Зубов паза республиканың потребитель пірігістері союзының устағҷызы Александр Мальцев пірге тоғынардаңар ӱс сарилығ чӧптезігде хол салыбысханнар. Тоғазығ араласчыларының таниинаң, иділген чӧптезіг потребитель кооперациязын тилідерінҷе пірге тоғыста наа тӱзімніг оңдайларны табарға паза оларны чуртасха кирерге хабазар.
Пістің республикада пу кӧстег Хакасия пазының кічіг паза ыраххы аалларны хайраллирынҷа, тилідерінҷе программазы алылғаннаң сығара чуртасха киріл сыххан. Потребкооперацияны тилідерінҷе подпрограмма ол программа хоостыра тоғынча.
Подпрограмманы чуртасха кирер тус аразына республика хабазиинаң чир тамаан хайраллаҷаң пӱдіріг паза садығ-тимнег пункты пӱдірілген. Хакасияның потребитель пірігістері союзына аал хонии ас-тамаан, арығ-тайға ӧзімнерін садыға тимнеҷең оборудование алылған, амды ол оборудование ӧткін тузаланылча. Республиканың кічіг паза ыраххы аалларынзар ас-тамах паза быт товарларын читірер ӱчӱн, ӧнетін транспорт (автолавка) алылған.
Кӧзіділген подпрограмманың паза пір уғаа кирек пӧгіні - ол тоғысха аалларның, ол санда кічіг паза ыраххы аалларның, чуртағҷыларын тартары.
- Тӧрт чыл мының алнында Хакасияда кічіг паза ыраххы аалларға хабасчаң программа тоғынып пастааннаң потребкооперация тилир ле оңдай албаан, ідӧк хазна хабазиин ал сыххан. Ӧӧні - піс пір аалны даа чідірбеенібіс. Паза анда, хайда потребкооперация хатап чуртасха айландырылча паза тиліпче, аалларның паза пістің чуртағҷыларның наа тоғыс орыннарын тӧстирге, постың улуғ нимес тимнег пункттарын паза производствозын азарға, хоза парыстығ поларға оңдай табылча. Піс федеральнай синде мындағ кӱстіг партнерны, координаторны таап алғаныбыс танығлығ полча, - таныхтаан Хакасия пазы Виктор Зимин.
Устағҷылар закон саринаң тыыдарын кирексіпчеткен пастағларны тибіредерінде кӱстеністерні піріктірерге, ідӧк потребитель кооперативтерінің паза садығ предприятиелерінің пірге тоғызын тилідеріне килістіре оңдайлар тӧстирге киректелчеткенінең чарасханнар. Пу чардыхта уғаа кирек пӧгін полча кооператорларны инвесторларнаң тоғынарына, бизнестегі удур-тӧдір тузалығ пірге тоғысха ӱгредері паза оларға чӧптернең полызары.
- Пістің пірге пӧгінібіс - улуғ тӧл артысхан опыттаң иң чахсызын алары паза хайраллиры. Олох туста - наа ниме хозары паза кооператорларны амғы тустың оңдайларында тоғынарына ӱгредері, олар бизнеснең пірге тоғын полар ӱчӱн. Ол пӧгіннең піс амды улуғ даа партнерларнаң хада ӧткін тоғынчабыс. Кӧзідімге, Садығ-промышленность палатазынаң. Ідӧк пірге тоғыс апарчабыс аал хонии паза промышленность министерстволарынаң паза экономика тилізі министерствозынаң, - таныхтаан Россия Центросоюзы чӧбінің кнезі Дмитрий Зубов.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде