ХАКАСИЯДАҒЫ ТЕЛЕВИДЕНИЕ НАА ОНДАЙНАҢ ТОҒЫНЫП ПАСТАБЫСТЫ
17.10.2017
Хабарлар
ПУ НААДА ХАКАСИЯНЫҢ ЧУРТАҒҶЫЛАРЫНА ӦРІНІСТІГ ХАБАР ПОЛҒАН. ТИКСІ РОССИЯДАҒЫ ХАЗНА ТЕЛЕКОМПАНИЯЗЫНЫҢ ХАКАСИЯҶА ПӦЛИИ («ХАКАСИЯ» ГТРК) ЦИФРОВОЙ ТЕЛЕВИДЕНИЕДЕ ТОҒЫНЫП ПАСТАБЫСТЫ. АМДЫ РЕСПУБЛИКА ЧУРТАҒҶЫЛАРЫНЫҢ ФЕДЕРАЛЬНАЙ КӦЗІДІГЛЕРНІ ЛЕ НИМЕС, ІДӦК ОРЫНДАҒЫ ХАБАРЛАРНЫ ПӦЗІК СИНДЕ КӦРЕР ОҢДАЙ ПАР.
ПУ ТАНЫҒЛЫҒ КИРЕККЕ ЧАРЫДЫЛҒАН МЕРОПРИЯТИЕ 12 ОКТЯБРЬДА ТЕЛЕРАДИОКОМПАНИЯДА ИРТКЕН. АНДА ХАКАСИЯНЫҢ ПАЗЫ ВИКТОР ЗИМИН, РОССИЯДАҒЫ ТЕЛЕВИДЕНИЕ ПАЗА РАДИО ПАЛҒАЛЫЗЫНЫҢ ОРЫНДАҒЫ ПӦЛИИНІҢ ДИРЕКТОРЫ НИКОЛАЙ ГРЕБЕНЩИКОВ АРАЛАСХАННАР. ОЛАР «ХАКАСИЯ» ГТРК-ның ДИРЕКТОРЫ ЛАРИСА ЕФИМЕНКО-МИХАЙЛОВАНАҢ ХАДА, КНОПКАА ПАЗЫП, ЦИФРОВОЙ ТЕЛЕВИДЕНИЕЕ ПАСТАҒ ПИРГЕННЕР. ХАБАРҶЫЛАР МЕРОПРИЯТИЕНІ, ӦНЕТІН СЫҒАРЫС ТИМНЕП, КӦНІ ЭФИРДЕ КӦЗІТКЕННЕР.
Чоохтирға кирек, Хакасияда цифровой телевидение 2012 чылда августта киріліп пастаан. Ол республика чуртағҷыларына федеральнай каналларны пӧзік синде кӧрерге оңдай пирген. Че орындағы хабарларны олар испеҷеңнер. Амды республикада, 88 телевизионнай станция турғызылғанда, пу ағырсымнығ сурығ пӧгілген.
Лариса Ефименко-Михайлованың таниинаң, «Хакасия» ГТРК регионда иң пастағы телерадиокомпания полча. Аның хабарҷылары республика чуртазынаңар тузында паза алғым чоохтап пирерге кӱстенчелер. Амды «Хакасия» ГТРК цифровой телевидениенің пастағы мультиплексінзер кірче. Корреспонденттер тимнеен кӧзідіглер «Россия-1», «Россия-24» каналларда паза «Радио Россияда» сығарылчалар.
Регионның пазы Виктор Зимин «Хакасия» ГТРК-ның ӧмезін наа оңдайнаң тоғынып пастаанынаң алғыстаан. Чооғында ол таныхтаан: «Республикада цифровой телевидение тиліпчеткені ӧріндірче. Амды пістің чуртағҷылар тилекейде, Россияда паза Хакасияда полчатхан киректердеңер толдыразынаң піліп ал турарлар. Ідӧк орындағы хабарларны ыраххы паза кічіг аалларда чуртапчатхан улус истер. Анзы уғаа чахсы».
Кӧзідіг тузында Ағбан пилтірі поселоктаң кӧні эфирге хабарҷы Константин Кравцов сыххан. Аннаң хада кӧрігҷі Снежана полған. Чиит ипчінің таниинаң, поселок Ағбанның хыринда орныхчатхан даа полза, чуртағҷылар мында «Хакасия» ГТРК-ның кӧзідіглерін чахсы кӧр полбаҷаңнар. Снежана чоохтапча: «Орындағы хабарлар пасталыбысса, антеннаны аар-пеер турғызып, сигналны чадап тудып алҷаңмыс. Амды сидіксініс чоғыл». Чир-суғҷыбыстың кӧңніне «Вести-Хакасия», «Муж на кухне», «Мобильный репортер» кӧзідіглер кірчеттір.
Ӏдӧк мероприятиеде Боград аймаандағы Пӧзік хас аал чӧбінің пазы Сергей Проскурин араласхан. Аның чооғынаң, пу аалда региондағы телевидениені 1980 чыллардаң кӧрбин парирлар. Кізілер ам на «Хакасия» ГТРК-ны кӧріп пастапчалар. Цифровой телевидениее ӧӧнінде улуғ частығлар ӧрінчелер. Чиит улусха Интернет кирек, ууҷалар, тізең, телевизор кӧрерге хынадырлар. Ідӧк Сергей Владимирович цифровой телевидениенің пір чахсы сарин таныхтаан, аны хоостыра чуртағҷыларға олох саайлардаңар искірерге чарир.
Ідӧк позының сағыстарынаң Хакас телевидениезінің устағҷызы Наталья Табакова ӱлескен. Наталья Михайловна таныхтаан: «Цифровой телевидение чуртасха кирілгенде, пістің хабарҷылар тимнеен кӧзідіглерні кӧп аалларда кӧр сыхханнар. Анзы уғаа ӧріністіг. Мының алнында
кізілер тоғынҷыларға чоохтаҷаңнар: «Хакас телевидениезі мында кӧзітпинче, нимее сірер пісті суурчазар». Амды пу сурығ пӧгіл парды. Хакас тілінең сыхчатхан кӧзідіглер кізілернің кӧңніне кірче. Кӧзідімге, ӱр ниместе пістің хабарҷы Алексей Боргояков Кызлас аалда пол килген. Анда ол Челтыгмашевтер сӧбірезінең тоғасхан. Аал чуртағҷылары «Хакасия» ГТРК-ны кӧрбеҷеңнер, аннаңар сӧбіренің пазы Анатолий Челтыгмашев, телевизорда хакас тілінең чоохтанчатханнарын ис салып, сах андох кухняда хайынчатхан ипчізін хығырыбыстыр. Амды олар Хакас телевидениезін сыбыра кӧрчелер. Ізенчем, наа технологиялар пасха даа аалларда пістің кӧзідіглернең танызар оңдай пирчелер».
Чоохтирға кирек, 2018 чылда Хакасияда цифровой телевидениенің ікінҷі мультиплексі кирілерге кирек. Анда СТС, «Звезда», «Домашний» каналларнаң хада республиканың телерадиокомпаниязының (РТС) хабарларын кӧріп аларға чарир полар.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде