СIЛIГ ПОЛАРЫ – ЮЛЯДАҢ
Чуртаснаң тиңе. Юлия Идимешева ипчi чонны сiлiглирiнең айғасча. Пӱӱнгi кӱнде андағ специалисттi «визажист» тiп адапчалар
...Кiчiг частығ хызыҷах iҷезiнiң сырланчатханын кӧрерге тың хынҷаң. Ол туста ағаа паза пiр дее ниме кирек чох тiп пiлдiрҷең. Хынған ойнаҷахтарын даа оортах сал салҷаң. ӧскен сынынаң стол пӧзиине читкелек позы одырчыхты, кухнядаң сӧӧртеп килiп, кӧрiндес хыринзар турғызыбысчаң. Анаң, андар чадап-чудап одырып алып, холыҷахтарынаң столға тiренiп, чағын кiзiзi ирнiлерiн хызартчатханын кӧрiп пастаҷаң. «Улуғ ӧс парзам, мин iдӧк сырлан турарбын. Прайзынаң ӧкерек поларбын!» – сағынҷаң хызыҷах андада.
Iҷезi хости одырчатхан палазын пазынаң сыйбабысчаң, наағынаң охсаныбысчаң. Пiр дее ниме чоохтанмаҷаң ол, кӱлімзіреп ле салҷаң. Че удаа полҷаңнар андағ киректер, хаҷан iҷе кiзее палазына хатығ чоохтанарға килiс парҷаң.
– Улуғларым кӧрбеен аразында мин iҷемнiң сырланҷаң ниме-ноозын алып алҷаңмын. Анаң позымны алай ба кӧклӧлерiмнi «сiлiг» ит салҷаңмын. Кiчiг пала теньнернең, помадаларнаң орта тузаланарға пiлбинче нооза. Салааларынаң прай хасхлап салча. Мин iдӧк прай нименi чудат салҷаңмын. Позымның даа, кӧклӧлерiмнiң дее сырайларынзар кӧрерге хынығ полҷаң. Iҷеме, тiзең, хынығ полбаҷаң. Сырланҷаң ниме-ноозын ӱрет салған ӱчӱн удаа хырыстырҷаңмын, – сағысха кирген Юлия.
Андағ даа полза, аның сiлiге тартылызы чітпеен. Пу кирекнең айғазар сағыс улуғ ӧскеннең уламох тыыған.
Юлия Идимешева, хыс фамилиязы Кильчичакова, Н.Ф.Катановтың адынаң национальнай гимназияда 9 класс тоосхан. Профессия таллирында аның iдӧк iкiнҷiлес чох полған.
– Андада Катановтың адынаң Хакас хазна университедiнде «Прикладная эстетика» кӧстеглiг колледж азылған полған. Анда ипчiлернi сiлiглеҷең специалисттернi тимнеҷеңнер. Мин андар ӱгренерге кiрiп алғам. Амғы туста ол колледж чоғыл. Че, хайди прайзы пiлче, пӱӱнгi кӱнде кiзiнi сiлiглеҷең устарның полызығларынаң чахсы тузаланчалар. Оларға пiлiстерін тилiдер курстар iдӧк асхынах нимес апарылчалар. Мин дее, оңдай полза, андағ курстарны иртiбiзерге кӱстенчем, – чооғын узаратхан Юлия.
Iди ол визажисттiң, стилисттiң курстарын иртiбiскен. ӧнетiн ӱгредiглiг кiзiнiң пӱӱнгi тоғызы хыстарның, ипчiлернiң сырайларын ипти сырлиры полча. Юля ирге парчатхан хыстарны той полар кӱнге тимнепче – сырлапча, састарын иптепче. Пайрамнығ тӧреен кӱннерiн таныхтапчатхан ипчiлер iдӧк чиит специалистсер хынып айланчалар. Холы чарапчатхан хыс прайзының кӧңнiн кӧдiр пирче. «Миннең прайзы сiлiг сыхча. Анаң ӱлӱкӱн-пайрамнары ирт парза, социальнай сетьтердегi страницаларымда мағаа ӱндезiглер пас пирчелер: «Улуғ алғыс, Юля! Минiң прическам той тооза тудылған. Iкiнҷi кӱнiнде дее наа ла ит салғанға тӧӧй полған». Паза пасха даа алғыстастар пасчалар. Тоғызым ӱчӱн мындағ паалағлар пирчетселер, чӱрееме тың истiг полча», – тiпче ол.
– Паза «Мисс Абахай», «Королева Хакасии» марығларда араласчатхан хыстар минзер айланчалар. Кӧзiдiмге, пылтыр ирткен «Королева Хакасии» марығның араласчызы Анна Казагашеваны тимнеем. Ол чиңiсчi полыбысхан! 2021 чылда полған «Мисс Абахай» марығның чиңiсчiзi Елена Боргоякованы минӧк сырлаам, сазын иптеем, – ӱлескен чидiглерiнең чиит ус.
ӧсчеткен тӧлнiң, састарына хоза сас ӱрiп, прическалар идерi кӧңнiне кiрче. Аннаңар Юлия Идимешева, чуртаснаң тиңе хаалап, пу кирекнең дее ӧткiн айғазып пастаан. Iдӧк ӧнетiн курстар иртiбiзiп, чiзе. Таныхтирға кирек, чиит iҷелер хыс палаларын ус холлығ Юлязар хынып ал чӧрчелер.
Юлия Идимешева кiзiнi сiлiглирiнең он азыра чыл айғас парир. ӱр ниместең сығара, тiзең, опыт алынып алған ус пу кирекнең айғазарға сағынчатхан чииттерге курстарны позы апар сыххан. ӱгредiг программазын позыох пазып алча. Сағамғы наа технологиялар пик орных парған туста искiрiглер табырах тарап парчалар нооза. Юлия социальнай сетьтердегi страницаларында ӱгредiглiг курстар пастапчам тiп пас салзох, кӧңнiлiг кiзiлер сах андох табыл парчалар. Анаң сағам арендаа суурчатхан салонындағы алынҷа кабинетте Юлия курстарын апарча.
Хайди тiпчелер, чуртаста толдырар иң ӧӧн кӧстеглернiң пiрсi хынған тоғыста iстенерi полча. Юлия Идимешева ол сағызын толдырған. Паза пiр кӧстег – сӧбiре тӧстирi. Визажист, стилист полчатхан хыс аны iдӧк турыстыра толдырыбысхан. Хада хонғаны Евгений Идимешевнең iкi оолах ӧскiрчелер. Улии iкiнҷi класста ӱгренче, кiчии iкi частығ. Сағынчабыс, чиит ирепчiнiң хызыҷах хайди даа полар. Юлияа кiзiні сiлiглеҷең киреен узарадар пала кирек ле нооза. Ол аны, хаҷан-да позының iҷезi чiли, кӧрiндес алнында одыртар, наағынаң охсанар, хай пiрее тустарда сырланҷаң ниме-ноозын ӱрет салған ӱчӱн кӧмес хырызыбыс таа турар...
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 31 | 1 | 2 | 3 | 4 |