ІСЧЕҢ СУҒ АРЫҒ ПОЛЗЫН
13.04.2018
Хабарлар
Ӧӧркі чӧп. Президиум чыылиинда ӱзӱрілген сурығларның кӧбізі федеральнай закон проекттеріне ӱндезіглер пирерінең палғалыстығ полған. Россия правительствозы тимнеен закон проекттерінің пірсі ісчең суғ алҷаң орыннарның ибіркізін хайраллирына теелген.
Хакасияның Оӧркі Чӧп президиумы 11 апрельде теестегі чыылиин иртірген. Комитеттернің паза комиссияларның устағҷылары пу чыылығда республиканың хайзы законнарынзар алызығлар кирҷең сурығларны кӧрібіскеннер. Ідӧк федеральнай закон проекттеріне ӱндезіглер пирерін ӱзӱргеннер.
Республика законнарынзар алызығлар кирері ӧӧнінде федеральнай законодательство алыс парғанынаң палғалыстығ полған. Кӧзідімге, республиканың алынҷа законодательнай акттарынзар алызығлар кирердеңер закон проектінде табығлардаңар чоох парча. Оӧн алызығ - федеральнай законҷа амды табығҷыларға полчатхан орны хоостыра ӱн пирерге чарир полчатханы. Россия президентіне табығларда ол наа ниме тузаланылған нооза. Амды аны хоостыра пістің законнарны тӱптестір саларға киректелче. Улам пӱӱл кӱскӱзін республикада табығлар (Хакасияның пазына, Оӧркі Чӧпсер) иртер.
Пии аймааның депутаттар чӧбінің кнезі Галина Котельникова «Пии аймааның муниципальнай пӱдістерінің хырығларын чарадыға алардаңар» республика законынзар алызығлар кирердеңер закон проектінең таныстырған. Мында чоох парча Пии аал чӧбін паза Новотроицкай аал чӧбін пір муниципальнай пӱдіске піріктірердеңер.
- Пу сурығ наа нимес, аны хоостыра чарым чылҷа тоғыс апарылча, - таныхтаан Оӧркі Чӧп кнезі Владимир Штыгашев.
Чоохтирға кирек, пу ікі аалны пір муниципальнай пӱдіске піріктірерінҷе чыылығлар, азых ӱзӱріглер ирткен - чуртағҷылар ол чарадығнаң чарасханнар. Ікі аал чӧбі піріктірілгені бюджет ахчазын ӱзӱрлир тіп кӧрілче. Че олох туста читпес сарилары пар, оларның пірсі - Новотроицкай аал чуртағҷыларына амды аймах пічіктер соонҷа 17 километр ырах Пиизер чӧр турарға килізер.
Федеральнай закон проекттеріне ӱндезер сурығларның аразында хайығ тартхан ісчең паза хоныхта тузаланхаң суғ алҷаң орыннарның ибіркізін хайраллирын тыытчатхан закон проекті. Аны Россия правительствозы тимнептір. Чоох парча суғ алҷаң пӱдіріглернің санитар зоназынаң сайбап тузаланғаны, олаңай чоохтаза - андағы чирні (суғны) кірлеені ӱчӱн хатығласты тыыдардаңар.
Хайди таныхтаан Оӧркі Чӧптің конституционнай законодательствоха комитеттің кнезі Светлана Могилина, Россияның суғ алҷаң орыннарының 71 %-інде (2017 чылның 1 июльына) санитар нормалары сайбалғаны ілезіне сығарылған. Аннаңар даа ісчең суғ пастыра аймах чуғынҷах ағырығлар тарапчатханы ӧсче. - Россия правительствозы тимнеен закон проектінхе суғ алҷаң орыннарны кірлеен ӱчӱн хатығласты илееде ӧскірібізері кӧрілче, - чарытхан Могилина.
Иң улуғ штрафтар санитар зоназының пастағы хурчаанзар кірчеткен чирні (ол иң хатығ режимніг, тиксі санитар зоназында 3 хурчағ) кірлеені ӱчӱн кӧрілче осхас: олаңай кізее - 20 - 50 муң салковай, должностьтығ кізее -100 - 200 муң салковай, юридическай лицоға - 500 муң - 1 миллион салковай.
Владимир Штыгашев пу сурығ Хакасияа ідӧк ағырсымнығ полчатханын таныхтаан. Чоох Аршаннардағы хара тас аныпчатхан разрезтеңер парған. Оӧркі Чӧп кнезінің таниинаң, разрезтің тоғызын хатығ сыныхтағда тударға кирек. Іди полбаза, республика чуртағҷыларының чарымызынаң даа кӧп чардығына (Ағбан, Харатас паза ибіркі ааллар чуртағҷылары) ісчең суғ хоостыра хорғыс пар. Разрез Ағбан суғнаң хости орныхча паза разрезтегі суун андарох ағысча нооза. Мындағы чуртағҷыларның прайзы даа Ағбаннаң алылчатхан суғны ісче. Итсе, разрез суғны арығлаан соонаң на ағысчабыс тіп ізендірче. Че анзы сын алай чох, кем пілер? Аннаңар федеральнай синде хатығлас тыыдылғаны ісчең суғ арачылалар паза арығ полар тіп ізеніс пирче.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде