КОРОНАВИРУС, ӰГРЕДІГ ЧЫЛЫ, ЧОЛЛАР...
14.07.2021
Хабарлар
Кӧні эфир. Хакасия пазы Валентин Коновалов молҷаан хоостыра полған на штаб чыылии соонаң социальнай сетьтерде чуртағҷыларнаң палғалысха сыхча
Кӧні эфирнің ӧӧн чардығы республикадағы эпидемиология киреене чарыдылған. Ол, тізең, чахсы ла нимес. Кӱннің сай ағырыбысханнарның саны ӧсче паза ӱрееннернің саны хозылча. Имҷілер полған на кізінің чуртазы ӱчӱн харбасчалар. Пу тоғыс тудығлар чох апарылча, республикада имнер читкіңе. Имҷілер чидіспинчеткенінең паза табырах имнег полызиин пирчеткен служба тоғызында улуғ нимес сидіксіністер пол парча. Валентин Коновалов республика чуртағҷыларын нандырығлығ поларға хати-хати хығырған.
Анаң Валентин Коновалов социальнай сетьтердегі страницаларынзар кірген сурығларға нандырығ пирген:
- Пии аймааның Новокурск аалындағы чуртағҷы суғ сығарҷаң станция хаҷан тыхталар тіп сурған. Аалда ол ӱс чыл мының алнында тыхталған. Орындағы ӱлгӱ суғ сығарҷаң станция хатап оодыл парғаннаңар піске ӱр ниместе ле искірген. Амды Хакасияның пӱдіріг паза чурт-коммунальнай хоных министерствозына мин пу сурығны пӧгерге чахығ пир салғам, тыхтағ тоғыстарына ахча позыдарға тимдебіс.
КОРОНАВИРУС, ӰГРЕДІГ ЧЫЛЫ, ЧОЛЛАР...
Ідӧк минзер студенттер удаа айланчалар. Олар ӱгредіг чылы алнында коронавирустаң тоғыр прививка турғыстырарға кирек пе тіп сурчалар. Республиканың ортын профессиональнай ӱгредіг организацияларының студенттеріне піс вакцинацияны кӱснең иттірбеспіс. Мындағ чарадығны олар постары аларға киректер. Федеральнай ӱгредіг учреждениелері хоостыра, тізең, ол ХГУ паза ХТИ, чарадығ Россия синінде алылар.
- Чуғынҷах ағырығны хаптырғннарның саны хозылчатханда, прай учреждениелер чабылар ба?
- Сынында, чабызарға ӱр нимес, че аның салтары республика экономиказына хомай теелер. Ізенчем, піске андағ чарадығ аларға киліспес, че имнег тураларында орыннар чидіспин сыхса, локдаун кирерге килізер.
- Ноға республикада хайдағ вакцинаа ізенчезің, аны таллап аларға чарабас?
- Амды Хакасияда ӱс кӧрім вакцина пар - ол «ГамКОВИД-Вак» алай ба «Спутник V», «ЭпиВакКорона» паза «КовиВак». Халғанҷы ікі вакцинаны хайраллирға сидік нимес, аннаңар имҷілер оларны ыраххы аал-городтардағы чуртағҷыларға турғызарға кӱстенчелер. Аннаңар «ЭпиВакКорона» паза «КовиВак» вакциналар андар ызылчалар. «Спутник V», тізең, регионның ӧӧн городынаң ырах нимес орныхчатхан муниципалитеттер чуртағҷыларына турғызылча. Пу вакцинаны хайраллирға ӧнетін оборудование киректелче нооза.
- Харатаста чоллар уғаа хомай.
- Городтың пу иң ағырсымнығ сурии полча полар, неке. Чуртағҷылардаң даа кӧп хоп кірче. Федеральнай кін Хакасияа чолларны иптирге ахча позытса, піс аны Харатассар ысчабыс. Че андағ даа полза, Харатас администрациязына чуртағҷылардаң хоптар ам даа кірче. Аннаңар пу сурығны пӱкӱлее пӧгерге кӱстенербіс.
- Ӱгредіг чылы хайди пасталар?
- Анзын амды чоохтирға сала ирте. Августта республикада эпидемиология кирее хайдағ полар, ағаа тӧстеніп чарадығ аларбыс.
- Пии аймаандағы Новокурск аалда олған садының пӱдірии хайди парча?
- Олған сады ам даа пӱдірілче. Пӱдіріг тоғыстарынаң айғасчатхан подряд организациязына ізеніс чох полтыр. Ирткен чылда Пии аймааның администрациязы аннаң чӧптезігні тохтатхан, че пӱӱл ол марығны хатап утып алған. Ізенчем, Пии аймаа администрациязы подряд организациязынаң тіл алыс полар паза олған садының пӱдірии пӱӱл тоозылар. Пу сурығны республиканың правительствозы хайығда тутча.
- 17 частығ чуртағҷыларға прививка турғыстырарға кирек пе?
- Прививка турғыстырардаңар полған на кізі позы чарадығ алча. Че 17 частығларға республикада вакцина чоғыл, амғы вакциналар 18 частаң улуғ кізілерге кӧріл парғаннар. Амды специалисттер «Спутник Лайт» вакцина сығарарға тимненчелер. Ол 14 частығ саарбахтарға кӧріл парған. Че ол ам даа чоғыл.
- Ағбандағы Н.М.Одежкнннің адынаң харах нмнеҷең имнег туразын чабысханда, андағы операциялар тохтадылғаннар. Кізілерге, тізең, харахха операцня иттірерге кирек. Хайди піске поларға?
- Чуртағҷыларға харахха операцияны соона салдырар оңдай чох полза, піске хонҷых регионнарзар айланарға килізер. Арса, анда операция ит пирерлер. Че республикада эпидемиология кирее чахсыланғанҷа, харах имнеҷең имнег туразы азылбас.
Халғанҷызында республиканың чуртағҷызы Хакасия пазы Валентин Коноваловтаң ол Хазна Думазынзар парар ба тіп сурған.
- Мин иң пастабох Хазна Думазынзар КПРФ-тың списогынаң парардаңар искірген полғам. Партия пір ӧменең парча нооза. Че минің Хазна Думазынзар кірер сағыснаң табығларда аралазар пӧгін чоғыл. Табығлар хайди даа ирт парзалар, мин республикада табығҷыларымнаң хада халарбын, - таныхтаан чооғында Валентин Коновалов.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде