ӦТКӀННЕР ХАҶАН ДАА АЛНЫНДА
29.11.2017
Хабарлар
Пӱӱл Хакасияның орындағы пос устаныс пірігістерінің (ТОС) фестивальы ікінҷізін иртті. Республиканың аал-городтарының пос устаныс пірігістерінің кізілері Боград аалда пол килділер. Фестиваль Боград аймааның культура паза тынағ кінінде ирткен.
Боград аймааның устағҷылары паза пос устаныс кізілері, аалҷыларны удурлап, Культура туразы сценазының ээлері полғаннар. Хакасияның национальнай паза территориальнай политика министрі Михаил Побызаков, фестивальны пайрамни азып, таныхтаан:
- Боград аймааның чонына паза устағ-пастаана аалҷыларны чылығ удурлапчатханы ӱчӱн алғызым читірчем! Ідӧк прай даа аймахтардаң килген пос устаныс киреенең айғасчатханнарға улуғ алғыс! Пістің арабыста тыс пiлбес, ибіркі чуртасты чазирға тартылчатхан, туза ағылчатхан кізілер кӧп. Пӱӱң тізең, піс фестивальға чыылыстыбыс. Мындағ ӱлӱкӱнде пілістернең ӱлезерге, ирткен чылның салтарларын ӱзӱрерге чарир. Иділген киректер, тізең, уғаа кӧп.
Пӱӱл национальнай паза территориальнай политика министерствозы орындағы пос устаныс пірігістеріне ікі марығ чарлаан: «Хакасияның орындағы пос устаныс пірігістерінің тилидері» паза «ТОС-тың иң чахсы эмблемазы». Пу марығларда прай даа пос устаныстар араласханнар. Ағбан, Сорығ, Харатас городтар, Майна посёлок, Улуғ Чорба аал чӧбі паза даа пасха устаныстар устағҷылары сценазар ирткеннер. Министр М.А.Побызаков прайзына араласхан ӱчӱн дипломнар читірген.
Городтар аразында ирткен марығда прайзының алнында Ағбан городтағы «Хызыл Ағбан» пос устаныс пірігізі парча, устағҷызы Л.А.Степанова. Посёлоктар аразында пастағылар санында Кирбі аалның пос устанызы полыбысхан, устағҷызы Л.Е.Назарова.
«Иң чахсы эмблема» марығда алты пос устаныс пірігізі араластыр. Иң чахсы эмблеманы Хакас Республиканың орындағы пос устаныстар ассоциациязы тимнебістір. Чиңісчі дипломы устағҷы Наталья Соколикке читірілген. Эмблемадағы полған на ӧңнің паза танығның тирең сағызы пар. Хакасияның паза Россияның танығлары андар кірчелер.
Фестивальның ікінҷі чардығында чыылған чонны чайаачы ойыннарнаң ӧріндіргеннер. Ағбандағы читі пос устаныс устағҷызы кибеліс сӧзінең постарының тоғызын чарытхан. Хакасияның саблығ артизі Ольга Васильева Хакасиядаңар ырны толдыр пирген.
Боград аймаандағылар «ТОСуемся по-пушновски» хынығ ойын тимнеп салтырлар. Чайаачы саринаң кӧглер, кибелістер, хормачыланыстар паза теелбектер чонға кӧзіділген. Пілдістіг, пос устаныста ӧткін паза чайаачы кізілер тоғынчалар. Піреезі олар ӱлӱкӱннерде ле араласчалар тіп сағынча полар. Че пос устаныстағылар аал-городтар чуртазын иптепчелер. Прай тоғыс тикке иділче. Оларның хайиинда - спорт паза олған площадкалары, баннерлерні иптирі, орамаларны, сыыраттарны арығ тудары паза пасха аймах тоғыс.
Алтай аймааның культура управлениезінің нациялар аразындағы палғалыс специализі Ия Чанкова полча. Ол аймахтағы пос устаныс киреенеңер чоохтап пирген:
- Пӱӱнгі кӱнде пістің орындағы 11 пос устаныс пірігізі пар. Прайзы даа маңнаныстығ тоғынча. Пӱӱл, Экология чылында, пу ккӧстегҷе илееде тоғыс апарылған. Ӧӧнінде ағастар одыртылған. Ызых аалдағылар Майрыхтағы разрезтегілернең харағай ағазын одыртханнар. «Аршандағы разрез» чоннаң 100 тирек одыртхан. Хубачарда «Чиңіс ағастары» аллея тӧстелген.
Фестиваль тузында пос холынаң тимнеен чайаачы тоғыстар кӧзідии парған. Хай пірее устаныс ас-тамах таа тимнеп килтір. Алтай аймаандағыларның Хызыл чазы, Аршаннар, Кӧк хайа аалларның столына хайдағ ла чиис тимнелбиндір! Тадылығ халазахтардаң пасха хуйға даа тимнелтір. Пос холынаң иткен ойнаҷахтар аймаа столларға сыыспинчатхан тиирге чарир. Кӧклӧҷектер, ӧң-пазы порчолар паза хоостар харах ойнатханнар.
Автор :
Елена САГАТАЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде