ПУСТА ХАЗЫР КӰРЕЗӀГЛЕР ПАРҒАН
07.02.2017
Хабарлар
Ирткен неделяда Ағбандағы «Саяны» стадионда А.В.Мельниковтың адынаң «Ӱрілген меспек» клубтың меспектіг хоккейҷе тиксі Россия марииның финал ойыннары пайрамни азылған. Марығда 2005-2006 чылларда тӧреен оолағастар араласча.
Хакасияда меспектіг хоккейҷе сигіс команда чыылысхан: Кемеров, Хызылчар, Архангельск, Киров, Иркутск, Хабаровск городтарның, Индiркi Новгород облазының паза Ағбандағы ДЮСШ-ның командалары. Марығ 2 февральдаң 9 февральға теере иртче.
Пастағы ойын 9.00 часта пасталған. Мында Архангельсктегі «Водник» паза Индіркі Новгород облазының піріктірілген командалары тоғасханнар. Ойын пасталар алнында командалар, хурчаға турып, хыйғыларнаң кӧңнілерін кӧдіргеннер.
Ойын пасталғандох, «Водник» «ыырҷызын» хыс сыххан. Индіркі Новгород облазының командазы меспекті чадап-чудап ла «ыырҷы» саринзар читіріп алҷаң. Мына «Водник» атакаа пар сыхты, че Индіркі Новгород облазының командазы, постарының саринда меспекті пылап алып, контратакаа пар сыххан. Іди олар меспекті пулуңнаң пирҷең оңдай тоғынып алғаннар, угловой сапханда, «Водник» меспекті хаалхазынаң оортах сабызарға кӱстенген, че Индіркі Новгородтың хоккеизі Руслан Сущев меспекті, тудып алып, хаалхаа кире сапхан. «Водниктің» хаалха хадағҷызы командазына полыс полбаан. 18-ҷі минута тоозылғанҷа 1:0 сан полыбысхан. Андағ саннаң пастағы тайм тоозылған.
Ікінҷі таймда индіркі Новгород облазының командазы пастағы минуталардаң «ыырҷыны» хыс сыххан, ікінҷі гол кирібізерге маңзыраан. Че «Водник», меспекті холға киріп, контратакаа пар сыххан. Индіркі Новгородтың хоккеизі Дмитрий Атамашкин «ыырҷызын», правилоларны сайбап, тохтадып алған, ағаа тӧрт минута штраф пирілген.
Индіркі Новгород облазының командазы пір ойынҷызы чох халған, «ыырҷызына» хыстыр сыххан. 32-ҷі минута парчатханда, Александр Кузнецов меспекті Авдей Мыльниковха читірген. Анзы меспекті прай кӱзінең хаалхаа кире сапхан - 1:1. Индіркі Новгородтың ікінҷі тренері, ачырғанып, олғаннарны трибунадаң хырыс сыххан.
Командалар теести атакаа парған даа ползалар, ойында сан паза алыспаан.
Пастағы ойын тоозылғаннаң 10 минута ирткенде, ікінҷі матч пасталыбысхан. Пуссар Иркутсктаң килген «Юность-ИЦС» паза Хызылчардағы «Енисей» командалар сыхханнар. Ойын пасталғандох, «Енисей» атакаа пар сыххан. «Юность-ИЦС» команданың олғаннары полған на атаканы тохтат турғаннар. Че 7-ҷі минутада «Енисей» команда атакаа парчатханда, «Юность-ИЦС» олғаннары меспекті аутсар сабысханнар. Вадим Уполовников меспекті пулуңнаң Евгений Николаевке читірген, анзы хаалхазар кӧні сабысхан - 1:0. Че «Юность-ИЦС» команда утырарға хынмаан. Пазағыох атакада олар меспекті «ыырҷының» хаалхазынзар сапханнар, че меспек штангаа тееп парған. пастағы тайм тоозылчатханда, «Енисей» пазох пулуңнаң меспекті сапхан. Че «Юность-ИЦС» «ыырҷаа» пулуңнаң гол кирібізерге оңдай пирбеен. 20-ҷі минута тоозыл парғанда, Антон Савлук ікінҷі гол кирібіскен. Пастағы тайм соонда «Енисей» 2:0 саннаң утчатхан.
Ікінҷі таймда «Енисей» «Юностьха» ідӧк маң пирбеен. 23-ҷі минута парчатханда, Евгений Хвалько, «Юность-ИЦС» команданың прай хоккеисттерін алаахтырып, ӱзінҷі гол кирібіскен. Ӱс минута пазынаң Евгений Николаев («Енисей») тӧртінҷі гол кирібіскен. Ойын тоозылчатханда ла «Юностьтың» капитаны Данил Пашков пір гол киріп алған. Іди «Енисей» 4:1 саннаң утхан.
Мыннаң иртенгі ойыннар тоозылған. Олох кӱнде 15.00 часта «Ӱрілген меспек» клубтың марығлары пайрамни азылған. Анда Ағбан город пазы Николай Булакин, Хакасияның меспектіг хоккейҷе федерациязының президентi Юрий Шпигальских, республиканың спорт министрінің пастағы орынҷызы Виктор Струков паза Ағбан город администрациязының физическай культура паза спорт комитедінің пастығы Евгений Осадчук араласханнар. Прайзы, олғаннарны марығ азылғанынаң алғыстап, мыннаң мындар устарын тилідерге алғаан, пу марығда кӱҷӱрлестер чох ойыннар иртеріне ізенген. Алғыстас сӧстері соонда олғаннарға тадылығ сыйыхтар читірілген.
Марығлар азыл парғанда, пуссар «ДЮСШ Абакан» паза Кемеровтаң килген «Кузбасс» командалар сыхханнар. Ойын алнында «ДЮСШ Абакан» команданың тренері Игорь Лопухин команда финал ойыннарына хайди сыхханнаңар чоохтаан.
- Сибирь зоназындағы марығ Кемеров городта ирткен, - теен Игорь Геннадьевич. - Піс, марығның финалисттері полып, таллағ чох финалға сыххабыс. Че пӱӱлгі финалға таллағ ойыннарында хайди даа ойнирға киректелген. Кемеровта піс тӧртінҷі орынға сыххабыс. Анда, олғаннарның узын кӧдірер ӱчӱн, хоккеисттерні удаа алыстыр турарға оңдай полған. Пастағы орынға сығып аларына ізенчебіс.
Тренернің чооғын искен чіли, «ДЮСШ Абаканның» пастағы атаказындох 37-ҷі секундада команда капитаны Виталий Дроздов меспекті хаалхазар кире сабысхан. Читінҷі минута пасталғанда, Сергей Кильчичаков «Кузбасстың» хаалхазына ікінҷі гол кирібіскен. 20-ҷі минута парчатханда, «Кузбасс» хоккеизі Аркадий Волосевич, «ыырҷызын» клюшканаң сапхан ӱчӱн, тӧрт минутаа ойыннаң суурылған. Ол сылтағнаң ікінҷі таймны «Кузбасстың» он на хоккеизі пастаан. Аннаңар даа таймның ікінҷі минутазында, Матвей Лышко пас пиргенде, ДЮСШ капитаны Виталий Дроздов ӱзінҷі голын кирібіскен. Ӱс минута пазынаң Сергей Кильчичаков тӧртінҷі голын киріп алған. Ойынның 33-ҷі минутазында Виталий Дроздов, «ыырҷызын» клюшканаң хаптырған ӱчӱн, тӧрт минутаа ойыннаң сығардырған. Че «Кузбассха» анзы полыспаан, Ағбанның командазы 4:0 саннаң утхан.
Паза пастағы кӱнде «Родина» (Киров) паза «Ерофей» (Хабаровск) тоғасханнар. Пу командалар тиң ойнааннар. Ойын 1:1 саннаң тоозылған.
Пазағы кӱннерде ДЮСШ олғаннары пасха командаларға утып аларға оңдай пирбееннер. Іди пістің оолағастар марығның ікінҷі кӱнінде «Родина» (Киров) команданы 2:1 саннаң утып алғаннар. Пістің команда ӱчӱн Сергей Кильчичаков (12 метрдең) 9-ҷы минутада паза
аныңох полызиинаң Матвей Воробьев 21-ҷі минутада голлар киріп алғаннар. «Родина» пір голнаң нандырып алған. Аны 12-ҷі минута тоозылчатханда, Матвей Венеев пас пиргенде, Артем Пысин кирібіскен. Пасха ойыннарда «Водник»-«Кузбасс» 0:1, «Енисей» - «Ерофей» 2:1 паза «Юность» - «Индіркі Новгород обл.» 0:1 ойнабысханнар.
Марығның ӱзінҷі кӱнінде «Ерофей» паза «ДЮСШ Абакан» командалар аразындағы ойын 2:2 саннаң тоозылған. ДЮСШ-тың ӱчӱн голлар Андрей Суворов паза команда капитаны Виталий Дроздов киргеннер. «Ерофей» командада - Кирилл Рекунов штрафнойдаң паза Леонид Ильяшенко ойыннаң. Пасха ойыннарда «Родина» - «Юность-ИЦС» 1:2, «Водник» - «Енисей» 2:5 паза «Индіркі Новгород обл.» - «Кузбасс» 1:0 саннарнаң ойнабысханнар.
5 февральда марығлар узарадылған. Ол кӱн ідӧк хазыр ойыннар парған. Пістің оолағастар Индіркі Новгород облазының командазына нандырығлығ чох ікі гол кирібіскеннер. «ДЮСШ Абакан» команданың ӱчӱн Матвей Воробьев 19-ҷы минутада пос сабыснаң паза Сергей Кильчичаков 32-ҷі минутада ойыннаң голлар киргеннер. 2:0. Пасха ойыннарда «Родина» - «Водник» 3:0, «Ерофей» - «Юность-ИЦС» 1:0 паза «Кузбасс» - «Енисей» 0:3 саннарнаң ойнабысханнар.
Мыннаң марығ тоозылбинча. Киҷее олғаннар тынанған ползалар, пӱӱн хазыр кӱрезіглер узарадылғаннар. Пӱӱнгі паза соондағы ойыннар салтарларынаңар хығырығҷылар пазағы номерлерде піліп аларлар.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде