КИСКЕКНЕҢ АҒЫРБАС ӰЧӰН, АМОХ ХАЙРАЛЛАНАРҒА
08.09.2017
Хабарлар
КӰСКӰНІҢ СӦРӦН КӰННЕРІНЕҢ КИСКЕКНЕҢ АҒЫРҶАҢ ТУС ЧАҒДАПЧА. СООХ АҒЫРИИ, ХАЙЫНЫП, ЧЫЛ САЙ ЧОННЫ ИРЕЕЛЕПЧЕ, УЛАМ НА КІЧІГ ПАЛАЛАРНЫ. АМҒЫ ТУСХА ТЕЕРЕ КИСКЕКТЕҢ ТОҒЫР КӰРЕЗІГДЕ ПРИВИВКАЛАР ТУРҒЫЗАРЫНАҢ АРТЫХ ОҢДАЙ ТАБЫЛБААН. АННАҢАР ПУ КӰННЕРДЕ ПОЛИКЛИНИКАЛАРДА ПРИВИВКАЛАР ТУРҒЫСЧАҢ КАБИНЕТТЕРДЕ ТЕЕСТЕР ПОЛАДЫР.
ИМНЕГ ТУРАЗЫНДА
Ағбандағы олған имнег туразында вакцина аларына ідӧк теес. Оларның аразында чиит іҷе Снежана Танбаева пис айлығ Злата хызыҷаанаң. Пӱӱн олар гепатиттең тоғыр прививкаа килгеннер, че тӱрчедең кискектең арачыланарға кирек. Аны хоостыра чиит іҷе ікінҷілесте. Ол палазына прай кирек вакциналар тузында турғыстырча, че кискектең тоғыр прививкадаң чочынча.
- Кічіг паланың иммунитеді позы тоғынарға кирек, аймах-пасха прививкаларнаң аның ит-ханы нимедең тоғыр кӱрезерін оңнабинча, - тіпче Снежана. Че ус паланың іҷезі Елена Тохтобина аннаң чараспинча. Ол чыл сай иркелеріне кискектең тоғыр прививка турғыстырадыр.
- Олған хазиина нандырығлығ хайарға кирек. Улуғ кізее дее ағырығнаң кӱрезерге сидік, че кічіг палаа улам на, аның ит-ханы тыығалах нооза, - чоохтапча ипчі.
Пӱӱнгі кӱнде палаларына прививка турғыстырарға ынабинчатхан іҷелер ас нимес. Олар кискектең тоғыр вакцинаа киртінминчелер, хайзы-да ол кізее хомай теелче тіп санапча.
Мындағ кирекке нандырған чіли, пу кӱннерде «Хакасия» газета редакциязында Ағбандағы олған имнег туразының ӱзінҷі пӧлиинің пастығы Элеонора Щуракова, хабарҷыларнаң тоғазып, олғаннарға кискектең тоғыр вакцина пирерінеңер чоох апарған.
ХАЙДАҒ ВАКЦИНА?
Пӱӱл августтың халғанҷы кӱннерінең Ағбан чуртағҷылары кискектең тоғыр вакцина алып пастапчалар. Чыл сай вирустар алысчатханнаңар, вакциналар ідӧк алызып одырчалар. Іди ирткен чылда чонға «Гриппол плюс» вакцина турғызылған полза, пӱӱл «Совигрипп» вакцина пирілче. Олар ікізі Россияда сығарылчалар. «Совигрипп» 2013 чылдаң тузаланыста паза пӱӱнгі кӱнге теере позын чахсы саринаң кӧзіткен. Ол арығ, консерванттар чох вакцина.
Сентябрь-октябрьда чонның 40 %-і кискектең тоғыр прививка турғыстырып аларға кирек.
НОҒА КӰСКӰЗІН?
Кискек ағырии уғаа чуғынҷах, аннаң пір ле кізі ағырыбысса, ол табырах пасхазына тарапча. Аннаңар табырах вакцинаны алып аларға кирек. Ӧӧнінде кискек эпидемиязы январь-февральға килісче. Пу тусха теере, прививка турғызылып, чахсы иммунитет тӧстел парарға кирек.
- Кискек матап тарап сыхса, прививка турғыстырарға ынабаан іҷелер, имнег туразынзар ойлап, палаларына вакцина турғыс пирерге сурынчалар. Че аны тузында идерге кирек. Ағырығ хыызында хайынчатса, прививка турғызылбинча, - тіпче имҷі. Іди ирткен чылда кискектееннернің 92,5 %-і прививка чох пала.
КЕМГЕ ЧАРИР ПАЗА ЧАРАБАС?
Кискектең тоғыр вакцина иң пурун ағырығны табырах хаптырып алчатхан чонға пирілче. Ол санда алты ай ас парған паза чазы читкелек палалар. Іди Ағбанда ла 26500 олғанға прививка турғызылар. Мындағ вакцина прайзына даа килісче, че пар, кемге чарадылбинча. Ӧӧнінде ол нымырха киҷіріне паза глюкозалығ вакцинаа аллергиялығ чон. Ідӧк пала ағырчатса, ит ізии 37 градустаң пӧзік полза, прививка турғыстырарға маңзырабасха кирек. Пала хазыхтанып алған соонда турғыстырып аларға чарир, че тың ағырған полза, ікі-ӱс неделяҷа сағирға.
Ыңааҷахтар алты айға теере чон аразына тың на сыхпинчалар, аннаңар олар вакцина кирексібинчелер. Ідӧк оларны іҷе сӱді чахсы хайраллапча.
ТАЙМА ЧООХТАР
Пала прививка алған соонда сах андох ағырыбысча тіп удаа истерге килісче. Опыттығ имҷі Элеонора Викторовна анзынаң чараспинча. Аның чооғынаң, кискектең тоғыр вакцина кискек ағыриин ағылбинча. Анда вирус чоғыл, аның улуғ нимес чардығы ла, хайзы кізінің иді-ханынҷа тарап полбинча. Ол чардыхтар антиген чіли тоғынчалар, оларның полызиинаң иммунитет тӧстелче.
- Іҷе-пабалар, палаларына прививка турғыстырарға хынмин, удаа аның тузазы чоғыл тидірлер, - тіпче имҷі. - Прививка соонаң даа тың ағырғабыс тіп хомзынчалар, че анзы андағ нимес. Вакцина иммунитетті тӧстепче, аның соонда соох паза вирус ағырығларынаң удаа ағырбинчалар, че хаптырып алза даа, ағырығ ниик иртче.
Ідӧк кискек чылдаң чылға кӱс алынча тидірлер. Ирткен чылларда ол ағырығ тың на хорғыстығ ағырыға саналбаҷаң. Че пу даа чоохтың сыны чоғыл тіп таныхтаан Элеонора Щуракова. Аның чооғынаң, амды олғаннар чуға хазыхтығлар. Анзында іҷелер постары пыролығлар. Олар иркелерін тың хайраллапчалар.
- Сизінген поларзар, чуға паза сидіксіністе чуртапчатхан сӧбірелерде палалар удаа ағырбинчалар, олар пик хазыхтығлар, сыдамахтар, - тіпче имҷі.
Автор :
Екатерина КОЧЕЛАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде