ТӦРЕЕН ААЛЛАРЫБЫСТЫҢ ЫРЛАРЫ
29.11.2017
Хабарлар
Ноябрь ай В.Г.Чаптыковтың адынаң Хакас филармониязында хынығ концерттерге пай полған. Пастап кӧрігҷілерге Зинаида Аршанова паза Вячеслав Кученов ӧрініс сыйлааннар. Ирткен неделяда, тізең, тахпах-сарыннарны Евгений Улугбашев, Нина Идимешева, Мария Янгулова паза «Хан сын» ансамбль толдырғаннар.
Артисттер наа концерт программазын «Аалыҷаам» адап салтырлар, оларны истіп аларға илееде кізі чыылысхан. Ойын тахпахтарнаң азылған. Полған на ырҷы, тӧреен аймааның тахпаан сіліг ӱннең толдырып, кӧрігҷілернің чӱрек-паарын хайылдырған. Нина Идимешеваны иссең, иң таланттығ чон Таштып чирінде чуртапча тіп санирға чарир. Мария Янгулованың таниинаң, хыйғалар паза кӱлӱктер Орджоникидзе аймаанаң сыхчалар. Асхыстағыларның алнын Евгений Улугбашев алған. Саблығ хайҷы, чатхан саап, Тӧӧ чиріндегі тахпахты сарнаан. Хакас ырҷыларына Аржан Туденев хозылған. Алтай чонның тахпаан истерге таңнастығ полған.
Анаң залға толдыра ыр-сарыннар чайылған. Хакасияның чон артизі Нина Идимешева «Сын киртініс», «Хакасия», «Аалыҷаам», «Хазың» ырларны прай кӧңнін салып толдырған. Хакас ипчілерге, тӧреен чиріне чарыдылған кӧглер концертке килген чонны аптааннар. Олар изебі чох таланттығ чир-суғҷыбысха матап айа сапханнар. Ікі халғанҷы сарынға сӧстерні Нина Серафимовна позы пастыр, кӧӧн, тізең, композитор Юрий Киштеев чайаан. Ікінҷілес чоғыл, саблығ устар, мыннаң мындар хада тоғынзалар, кӧрігҷілерге кӧп ӧрініс сыйлирлар.
Хакасияның саблығ артизі Мария Янгулова фольклор даа, эстрада даа ырларын чӱрекке теерте сарнапча. «Аалыҷаам» концертке ол хызылларның кӧглерін таллап алтыр. «Ой, атас, ой, аладыр» тахпахты Анна Курбижекованаң Алексей Янгулов чайаптырлар. Пӱӱнгі кӱнде, хомзынысха, хызылларның тілін сценада удаа истерге киліспинче, аннаңар Мария Васильевнаның ырлааны чапсых полған.
Кӧрігҷілерні чайаачызынаң Россияның паза Хакасияның саблығ артизі Евгений Улугбашев ӧріндірген. Ис суғ хазында тӧреен ус кӧп кӧг пас салған. «Хара суғ хорлап ахча» - сӧс чох композиция. Аны Евгений Александрович чатхан саап толдырған. Хайҷының кӧӧ кізінің кӧңнін-сағызын амыратча, кӱс хосча. «Ат чарызы», «Чалаң хыстар» - ідӧк сӧс чох улуғ нимес тоғыстар. Чалахай кӧглерні истіп, залдағы чон ізіг чайғыны, часкалығ олған тузын, Тун пайрамны сағысха кирген.
Амғы туста Евгений Улугбашев, хайҷылар ӧмезін тӧстеп, улуғ тоғыс апарча. Концерт тузында кӧрігҷілер чиит ансамбльның пастағы хаалағларынаң танысханнар. Чайаачы ӧмеде тӧрт кізі: Евгений Улугбашев, Вячеслав Албычаков, Дмитрий Сафьянов паза Вадим Тороков. Олар «Ӱгӱ сарыны» паза «Хырығ пістің чирібіс» ырларны хайлап толдырғаннар. Улуғ сағыстығ ӱгӱдеңер сарынға пістің чон хынадыр. «Хырығ пістің чирібіс» кӧгнің авторы - Рустам Иптышев. Сіліг ыр кӧрігҷілернің чӱреен кӧӧреткен. Чиит ансамбльны залдағы чон чылығ удурлаан, итсе, ӧменің узын паалирға ам даа ирте. Ізенчебіс, хайҷылар пістің чонны хынығ ойыннарнаң хайхадарлар.
Алынҷа номерлер тимнеп, сценаа музыкант паза ырҷы Аржан Туденев сыххан. Чиит кізі хобырахнаң паза ыыхнаң хайдағ даа кӧгні ойнидыр, че концертте ол, алтай ырларын сарнап, кӧрігҷілернің кӧңнін кӧдірген.
Фольклор кӧглерін Евгений Улугбашевнең хада музыканттар Татьяна Майнагашева, Ирина Боргоякова паза Аржан Туденев чалтырама толдырғаннар. Хакас артисттернің номерлерін «Ӱлгер» ансамбльның теелбек ӧмезі чазаан.
Хакасияның саблығ ырҷылары чахсы концерт тимнеп салғаннар. Ағбандағылар, оларның узына морсынып, «Браво!» хысхырғаннар паза матап айа сапханнар. «Аалыҷаам» программаны хакас чайаачылар аалларда кӧзідерге пӧгінчелер.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде