ООЛЛАР КӰСТЕРІН БОКСЧА СЫНААННАР
28.04.2017
Хабарлар
Шира аймаанда «Хызыл гвоздика» бокс марии ӱс кӱн ирткен. Боксча 13-ҷі азых турнир Шира аймааның пазы Сергей Зайцевтің сыйиина иртірілген. Ол кизек чаалазығларда чат халған чааҷы-интернационалисттерге чарыдылған.
Андағ чааҷыларны сағысха киріп, ол марығны чыл сай иртірчелер. Шира аймаанаң чаалазығларда пис оол чат халған. Олардаңар хосхар айының 19 кӱнінде аймахтың Культура туразының фойезінде чыылған чонға документальный фильм кӧзіткеннер. Пастағы кӱнде, спортсменнерні алғыстап, чоох тутханнар Шира аймааның пазы Сергей Зайцев, Илбек Ада чаа араласчызы Валерий Порхун паза запастағы полковник, «Боевое братство» пірігістің Ширадағы пӧлиинің устағҷызы Александр Еремеев паза пасхазы.
Анаң марығның талластырығ чардығы пасталыбысхан. Ол кӱн Ширадағы культура туразында чон толдыра чыылған. Мындағы спортсменнернің іҷе-пабалары килгеннер. Ширадаң анда 12 пала араласхан. Ікі цыган оолахтың чыылған туғаннары ла чарым залҷа полған полар. Боксерлар сабыс турғанда, кӧрігҷілер, матап хысхырып, оларның кӧңнілерін кӧдірерге харасханнар. Ооллар даа пирінмин сабысханнар. Марығда 15 - 18 частығ ооллар араласханнар.
Пастағы кӱнде 12 оол полуфиналға кір полбаан. Марыға прай 76 спортсмен чыылған: Ағбаннаң, Ширадаң, Ужурдаң, Копьевтаң, Абазадаң, Асхыстаң, Харатастаң, Хубачардаң, Ағбан пилтірінең паза Мӧӧн суғдаң (Минсуғ город). Полуфиналға кір полбаан хай пірее оолахтарның харах чазы даа ахчатхан, іди рингтең парғаннар.
Ікінҷі кӱнінде полуфинал ирткен. Финалда 40 боксер кӱзін сынаан. Марығның халғанҷы кӱнінде олар ікінҷі паза пастағы орын ӱчӱн харбасханнар.
Ширадағы ікі спортсмен пастағы орынны алған: Роман Сабуров паза кӧп туғаннығ цыган Ваня Безлуцких. Ікінҷі орынны - Элариз Гасымов паза Павел Новиков. Пис оол ӱзінҷі орынға турысхан.
Автор :
Надежда СОЛОМАЧЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде