ИҢ АРТЫХТАРЫНА - СЫЙЫХТАР
30.01.2018
Хабарлар
Хакасияның иң чахсы ӱгренҷілеріне республика пазының адынаң дневниктер читірілгеннер.
Хакасияның правительство туразында 25 январьда, Россияның студенттерінің кӱнінде, «Республика пазының дневнигі» кибірге кір парған акцияның чиңісчілерін чеестееннер. Аны «Комсомольская правда» газета издательствозының Хызылчардағы пӧлии иртірче.
Пӱкӱлее алза, чӧрімде Хакасияның 29 школазы араласхан: Ағбаннаң, Ағбан пилтірі, Алтай, Таштып паза Шира аймахтарынаң. Анда 1 - 11 класстарның ӱгренҷілері кӱстерінең сынасханнар. Марығ ирткен чылның сентябрьынаң 1 декабрьға теере ирткен, 135 араласчыдаң 12 чиңісчі таллалған. Полған на класстаң пірер чиңісчі табылған. Че сигіс класста ікі ҷиңісчі полған. Ағбан пилтірі аймаандағы Зелёнай аалның чуртағҷызы Дарья Бушминаның паза Сапоговтағы школаның ӱгренҷізі Надежда Николаеваның паалағлар саны тиң полған. Кӱстенҷік хызыҷахтар ӱс ай аразына 206 «пис» паалағ тоғынып алғаннар. Че прайзын Райковтар аалның чуртағҷызы Алина Андина асхан, 5-ҷі класстың ӱгренҷізінің 295 «пис» паалағ.
Иң хазыр марығ ікінҷі паза тӧртінҷі класстар ӱгренҷілерінің аразында партыр. Олғаннар орыс тілінең иң кӧп паалағ алчаттырлар. Таң орыс тілі уроктарында кӧп сурчалар, таң ӱгретчілер пӧзік паалағларға харанминчалар. Таныхтирға кирек, полған на чиңісчі 200 артиинаң «пис» паалағ тоғынып алған.
Губернатор Виктор Зиминнің адынаң республиканың иң артых ӱгренҷілерін Хакасия пазы администрациязының устағҷызы Валерий Денщиков алғыстаан. Ол таныхтаан: «Полған на «пис» паалағда ӱгренҷінің не кӱстенізі нимес, ідӧк ӱгретчілернің тоғызы паза паба-іҷелернің хабасханы пар. Ӧменең тоғынып, сірер улуғ чидіглерге читкезер». Ідӧк Валерий Васильевич акцияның тӧстегҷізін «Комсомольская правда» газета издательствозының Хызылчардағы пӧлиин алғыстаан.
Акцияның чиңісчізі Надежда НИКОЛАЕВА іҷезі Алевтина Васильевнанаң хада Мероприятиеде Хакасияның ӱгредіг паза наука министрі Лариса Гимазутина араласхан. Аның таниинаң, ол чиңісчілернің кӧбізінең чахсы таныс. Олар олимпиадаларда, марығларда, наука-практикалығ конференцияларда ӧткін араласчалар. Лариса Николаевна таланттығ олғаннарға мыннаң мындар ідӧк чахсы ӱгренерге, улуғ чидіглерге чидерге алғаан.
8-ҷі класстың ӱгренҷізі Надежда Николаеванаң хада мероприятиее аның іҷезі Алевтина Васильевна (хыс фамилиязы - Какашкина) паза класс устағҷызы Ольга Васильевна Смолина килгеннер. Іҷезінің чооғынаң, сӧбіреде ікі пала, Надя - улии. Ол чахсы ӱгренерге, іҷезіне полызарға маңнанча. Ӱгретчізі Ольга Васильевна таныхтаан: «Пістің класста 19 олған, Надя прайзынаң артых ӱгренче, пасхазына ӱгредіге тартыларға чахсы кӧзідім полча. «Республика пазының дневнигі» акцияда пастағызын на араласчабыс, Надяның ӱчӱн тың ӧрінчебіс».
Чиңісчілерге сыйыхтар читірілген соонда, оларны сомға суурғаннар, татхыннығ чейнең сыйлааннар паза, республиканың музей-культура кінінзер апарып, экскурсия иртіргеннер.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде