КИЛЧЕТКЕН ЧЫЛ ТӰЗІМНІГ ПОЛЗЫН
19.03.2019
Хабарлар
Аршаннарда - Чыл пазы. Алтай аймааңдағы Аршаннар аалда аймах синінде Чыл пазы ӱлӱкӱн таныхталған. Андар аймахтың прай аал чӧптерінің чуртағӌылары килгеннер. Ідӧк анда Хакасияның национальнай паза территориальнай политика министрі Михаил Побызаков араласхан.
- Прайзын ӱлӱкуннең алғыстапчам. Сiрернi Аршаннар чирiнде удурлапчабыс. Ол чонға, хара тасха пай чир. Мындағ ӱлӱкӱнде прайзына хазых, ырыс алғапчам, - аалҷыларны талған-айраннаң удурлап, алғыстаан Ефросинья Ефимовна.
Пайрам пасталғанда, ӱлӱкӱнi апарчатханнар прай чонға чарых чуртас алғааннар. Чонның мал саны ӧзіп одырзын. Малға оттаҷаң чир ползын. «Ӧрiніс» чон ансамбльы килген кізілерні «Чыл пазы» сарыннаң удурлаан.
Алтай аймаа пазы Татьяна Раменская, сценаа сығып, чир-суғҷыларын алғыстаан.
- Чалахай кӱннең, аарлығ чир-суғҷыларым паза аалҷылар. Прайзын Чыл пазынаң алғыстапчам. Пӱӱң иртеннең сығара анда-мында алғастар истілче. Мал саны ӧcсiн, чир тамаа чахсы сыхсын. Алтай аймаа администрациязы адынаң чыылысхан чонға хазых паза часка алтапчам.
Анаң сӧс Хакасияны национальнай паза территориальнай политика министрі Михаил Побызаковха пирiлген.
- Чыл пазын республиканың кӧп аал-городында таныхтапчалар. Хакасияда 100 артиинаң нация чуртапча. Чыл пазы, тізең, хакас чонның ӱлӱкӱнi полча. Аарлығ чир-сутҷыларым, часкалығ, хазых полыңар. Кӧңнiлерібіс ачых-чарых ползын, сағынған сағыстарыбыс толзын, килчеткен чыл тӱзімнiг ползын. Хазааға толдыра мал ползын, тураа толдыра пала ползын. Чир-чайаан чыл тооза піске чахсы кӱннер сыйлазын, - алғаан Михаил Побызаков.
Аалдағы Культура туразы алнында узун стол турғызылғаң. Анда аал чӧптері постары тимнеен татхыннығ ас-тамахты чонға амзирға турғысханнар. Хости от тамызылған. Улуғ хазанда чарба ӱгре пызырылған.
Олғаннарға ідӧк алынҷа стол тимнелген. Анда олар иблерінде тимнеен ас-тамахты сатханнар. Аршаннар аалындағы школаның ӱгренҷізі Наташа Боргоякова іҷезінең хада тимнеен плинелерні садыға сығарған.
- Іҷемнең хада плинелер тимнеебіс, - чоохтапча Наташа. - Пір плинені он салковайға сатчам.
Откін хызыҷах, ӱлӱкӱнге килген чонны аның татхыннығ ас-тамаан чіп аларға хығырып, матап хысхыр турған.
Алғыстас сӧстері соонда, Ефросинья Сагалакова прайзын хара чаламаларны ӧртирге, ӧңніг чаламаларны ах хазыңа палғирға хығырған. От тамызылғанда, прайзы аны ӱс хати ибіріп, хара киректерні таныхтапчатхан чаламаларны анда ӧртебіскен. Чон узы чонға кибірлерні орта толдырардаңар чарытхан. Аның соонда чыылысхан чон чарых кӱнні удурлаан. Аал чуртағҷызы Нина Ивандаева прайзынаң хада ағасха хызыл чалама палғаан.
- Хызыл чалама кӱнні таныхтапча. Аны кӱн чахсы чарызын тіп палғапчалар. Хазыңнаң чахсы, чарых чуртас ползын тіп сурынарға кирек. Мин чуртас чахсы парзын, прайзы хазых ползын тіп сурынғам, - чоохтаан Нина Николаевна.
Ӱлӱкӱнде ӧӧн сценада республиканың саблығ ӧмелері кӧрігҷілерні сарын-теелбектернең ӧріндіргеннер. Концерттең пасха спорт марығлары ирткен. Олаңай кӱресче спорт узы Олег Торбостаев кӱрес мариин иртірген.
- Тӧреен чирім Таштып аймаандағы Харағай аал полча. Спортнаң кічігдең айғасчам. Армия соонаң олаңай кӱреснең айғас сыххам. 1993 чылдаң сығара Аршаннар аалында тренер полып тоғынчам. Пӱӱнгі марығда улуғлар даа, кічіглер дее араласханнар. Спорт министерствозы чиңісчілерге ӧнетін сыйых тимнеп салған. Мының алнында спонсорлар полызиинаң сыйыхтар алҷаңмыс, - чоохтапча Олег Торбостаев.
Ӱлӱкӱнде, кӱрестең пасха, арғамҷы тастирынҷа, тас хабарынҷа паза арғамҷы тартарынҷа марығлар ирткен.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
31 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде