ЫНАРХАС БРИЛЛИАНТТАҢ ДАА ААРЛЫҒ
14.12.2018
Хабарлар
Культура. Хакас драма театры кӧрігӌілерні наа ойыннаң ӧріндірді
(Ойынны театрның ӧӧн «чылтыстары» кӧзітчелер)
Халғанҷы айларда саблығ театр хынығ премьераларға пай полды. Ноябрьда кӧрігҷілернің режиссер Саяна Ултургашеваның «Он и она» наа тоғызынаң танызып алар оңдай полған. Пу кӱннерде, тізең, «Аарлығ минің тонағҷыларым» кӱлкістіг ойынның премьеразы ирткен. Спектакльның режиссеры Марас Чеббур полча.
Аның полтазы мындағ. Царёва, Лыткина, Кузя паза Соня - ӧӧрелер. Олар пір класста ӱгренгеннер, ынағласханнар. Царёва (Мария Кыстоякова) 1990 чылларда, американецке ирге парыбызып, США-зар кӧс парыбысхан. Соня (Гульфия Кокова) прай чуртазын имҷі-терапевт полып істенген. Лыткина (Светлана Чаптыкова) амға теере школада орыс тілі паза литература уроктарын апарча. Кузя (Татьяна Майнагашева) - читі паланың іҷезі. Пӱӱнгі кӱнде прайзы тынағда.
Абахайлар, кічігдең сығара ынағлассалар даа, кӧп чыл кӧріспиндірлер. Оларны США-даң айлан килген Царёва чыып алча. Чоох-чаахнаң одырып, ипчілер чиит тустарын, ирткен чылларын сағысха
кирчелер, анаң ... банкты тонабызарға чаратчалар.
Афишада спектакль «кризистең тоғыр кӱлкістіг ойын» чіли таныхтал партыр. Андар хоза «кізінің кӧңнін кӧдірче, депрессиянаң харбазарға полысча» пас саларға кирек. Оӧн матырларның хылынчатханын кӧріп, залдағы чон ээреп хатхырчатхан. Имҷі Соня Каплан национальнозы хоостыра еврей. Оӧрелері аннаң ноға хызыңзар Израильзер кӧспинчезің тіп сурғаннарында, абахай анда саңай ла еврейлер чуртапчалар тіп нандырча. Ӱгретчі Лыткина саарбахтарның сӧстерінең ӧткін тузаланча. Аның прай ниме «ништяк» паза «клёво». Ӱгренҷілернең тіл чахсы алысчатхан ӱчӱн, Лыткинаны школадаң пір дее позыдарға хынминчалар.
Читі паланы чон аразына кир салған Кузинаның (сола ады Кузя) спектакльларға, концерттерге чӧрҷең ахча чидіспинче, аннаңар ол кӱннең кӱнге сериаллар кӧрче. Итсе-де, ол син нимее тынағдағы ипчі хомзынминча. Палалары ла хазых полза, ол піди дее чуртап парыбызар. Царёваны школада тиктең нимес «Царевна» тіп солалап салтырлар. Абахайға ӧӧрелерінең нимес, полкнаң устирға кирек. Банкты тонабызарға - аның сағызы. Итсе-де, аның чуртазы США-да тың на киліспиндір, аннаңар ол тӧреен чирінзер айланарға чараттыр.
«Аарлығ минің тонағҷыларым» - чарых ойын. Спектакльның ӧӧн матырлары ачых-чарых кӧңніліг, ах сағыстығ кізілер. Тоғасханда, олар школа тузын, хада хонғаннарын сағысха кирчелер, че олох туста пірдеезін сӧклебинчелер, сидіксіністерні тобырарға кӱстенчелер. Улуғ ахчаны холға кирзе, абахайлар чабды, істі чох паза чабал сағыстығ ӧрекеннерге айлан парарлар тіп чочыныс полған. Че олар, ахчаның айналығ кӱзіне пастырбин, ынархасты бриллианттаң даа пӧзік паалапчалар.
«Аарлығ минің тонағҷыларым» спектакльны кӧріп аларға кічіг залға чон тығырама чыылысхан. Пос орыннар чидіспинібіскенде, театр тоғынҷылары хоза одырчыхтар киргеннер. Сизінгенде, кізілер хакас сценазының ӧӧн «чылтыстарын» Мария Кыстоякованы, Татьяна Майнагашеваны, Гульфия Кокованы, Светлана Чаптыкованы кӧрерге килгеннер. Ойын тузында залдағы улус «чахсы ойнапчалар», «морсымнығ кӧрінчелер», «устары чылдаң чылға тыып ла одырча» сыбыхтасчатхан. Чоохтирға кирек, спектакльда пизінҷі матыр пар. Чиит артист Митхас Абдинге официантты, банк тоғынҷызын, грузчикті ойнирға киліскен. Хакас оолны махтирға кирек, «чылтыстарнаң» пір сценаа сығып, ол пір дее чідірінмеен.
Тиксі алза, Марас Чеббур чахсы ойын турғыс салған. Спектакль чалахай музыкаа паза теелбектерге пай. Анзы кӧрігҷілернің кӧңнін уламох кӧдірче. Хоосчы Влада Чаптыкова сценаны килістіре чазап салтыр. Кічіг залда орын кӧп нимес, че столлар, одырчыхтар, чоон сумкалар прай сыып парғаннар, сцена даа тарғынҷах кӧрінминче.
Чуртастарың аар пілдірібіссе, «Аарлығ минің тонағҷыларым» ойынны кӧріп аларға чӧп пирерҷікпін. Ол сірерге аннаң андар хаалирға, хайдағ даа сидіксіністерні тобырарға кӱс пирер. Ойынны кӧріп, кізі сынап тынанып алча, чобағларынаңар ундутча.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде